မဲခေါင်၊ ဖေဖော်ဝါရီ ၉

ထိုင်းနိုင်ငံခြားရေးဝန်ကြီး ပန်ပရီးဘာဟစ်ဒါနူကာရာက ထိုင်းမြန်မာနယ်စပ်ဒေသ စစ်ရှောင်ဒုက္ခသည်များ ဆိုင်ရာ လူသားချင်းစာနာမှုအကူအညီပေးရေး စင်္ကြန်ကို တစ်လအတွင်း ဖွင့်လှစ်ပြီး အထောက်အပံ့တွေ စတင်ပေးတော့မှာဖြစ်ကြောင်း ဖေဖော်ဝါရီ ၈ ရက်နေ့က ထုတ်ပြန်ပြောဆိုသွားပါတယ်။

နယ်စပ်ဖြတ်ကျော် ထောက်ပံ့ကူညီမှုတွေအတွက် အစီအစဉ်ကို ပြီးပြည့်စုံခြင်းမရှိသေးလို့ အတိအကျ ထုတ်ဖော် တင်ပြထားတာမရှိပေမယ့် ကရင်ပြည်နယ်နဲ့ ကပ်လျက် တက်ခ်ခရိုင် သောင်းရင်းမြစ်ကမ်းတစ်ဖက်က ရွှေ့ပြောင်းနေထိုင်ရသူ ဒုက္ခသည် ၂၀၀၀၀ အတွက်သာ အကျိုးရှိစေမယ့် အစီအစဉ်ဖြစ်ကြောင်းနဲ့ သောင်းရင်းမြစ် တစ်ဖက်ကမ်း ထိုင်းဘက်ခြမ်း ထောက်ပံ့မှုတွေကို ထိုင်းဘက်က တာဝန်ယူပြီး မြန်မာဘက်ခြမ်းအတွက် အကူအညီအထောက်အပံ့ကိစ္စကို စစ်ကောင်စီကသာ တာဝန်ယူမှာဖြစ်ကြောင်း ပန်ဘရီးက ဝန်ခံသွားပါတယ်။

ဒီထောက်ပံ့မှုတွေကို အာဆီယံဘေးအန္တရာယ်စီမံခန့်ခွဲမှုဆိုင်ရာ လူသားချင်းစာနာထောက်ထားမှု ညှိနှိုင်းရေးဗဟိုအဖွဲ့နဲ့ ထိုင်း၊ မြန်မာ ကြက်ခြေနီအသိုင်းအဝိုင်းက မျက်မြင် သက်သေလုပ်လို့ ထောက်ပံ့သွားမှာဖြစ်ပါတယ်။

မဲဆောက်မှာ နေထိုင်တဲ့ ကုလကူညီကယ်ဆယ်ရေး ဝန်ထမ်းမြန်မာတစ်ဦးက ဒီလို အကူအညီပေးပုံတွေ ဟာ အရင်ကတည်းက ဘာမှမထိရောက်ခဲ့တဲ့ ဟန်ပြပုံစံမျိုးတွေသာ ထပ်ဖြစ်လာမှာလို့ မှတ်ချက်ပေးပြောကြား သွားပါတယ်။

အာဆီယံကို ထိုင်းအစိုးရက ကနဦးအဆင့်အဆိုအဖြစ် တင်သွင်းတဲ့ ဒီကူညီထောက်ပံ့ရေးအစီအစဉ်ဟာ စစ်ဘေး ဒဏ်ကြောင့် ကုလမှတ်တမ်းအရ လူဦးရေ ၂ . ၆ သန်း ရွှေ့ပြောင်းနေထိုင်နေရတဲ့ မြန်မာ့ဒုက္ခသည်အားလုံးနဲ့ ယှဉ်ကြည့်ရင် အလွန်သေးငယ်တဲ့ ကူညီထောက်ပံ့မှုသာဖြစ်တယ်လို့ NUG ပြောရေးဆိုခွင့်ရှိသူ နေဘုန်းလတ် က ပြောပါတယ်။

ထိုင်း-မြန်မာနယ်စပ်မှာတင် ရွှေ့ပြောင်းနေထိုင် နေရတဲ့ ဒုက္ခသည်အရေအတွက်က အလွန်များပြားနေပြီး လူပေါင်း ၂၀၀၀၀ လောက်အတွက်သာ ကူညီနိုင်မယ့် အစီအစဉ်ဖြစ်လို့ ဘာမှမထူးခြားနိုင်ကြောင်း၊ တရားဝင်အစိုးရမဟုတ်တဲ့ မြန်မာစစ်ကောင်စီဟာ ကိုဗစ်ကာလ ကတည်းက ပြည်ပအကူအညီတွေမရောက်အောင် ပိတ်ဆို့ခဲ့လို့ မြန်မာဘက်ခြမ်း ဒုက္ခသည်တွေအတွက် ထောက်ပံ့မှုတွေကို သူတို့လက်ထဲ ထည့်ပေးခြင်းက စစ်ကောင်စီကို ကူညီတာသာ ဖြစ်ကြောင်း၊ နယ်စပ်ဒေသ တိုင်းရင်းသားလက်နက်ကိုင်တွေဆီကို ရောက်ရှိခြင်းကသာ ပိုအကျိုးရှိနိုင်မယ်လို့ NUG ပြောရေးဆိုခွင့်ရှိသူ နေဘုန်းလတ်က ကန့်ကွက်ပြောကြားသွားပါတယ်။

Ref: abcnews
MKF-001

#MeKongNews

#ထိုင်း

#မြန်မာ

#ကူညီ

#ဒုက္ခသည်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)