မဲခေါင်၊ နိုဝင်ဘာ ၁၄
ရှမ်းမြောက်တိုက်ပွဲတွေကြောင့် တရုတ်ဘက် လယ်ယာထွက်ကုန်များ ကျိုင်းတုံ၊မိုင်းလားဘက်က တင်ပို့ခဲ့ပေမယ့် ဆုံးရှုံးမှုတွေဖြစ်ပြီး ကုန်သွယ်မှု ရပ်တန့်ထားလိုက်ပြီလို့ နယ်စပ်ကုန်သည်များထံကသိရပါတယ်။
ပြီးခဲ့သည့်အောက်တိုဘာ (၂၇) ရက် ညီနောင်မဟာမိတ်တပ်ဖွဲ့တွေနဲ့ စစ်ကောင်စီတပ်တွေ တိုက်ပွဲအပြင်းအထန်ဖြစ်ပွားနေပြီး မူဆယ် ၁၀၅ မိုင်ကုန်သွယ်ရေးဇုံမှ ကုန်သွယ်ရေးပြတ်တောက်သွားကာ၊ အခြားနယ်စပ်လမ်ကြောင်းတွေကနေ တင်ပို့မှုပြုလုပ်နေပေမယ့် တွက်ခြေမကိုက်ဘူးလို့ ကုန်သည်များက ပြောပါတယ်။
“မန္တလေး ၊ ကျောက်ဆည် ၊ရွာငံဘက်ကနေတက်တာ၊ တောင်ကြီး၊ကျိုင်းတုံ၊ မိုင်းလားဘက်ကနေ ပို့တယ်၊ လယ်ယာထွက်ကုန်ဖြစ်တဲ့အတွက် ပုပ်သိုးလွယ်အသီးတွေဆိုတော့ ပယ်သီးကအရမ်းများတာ၊ လမ်းကပတ်သွားရတော့ အချိန်ကြာတော့ ပုပ်ကုန်တာ ဆုံးရှုံးမှုကကားတစ်စီးကို အခုက သိန်း၂၀၀ လောက်ကုန်တယ် တင်ပို့ဖို့က လုံးဝအဆင်မပြေတော့ဘူး” လို့ ဖရဲကုန်သည်တစ်ဦးကပြောပါတယ်။
ဒါအပြင် လမ်းခရီးကြာချိန်တွေကြောင့် ကုန်ကားတစ်စီးမှာ ၁၇ တန်နီးပါးကုန်စည်ပါရှိပေမယ့် အပယ်သီး ၁၂ တန် နီးပါးထွက်ရှိကာ ဆုံးရှုံးမှုတွေဖြစ်နေတယ်လို့ သိရပါတယ်။
စစ်ကောင်စီက အခုလို တရုတ်-မြန်မာ ကုန်သွယ်ရေးနှောင့်နှေးမှုတွေအတွက် မူဆယ် ၁၀၅ မိုင်ကုန်သွယ်ရေးဇုန်နဲ့ ချင်းရွှေဟော်ကုန်သွယ်ရေးစခန်းတို့မှ တစ်ဆင့် နယ်စပ်ကနေတင်ပို့ရန် ပို့ကုန်လိုင်စင် ခွင့်ပြုချက်ရထားပြီးတဲ့ပစ္စည်းတွေကို အခြားမည်သည့်နယ်စပ်ကမဆို တင်ပို့ခွင့်ပြုပြီး ပင်လယ်ရေကြောင်းမှလည်း တင်ပို့ခွင့်ပေးမယ်လို့ ထုတ်ပြန်ထားပါတယ်။
“မြဝတီ ကုန်သွယ်ရေးဇုံ တိုက်ပွဲဖြစ်တုန်းကလည်း ဒီလိုဘဲ နယ်စပ်အပေါက်ဘယ်ကမဆိုတင်သွင်းခွင့်ပေးတယ်ဆိုပြီး၊ တကယ်က စရိတ်စကထွက်ချက်ရတယ် ဘယ်လိုမှမကိုက်နိုင်ဘူး၊ ရက်ပိုင်းအတွင်းပို့ရမယ်ဟာ လချီစောင့်ဆိုင်းပို့လိုမှမရတာ၊ သယ်ယူပို့ဆောင်စရိတ်တွေက မကိုက်ဘူး ဒါကစိတ်ကူးယဉ်ဇတ်လမ်း သက်သက်ဘဲ ပို့ကုန် သွင်းကုန် လိုင်စင်သက်တမ်းဖြေလျော့ပေးတာမျိူးကမှ သက်ညှာရာကြပါတယ်” လို့ ပို့ကုန်လုပ်ငန်းရှင် တစ်ဦးကပြောပါတယ်။
လိုင်စင်ကြပြီးသား ကုန်စည်တွေကို ရက်အနည်းငယ်နောက်ဆုတ်ပေးခြင်း၊ လမ်းပန်းဆက်သွယ်ရေး ကောင်းတဲ့အထိ စောင့်ဆိုင်းပေးခြင်း၊ ကုန်သွယ်ရေးကန့်သတ်ချက် မူဝါဒတွေဖြေလျော့ပေးမှသာ အဆင်ပြေနိုင်မယ်လို့လည်း ကုန်သည်များကဆိုပါတယ်။
တရုတ်-မြန်မာ နယ်စပ်ကုန်သွယ်ရေး အဓိကလုပ်ဆောင်နေတဲ့ မူဆယ်နဲ့ ချင်းရွှေဟော်နယ်စပ်ကုန်သွယ်ရေးစခန်းတို့မှာ လက်ရှိအချိန်ထိ ကုန်သွယ်ရေး လုံးဝရပ်တန့်နေတာလည်း ဖြစ်ပါတယ်။
အခုဘဏ္ဍာနှစ် ဧပြီလမှ နိုဝင်ဘာလ ၃ ရက်အထိ လယ်ယာထွက်ကုန်တင်ပို့မှုမှ ကန်ဒေါ်လာ ၁ ဒသမ ၈၁ ဘီလီယံရရှိထားပြီး ရေထွက်ကုန်တင်ပို့မှုမှ ကန်ဒေါ်လာ ၃၇၅ ဒသမ ၁၄၄ သန်းရရှိထားတယ်လို့
စစ်ကောင်စီ လက်အောက်ခံ စီး/ကူး ဝန်ကြီးဌာနက ဖော်ပြထားတဲ့ စာရင်းတွေအရ သိရပါတယ်။
MK-006
#MeKongNews
#နယ်စပ်
#ကုန်သွယ်
#တရုတ်
#ဖရဲ
