မဲခေါင်၊ ဖေဖော်ဝါရီ ၂၁
ရှမ်းပြည်တောင်ပိုင်း၊ ဆီဆိုင်မြို့တွင်းမှာ ပိတ်မိနေတဲ့ မိသားစုတွေထဲက ဒဏ်ရာပြင်းထန်သူ ၂ ဦးကို မနေ့က ဖေဖော်ဝါရီ ၂၀ ရက်ညနေပိုင်းက ကယ်ထုတ်နိုင်ခဲ့တယ်လို့ ဆီဆိုင်မြို့ခံ လူငယ်တစ်ဦးက မဲခေါင်ကို ပြောပါတယ်။
ဆီဆိုင်မြို့ စစ်ဘေးရှောင်သူတွေအပါအဝင် စေတနာရှင်တစုက ကားတွေ၊ စက်သုံးဆီတွေ စီစဥ်ပေးတာကို လူငယ်တစုက ကား ၃ စီး၊ ဆိုင်ကယ်တွေနဲ့ သွားရောက် ကယ်ထုတ်ခဲ့တာလို့ သိရပါတယ်။
ဒဏ်ရာရမိသားစုရှိတဲ့ နေရာက ကားမသွားနိုင်လို့ ဆိုင်ကယ်တွေနဲ့ပဲ ခေါ်ထုတ်ခဲ့ရတာဖြစ်ပြီး မြေနီကုန်းဆွတ်ရွာသို့ ညအချိန်ရောက်ရှိတဲ့အတွက် ယင်းရွာမှာပဲ ညအိပ်ခဲ့ပြီး တောင်ကြီး စဝ်စံထွန်းဆေးရုံကို ပို့မယ်လို့ ပြောပါတယ်။
နောက်ကျောတွင် ပြင်းထန်ဒါဏ်ရာရရှိထားတဲ့ အမျိုးသမီးကစိုးရိမ်ရတဲ့ အခြေအနေရှိပြီး ပါးစပ်က သွေးအန် နေကာ အသက် ၁၃ နှစ်အရွယ် သမီးမှာလည်း ပြင်းထန်တဲ့ဒါဏ်ရာရရှိထားတယ်လို့ သိရပါတယ်။
ကျန်ခဲ့တဲ့လူငယ် ၃ ဦးမှာ လက်မောင်းနဲ့ ခြေထောက်တွေမှာအနည်းငယ်စီ ဒါဏ်ရာအသီးသီးရရှိထားပြီး ယနေ့မှာ အခြား လေဖြတ်နေသူ ၁ ဦးနဲ့ ကိုယ်ဝန်ဆောင်အပါအဝင် ၂၀ ဦးခန့်ကိုလည်း ထပ်မံကယ်ထုတ်ဖို့ လုပ်ဆောင်နေတယ်လို့ ဆိုပါတယ်။
သူတို့ဟာ ဆီဆိုင်မြို့တိုက်ပွဲတွေစဖြစ်နေချိန်မှာ အနီးက တောထဲမှာခိုလှုံရင်း ကျန်ခဲ့တာဖြစ်ပြီး ဖေဖော်ဝါရီ ၁၆ ရက်က စစ်ကောင်စီရဲ့ ဒရုန်းဗုံးကြောင့်ထိခိုက်ဒဏ်ရာတွေ ရခဲ့ကြတာလို့ သိရပါတယ်။
လက်ရှိမှာဆီဆိုင်မြို့ကို PNLA နဲ့တော်လှန်ရေးတပ်တွေက ထိန်းချုပ်ထားဆဲဖြစ်ပြီး စစ်ကောင်စီက လေယာဥ်နဲ့ဗုံးကြဲ၊ ဒရုန်းနဲ့ဗုံးချ၊ လက်နက်ကြီးနဲ့ပစ်နေပြီး မြေပြင်တိုက်ပွဲတွေဖြစ်နေပါတယ်။
MK-001
