မဲခေါင်၊ ဖေဖော်ဝါရီ ၅

ရှမ်းပြည်တောင်ပိုင်း၊ ပအိုဝ်းကိုယ်ပိုင် အုပ်ချုပ်ခွင့်ရဒေသ၊ ဟိုပုံးမြို့နယ်မှာ စစ်ကောင်စီနဲ့ ပအိုဝ်းပြည်သူ့စစ် (PNA) တပ်တွေက ဖေဖော်ဝါရီ ပထမအပတ်လောက်ကစပြီး အကြီးစား စစ်ရေး ပြင်ဆင်မှုတွေ ပြုလုပ်နေတယ်လို့ ဒေသခံတွေက ပြောပါတယ်။

ဟိုပုံးမြို့နယ်အတွင်း လုံခြုံရေး ကင်းလှည့်ထွက်ဖို့အတွက် ဆီဆိုင်မြို့နယ်၊ ဆိုက်ခေါင်မြို့၊ မွှေတော်ကက္ကူ သွားလမ်းပေါ်ရှိ PNA ရဲ့ အောင်ဆုဗွေ လူငယ်ပြုပြင်ထိန်းသိမ်းရေးစခန်းက အယောက် ၁၀၀ ကျော်ကိုလည်း ခေါ်ယူထားတယ်လို့ ဆိုပါတယ်။

အောင်ဆုဗွေစခန်းနဲ့ နီးစပ်သူ တစ်ဦးက “PNO က အင်အား အရမ်းလိုနေပြီ ထင်တယ်။ အရင်တုန်းက ဆေးစွဲနေတဲ့ လူငယ်တွေကို ဆေးဖြတ်ပေးမယ်ဆိုပြီး အောင်ဆုဗွေစခန်းကို ဖမ်းပို့ထားတာ ရှိတယ်။ သင်တန်းရော ဆေးဖြတ်ရောအပြီး တစ်လ ထိန်းသိမ်းထားတာ။ အခုအဲလူတွေကို ထုတ်သုံးနေပြီ” လို့ ပြောပါတယ်။

အောင်ဆုဗွေစခန်းက ခေါ်ယူထားတဲ့ လူငယ်တွေကို ဖေဖော်ဝါရီလ ၃ ရက်နေ့ကတည်းက စစ်သင်တန်းပေးနေပြီး ဟိုပုံးမြို့နယ် လုံခြုံရေးအပြင် လိုအပ်ရင် လိုအပ်သလို ရှေ့တန်းကိုလည်း ပို့ဆောင်သွားမယ်လို့ သိရပါတယ်။

“သူတို့ကို လိုလိုလားလား သွားချင်လား မေးကြည့်တော့လည်း ကိုယ့်လူမျိုးကို ကူချင်တာတဲ့။ သူတို့ကို သနားမိတယ်” လို့ အောင်ဆုဗွေစခန်းနဲ့ နီးစပ်သူ တစ်ဦးက ဆက်ပြောပါတယ်။

တောင်ကြီးမြို့နယ်၊ တောင်ကြီး – ဟိုပုံးသွားလမ်း၊ ၃ မိုင် တစ်ဝိုက်က တောင်ကုန်းတွေပေါ်မှာလည်း စစ်ကောင်စီနဲ့ PNO တပ်တွေက ကတုတ်ကျဉ်းတွေ တူးထားပြီး အသင့်နေရာ ယူထားတယ်လို့ ဆိုပါတယ်။

ပြီးခဲ့တဲ့ ဇန်နဝါရီလ နောက်ဆုံးအပတ်ကလည်း ဟိုပုံးမြို့နယ်၊ ကျေးရွာပေါင်း ၁၀၀ နီးပါးမှာ အသက် ၁၈ ကနေ ၄၀ အတွင်း အမျိုးသားတွေကို စစ်သင်တန်းပေးဖို့ တစ်ရွာ ၅ ဦးနှုန်း ခေါ်ယူထားတဲ့အပြင် စစ်အသုံးစရိတ် တစ်သိန်းကျပ်ကိုလည်း PNA က ကောက်ခံခဲ့ပါသေးတယ်။

CJ-007

#MeKongNews

#အောင်ဆုဗွေ

#စစ်ကောင်စီ

#ပြည်သူ့စစ်

#ဟိုပုံး

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)