မဲခေါင်၊ ဖေဖော်ဝါရီ ၄
ရှမ်းပြည်နယ်တောင်ပိုင်း၊ ဓနုကိုယ်ပိုင်အုပ်ချုပ်ခွင့်ရဒေသ ပင်းတယမြို့ အနောက်ပိုင်း တောင်ရွှေပုထိုး ကျေးရွာရှိ ရွေးကောက်ပွဲအနိုင်ရ NLD လွှတ်တော်အမတ်ကနေ နှုတ်ထွက်ကြောင်း ဦးထွန်းထွန်းနိုင်က ကြေညာပါတယ်။
ယနေ့မှ၍ ၂၀၂၀ ရွေးကောက်ခံအနိုင်ရ လွှတ်တော်ကိုယ်စားလှယ်အဖြစ်မှ တရား၀င်နုတ်ထွက်ပြီဖြစ်ကြောင်း မဲဆန္ဒရှင်အပေါင်းအား ရိုသေလေးစားစွာဖြင့် အသိပေးအပ်ပါတယ် လို့ ဇန်နဝါရီ ၃၁ ရက်နေ့က သူ့ရဲ့လူမှုကွန်ယက်ကနေတဆင့် အသိပေးထားပါတယ်။
အမတ်အနေနဲ့ ပြည်သူအတွက်ဘာမှ လုပ်မပေးနိုင်တော့ ရိုးရိုးပြည်သူတစ်ဦးအနေနဲ့ တော်လှန်ရေးမှာ လက်နက်ကိုင်ပါ၀င်နေတာဖြစ်တဲ့အတွက် နုတ်ထွက်လိုက်ရတာဖြစ်တယ်လို့ NLD လွှတ်တော်အမတ် ဦးထွန်းထွန်းနိုင်က ပြောပါတယ်။
“နုတ်ထွက်ရတဲ့ အဓိက အကြောင်းရင်းက ကိုယ်စားလှယ် တစ်ယောက်အနေနဲ့ ၃ နှစ်တာ ကာလအတွင်း တာ၀န်ယူ တာ၀န်ခံပြီး လုပ်တဲ့ အလုပ်တာ၀န် တခုမှ မရှိတာရယ်၊အမတ်အနေနဲ့ ပြည်သူအတွက်ဘာမှ လုပ်မပေးနိုင်တော့ အမတ်အနေနဲ့ ရပ်တည်ပြီးမနေချင်တော့တာဘဲ ရိုးရိုးပြည်သူအနေနဲ့ပဲ လက်နက်ကိုင်ပြီး တော်လှန်လိုတဲ့အတွက် နုတ်ထွက်ရတာပါ။” လို့ လွှတ်တော်ကိုယ်စားလှယ် ဦးထွန်းထွန်းနိုင်ကပြောပါတယ်။
လက်ရှိမှာ NLD လွှတ်တော်အမတ် ဦးထွန်းထွန်းနိုင်က ဓနုပြည်သူ့လွတ်မြောက်ရေးတပ်ဦး-DPLF မှာ ဥက္ကဌတာဝန်ထမ်းဆောင်ကာ မဟာမိတ်ညီနောင်၃ ဖွဲ့ ဖြစ်တဲ့ TNLA ၊ MMDAA(ကိုးကန့်)၊ AA တို့နဲ့အတူ အတွေ့ကြုံယူရင်းတိုက်ပွဲဝင်တဲ့အပြင် အခြားနည်းလမ်းပေါင်းများစွာနဲ့လည်း DPLF အဖွဲ့ကစစ်ကောင်စီကိုတော်လှန်နေတယ်လို့ သိရပါတယ်။
ဓနုပြည်သူ့လွတ်မြောက်ရေးတပ်ဦး-DPLF ဟာ တအာင်းအမျိုးသားလွတ်မြောက်ရေးတပ်မတော် TNLA နဲ့ချိတ်ဆက်ပြီးတော့မှ ဖြစ်ပေါ်လာတဲ့ အဖွဲ့တစ်ခုဖြစ်တယ်လို့လည်း ဥက္ကဌဖြစ်သူ ဦးထွန်းထွန်းနိုင်ကပြောပါတယ်။
ဓနုပြည်သူ့လွတ်မြောက်ရေးတပ်ဦး-DPLF ကို ဓနုအမျိုးသားနယ်မြေနဲ့ အတူနေ ညီနောင်တိုင်းရင်းသားများအပါအဝင် ဓနုလူထုအားလုံးကို ကာကွယ်စောင့်ရှောက်ရန်ဆိုတဲ့အချက်အပါအဝင် ရည်ရွယ်ချက် ၄ မျိုးနဲ့အတူ ဒီမိုကရေစီနဲ့ လူ့အခွင့်အရေးကို အာမခံတဲ့ ဖက်ဒရယ် ဒီမိုကရေစီပြည်ထောင်စုနိုင်ငံတည်ဆောက်ရေးကိုလည်း ဦးတည်ပြီး ဖွဲ့စည်းခဲ့တယ်လို့ ဦးထွန်းထွန်းနိုင်က ဆိုပါတယ်။
