မဲခေါင်၊ ဒီဇင်ဘာ ၆

စစ်ရေးပြင်းထန်နေတဲ့ ကရင်နီပြည်နယ်ဘက်ကို စက်သုံးဆီ ဖြတ်တောက်ဖို့ စစ်ကောင်စီက ရှမ်းပြည်နယ်တောင်ပိုင်းရှိ ဓာတ်ဆီဆိုင်တွေကို ဆီအလုံအလောက်မချပေးတဲ့အပြင် ဂါလံပုံး၊ ပေပါလိုက်ရောင်းချတာတွေကိုပါ တားမြစ်ထားထားတယ်လို့ ဆီလုပ်ငန်းရှင်တွေဆီက သိရပါတယ်။

ကရင်နီပြည်နယ် လွိုင်ကော်မြို့ကို ဓာတ်ဆီသယ်ယူနေတဲ့ လမ်းကြောင်းတွေဖြစ်တဲ့ ပင်လောင်းနဲ့ ဆီဆိုင်မြို့က ဓာတ်ဆီဆိုင်တချို့ကို ဂါလံပုံးရော၊ ပေပါလိုက်ပါ ရောင်းချခြင်းမပြုဖို့ ခံဝန်ကတိထိုးခိုင်းပြီး ဖိအားပေးခဲ့တယ်လို့ သိရပါတယ်။

“လွိုင်ကော်ဖက်ကို ပို့မရအောင်လုပ်လိုက်တာပေါ့။ ထွေ/အုပ်ရုံးကို ဆိုင်ရှင်တွေကိုခေါ်ပြီး အတင်းလက်မှတ်ထိုးခိုင်းတာ။ ရှောင်တခင်စစ်လို့ ပါဆယ်ရောင်းတာမိရင် ဆိုင်ပိတ်ရမယ်တဲ့” လို့ စက်သုံးဆီလုပ်ငန်းရှင်နဲ့ နီးစပ်သူတစ်ဦးက ပြောပါတယ်။

ပြီးခဲ့တဲ့ ဒီဇင်ဘာ ၄ ရက်နေ့က တောင်ကြီး – လွိုင်ကော်သွားလမ်းပေါ်ရှိ ဆီဆိုင်မြို့နယ် ဆိုက်ခေါင်၊ နောင်မွန်၊ ဘန်းယဉ်တို့က စက်သုံးဆီဆိုင်ပိုင်ရှင်တွေကို မြို့နယ်ထွေအုပ်က ဆင့်ခေါ်ပြီး ပေပါ၊ ဂါလံပုံးတွေနဲ့ မရောင်းချဖို့ လက်မှတ်ထိုးခိုင်းခဲ့တာလို့ ဆိုပါတယ်။

ဒါ့အပြင် စစ်ကောင်စီက ဖယ်ခုံကနေတဆင့် ဓာတ်ဆီသယ်ယူလို့မရအောင်လည်း ပင်လောင်း၊ နောင်တရား၊ ဆောင်းပြောင်းမြို့တွေကိုပါ စက်သုံးဆီပြတ်လပ်အောင် ပြုလုပ်ခဲ့ပါတယ်။

ပင်လောင်း – ဖယ်ခုံ ကားသမားတစ်ဦးက “ ဓာတ်ဆီဆို ဘုန်းကြီးကားကိုတောင်မရှောင် အကုန်သိမ်းတယ်။ ဓာတ်ဆီ ကပြတ်သလောက်နီးပါးရှိနေပြီ။ ဆိုင်တွေကတော့ သူချိတ်နဲ့သူတော့ခွဲတမ်းနဲ့ရနေတဲ့သဘောပေါ့နော်။ ပင်လောင်းမှာဆိုရင် ဝိုင်းဆီဆိုင်မှာရတယ်။ ဒါမဲ့ အကန့်သတ်နဲ့ပဲ။ ရချင်တဲ့ရက်ပဲရတယ်။ အရင်နေ့တွေက ကားတစ်စီးကို ၁ သောင်း၊ ၂ သောင်းဖိုးပဲ ရောင်းပေးတယ်။ ဒီနေ့ကျ လုံးဝမရတော့ဘူး။ ကျနော်တို့တော့ နည်းလမ်းရှာနေရတယ်” လို့ ပြောပါတယ်။

စစ်ကောင်စီလက်အောက်ခံ စက်သုံးဆီတင်သွင်းသိုလှောင်ဖြန့်ဖြူးခြင်းလုပ်ငန်းကြီးကြပ်ရေးကော်မတီ (PPRD) က စက်သုံးဆီဆိုင်တွေကို ပါဆယ်မရောင်းနိုင်အောင် ဒီဇင်ဘာလ ၁ ရက်နေ့က စတင်ပြီး အကန့်အသတ်နဲ့ပဲ ရောင်းချပေးတာလို့ ဆိုပါတယ်။

