မဲခေါင်၊ ဖေဖော်ဝါရီ ၉
ပြည်သူ့ကာကွယ်ရေးတပ် (PDF) တွေ ထိန်းချုပ်ထားတဲ့ စစ်ကိုင်းတိုင်း၊ ကောလင်းမြို့ကို ပြန်ရဖို့ စစ်ကောင်စီတပ်ဟာ အင်အားအလုံးအရင်းနဲ့ တိုက်ခိုက်နေပေမယ့် စစ်ကောင်စီဘက်က အထိနာပြီး တော်လှန်ရေးတပ်တွေက လက်နက်တွေ သိမ်းမိခဲ့တယ်လို့ သိရပါတယ်။
မနေ့ ဖေဖော်ဝါရီ ၈ ရက်က ကောလင်းမြို့တွင်း မင်းချမ်းကျောင်းနဲ့ တဲကြီးကုန်းဘက်ကို ဝင်ရောက်ခဲ့တဲ့ စစ်ကောင်စီတပ်တွေကို တော်လှန်ရေးအဖွဲ့တွေက တိုက်ခိုက်ခဲ့ပြီး စစ်ကောင်စီဘက်က အထိနာ အကျအဆုံးများခဲ့တယ်လို့ ကောလင်းခရိုင် တပ်ရင်း ၁ မှ တာဝန်ရှိသူတစ်ဦးက သူရဲ့ Facebook ကနေ အသိပေးထားပါတယ်။
“သိမ်းဆည်းရမိ ပစ္စည်း လေးတွေကတော့ ဓာတ်ပုံနှင့်တကွ တင်ပြလိုက်ရပါတယ် အမျိုးတို့ ။ ကျနော်တို့ အစွမ်းကုန်ကြိုးစားနေဆဲပါ။ တပ်ရင်း ၁ လည်း အစွမ်းကုန်ကြိုးစားနေပါတယ်” လို့ သိမ်းမိခဲ့တဲ့ ဓာတ်ပုံတွေနဲ့အတူ အသိပေးထားပါတယ်။
အဲ့ဒီ့တိုက်ပွဲမှာ တော်လှန်ရေးရဲဘော် ၄ ဦးလည်း ထိခိုက်ဒဏ်ရာတွေ ရရှိခဲ့ပြီး မစိုးရိမ်ရဘူးလို့ ဆိုပါတယ်။
၂၀၂၃ ခုနှစ်၊ နိုဝင်ဘာ ၆ ရက်က KIA နဲ့ PDF တွေ သိမ်းပိုက်လိုက်တဲ့ ကောလင်းမြို့ကို ပြန်ရဖို့ စစ်ကောင်စီက မြေပြင်အင်အား အလုံးအရင်းအပြင် လေကြောင်းကလည်း အပြင်းအထန်တိုက်ခိုက်နေတာ ၇ ရက်ရှိပါပြီ။
ကောလင်းမြို့ဟာ အမျိုးသားညီညွတ်ရေးအစိုးရ (NUG) ရဲ့ ပြည်သူ့အုပ်ချုပ်ရေး စတင်လည်ပတ်တဲ့ မြို့လည်းဖြစ်ပြီး လက်ရှိအချိန်ထိ မြို့ကို တော်လှန်ရေးအဖွဲ့တွေက ထိန်းချုပ်ထားဆဲ ဖြစ်ပါတယ်။
ဒါပေမယ့် စစ်တပ်လော်ဘီ ဝါဒဖြန့်တဲ့ တယ်လီဂရမ်ချန်နယ်တွေမှာတော့ ကောလင်းမြို့ကို စစ်ကောင်စီက ပြန်သိမ်းလိုက်ပြီး ထိုမှတဆင့် ကချင်ပြည်နယ်ကို ဖြတ်ကာ လိုက်ဇာအထိ ချီတက်မယ်လို့ ကြုံးဝါးနေကြပါတယ်။
“ကောလင်းကနေ လိုင်ဇာအထိ ချီတက်နိုင်ရင် အတိုင်းထက်အလွန်ပေါ့” လို့ စစ်တပ်လော်ဘီ တယ်လီဂရမ်ချန်နယ်တွေထဲမှ ဖောလိုဝါးအများဆုံး ကျော်စွာချန်နယ်မှာ ရေးသားထားပါတယ်။
အဲ့ဒီ့ စစ်တပ်လော်ဘီ ဝါဒဖြန့်တယ်လီဂရမ် ချန်နယ်ဟာ ဇန်နဝါရီ ၄ ရက် (လွတ်လပ်ရေးနေ့)မှာ ဒေသကွပ်ကဲရေးဌာနချုပ် (ဒ.က.စ လောက်ကိုင်)မှ ဗိုလ်မှူးချုပ် ၆ ယောက်နဲ့အတူ တိုက်ခိုက်ရေးတပ်သား နှစ်ထောင်ကျော် လက်နက်ချအညံ့ခံတုန်းကလည်း သတင်းမှားဟု တဖက်သတ်ငြင်းပြီး စစ်တပ်ထောက်ခံသူများကို ဝါဒဖြန့်ခဲ့ပါသေးတယ်။
#MeKongNews
#ကောလင်း
#လိုင်ဇာ
#တိုက်ခိုက်
#လော်ဘီ
#စစ်ကောင်စီ