စစ်တပ်အာဏာသိမ်းပြီးနောက် ပင်းတယ ပြည်သူ့ကာကွယ်ရေးအဖွဲ့ ပင်းတယ PDF အဖွဲ့ကို ၂၀၂၁ မေလမှာ NLD လွှတ်တော်အမတ် ဦးထွန်းထွန်းနိုင်က ဦးဆောင်ဖွဲ့စည်းပြီး စစ်ကောင်စီတပ်တွေကို လက်နက်ကိုင်တော်လှန်ခဲ့ပါသေးတယ်။
“ပင်းတယ PDF ကို ဦးဆောင်တုန်းကရော၊ ဓနု တပ်မှာ ဥက္ကဌတာဝန်ထမ်းဆောင်နေတဲ့ကာလအတွင်း NUG MOD နဲ့ချိတ်ဆက်ပြီး ပုံမှန်အစည်းအဝေးတွေလည်းတက်တယ်။လုပ်စရာရှိတာလုပ်တယ်။ ကျွန်တော်တို့ လုပ်နေတဲ့အတိုင်းအတာအနေနဲ့ NUG အတွင်းမှာ ဘာမှအရေးမပါ အရာမရောက် ထိန်းကျောင်းခွင့်လည်းမရဘူး။ အထောက်အပံ့လည်းမရဘူး။ ဘာဆိုဘာမှလုပ်ပိုင်ခွင့်လည်းမရှိဘူး။ဒါ့ကြောင့် ဓနုတပ်ကိုပဲ အားသွန်ခွန်စိုက်လုပ်နေတာပါ။” လို့ ဦးထွန်းထွန်းနိုင်ကပြောပါတယ်။
လွှတ်တော်အမတ် ဦးထွန်းထွန်းနိုင်က အမျိုးသားညီညွတ်ရေးအစိုးရ NUG က ၂၀၀၈ ဖျက်သိမ်းခြင်း မဖျက်သိမ်းခြင်းထက် လက်ရှိ NUG အစိုးရကို ပြည်သူတွေထောက်ခံမှုက အဓိကကျတယ်လို့မြင်မိကြောင်းဆိုပါတယ်။
“၃ နှစ်တာကာလအထိ ထောက်ခံမှုရနေတယ်ဆိုပေမယ့် ပြီးခဲ့တဲ့ ၃ နှစ်တာကာလအတွင်း NUG လုပ်ဆောင်မှုက ကျနော်မှ မဟုတ်ဘူး။တော်တော်များက လုံး၀အားမရဖြစ်နေကြတာ သိသာနေပါတယ်။ အမတ်ဆိုပီး ခံယူထားကြသူတွေအနေနဲ့ လုပ်သင့်တာတွေလုပ်ကြပါ။ ပြောသင့်ပြောကြပါလို့ အချောင်မလိုက်ကြဖို့ တိုက်တွန်းချင်ပါတယ်။” လို့ ဦးထွန်းထွန်းနိုင်က ပြောပါတယ်။
ရွေးကောက်ခံပြည်နယ်လွှတ်တော်ကိုယ်စားလှယ်ဦးထွန်းထွန်းနိုင်ဟာ သဘာဝဘေး စီမံပုဒ်မ ၂၅ ၊ နိုင်ငံတော်အကြည်ညိုပျက်စေမှု ပုဒ်မ ၅၀၅ (က)တို့နဲ့ ၂၀၂၁ ခုနှစ်မှာ တရားစွဲဆိုခံထားရတာပါ။
ဒါ့အပြင် ပြည်နယ်လွှတ်တော်ကိုယ်စားလှယ် ဦးထွန်းထွန်းနိုင်ရဲ့ နေအိမ်နဲ့ ညီမဖြစ်သူ နေအိမ်တို့ ဧပြီ ၉ ရက်နေ့ နံနက် ၁၀ နာရီ ၃၀ မိနစ်ခန့်က ချိပ်ပိတ်ခံရပြီး ပင်းတယမြို့နယ်မှာ နေအိမ်ချိပ်ပိတ်ခံရတဲ့ ဖြစ်စဉ်မှာ ပထမဦးဆုံးအကြိမ်ဖြစ်တယ်လို့ ဒေသခံတွေဆီက သိရပါတယ်။
CJ-012