ပင်လောင်း – ဖယ်ခုံကားလမ်းက စစ်ဆေးရေးဂိတ်တွေက ဆီပေပါတင်လာတဲ့ ကားသမားကို ထောင်ဒဏ် တစ်နှစ်ချမယ်လို့ ခြိမ်းခြောက်နေတယ်လို့ သိရပါတယ်။ မနေ့ ဒီဇင်ဘာ ၄ ရက်နေ့ ညနေပိုင်းကစပြီး တောင်ကြီးမြို့မှာလည်း 92 ဓာတ်ဆီပြတ်တောက်ခဲ့ရာကနေ ဒီနေ့ညနေပိုင်းမှာတော့ ပြန်ရနေပြီလို့ သိရပါတယ်။

လက်ရှိပင်လောင်းမြို့မှာ ဓာတ်ဆီ 92 တစ်လီတာကို ကျပ် ၅ ထောင်ပေါက်ဈေးရှိနေပြီး တော်လှန်ရေးတပ်တွေ အများစု ပေပါလိုက်မှာသုံးနေရတဲ့ လွိုင်ကော်မြို့မှာတော့ တစ်ပေပါကို ကျပ် ၅ သိန်းထိပေါက်တယ်လို့ သိရပါတယ်။

ကရင်နီပြည်နယ် ဒီးမော့ဆိုအနောက်ခြမ်းကိုပြန်ဖြန့်နေတဲ့ ဖယ်ခုံမြို့နယ်၊ ဆီးဘူးကဆိုင်တွေကတော့ တောင်ငူမြို့ကနေ မှောင်ခိုသယ်လာတာကြောင့် လွန်ခဲ့တဲ့ ၃ ရက်ကအထိ ဓာတ်ဆီတစ်လီတာကို ၃၆၀၀ သာရှိပါတယ်။ သို့သော်လည်း အနောက်ဘက်ခြမ်းဒေသတွေ ဖြစ်တဲ့ ဒီးမော့ဆိုမှာတော့ တစ်လီတာကို ၈ ထောင်အထိ ပြန်လည်ရောင်းချကြတယ်လို့ဆိုပါတယ်။

ထိုင်းနယ်စပ် မယ်စဲ့မြို့နယ်နဲ့ သတ္တုတူးဖော်ရေးလုပ်ငန်းရှိတဲ့ မော်ချီးဒေသမှာတော့ နောက်ထပ် ဈေး ၃ ဆလောက်မြင့်တယ်လို့ ကရင်နီဒေသခံတွေက ဆိုပါတယ်။

ဒါ့အပြင် PPRD နဲ့ မြန်မာနိုင်ငံစက်သုံးဆီတင်သွင်းရောင်းချဖြန့်ဖြူးရေးအသင်း(MPTA) က စစ်မှုထမ်းဟောင်းအရာရှိတွေ၊ သက်ဆိုင်ရာမြို့နယ်အလိုက် စရဖ (စစ်ဘက်ရေးရာလုံခြုံရေးအဖွဲ့)၊ စစစ (အထူးစုံစမ်းစစ်ဆေးရေးအဖွဲ့) တို့ကို အသေးစားစက်သုံးဆီဆိုင်ရှင်တွေက သူတို့တောင်းသမျှစာရင်း အကုန်ပို့ပေးနေရတယ်လို့ သိရပါတယ်။

“SME ဆီဆိုင်တွေအကုန်ပျားတုပ်နေတယ်။ တောင်းလိုက်တဲ့ စာရင်း စုံနေတာပဲ။ ကားရောက်ရှိကြောင်း သတင်းပို့ရတယ်။ MPTA နဲ့ PPRD က လူတွေရယ်၊ ဌာနဆိုင်ရာတွေက ကောင်တွေရယ်၊ အခုကသူတို့ခေတ်လေ” လို့ တောင်ကြီးမြို့ရှိ စက်သုံးဆီဆိုင်ပိုင်ရှင်တစ်ဦးက ပြောပါတယ်။

အာဏာသိမ်းပြီးနောက်မှာ စစ်ကောင်စီနဲ့ ဆီလုပ်ငန်းရှင်ကြီးတွေဖြစ်ကြတဲ့ BOC၊ DENKO တို့က လက်ဝါးကြီးအုပ်ထားတာကြောင့် အသေးစားစက်သုံးဆီလုပ်ငန်းရှင်တွေ ခွဲတမ်းအပြည့်အဝမရတာတွေရှိတဲ့အပြင် အခုလို ရောင်းချခွင့်ပါ ကန့်သတ်လာတဲ့အတွက် လုပ်ငန်းရှင်တွေအနေနဲ့ အခက်ခဲတွေရှိသလို မလိုအပ်ဘဲ ဆီဈေးနှုန်းတွေတက်စေတယ်လို့ ဆိုပါတယ်။

CJ-001

#MeKongNews

#ဓာတ်ဆီ

#ကရင်နီ

#ရှမ်းတောင်

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)