စစ်တပ်အာဏာ ထပ်မသိမ်းရေးအဆို ထိုင်းပြည်ထဲရေးဝန်ကြီး မထောက်ခံ
မဲခေါင်၊ ဒီဇင်ဘာ ၁၀
လက်ရှိထိုင်းမှာ အာဏာရ ဖွေထိုင်းပါတီက တင်သွင်းတဲ့ စစ်တပ်အာဏာထပ်မသိမ်းရေးအဆိုကို လက်ရှိ ပြည်ထဲရေးဝန်ကြီးလည်းဖြစ် ၂၀၂၃ ခုနှစ်နောက်ပိုင်း ဒုဝန်ကြီးချုပ်ရာထူးလည်း ရယူထားသူ ဘမ်ဂျိုင်းထိုင်း ပါတီခေါင်းဆောင် အနူတင်က မထောက်ခံကြောင်း ထုတ်ဖော်ပြောဆိုသွားပါတယ်။
စစ်အာဏာသိမ်းမှု အများဆုံးနိုင်ငံတွေထဲက တစ်နိုင်ငံဖြစ်တဲ့ ထိုင်းမှာ လက်ရှိ ဝန်ကြီးချုပ်ဟောင်း သက်ဆင် ထူထောင်ခဲ့တဲ့ ဖွေထိုင်းပါတီဟာ ရှေးရိုးစွဲနဲ့ ဘုရင်၊ စစ်တပ်သစ္စာခံ ပါတီတွေနဲ့ မဟာမိတ်ဖွဲ့ပြီး တကယ်တမ်း မဲအနိုင်ရခဲ့တဲ့ Move Forward ပါတီကို အာဏာမရစေဖို့ ကန့်ကွက်ခဲ့ကြပြီးမှ အစိုးရသစ် ဖြစ်လာတာပါ။
ဒါပေမဲ့လည်း သက်ဆင်လက်ထက်နဲ့ တူမဖြစ်သူ ယင်းလတ် လက်ထက် ၂ ကြိမ်စလုံး စစ်အာဏာသိမ်းခဲ့မှုကြောင့် လက်ရှိ သက်ဆင်သမီး ပေထောင်တန် ဝန်ကြီးချုပ်ဖြစ်ချိန် ဖွေထိုင်းပါတီက ဖွဲ့စည်းပုံအခြေခံဥပဒေထဲမှာပါတဲ့ ကာကွယ်ရေးဝန်ကြီးဌာန အုပ်ချုပ်ရေးဥပဒေကို ပြင်ဆင်ပြီး စစ်တပ်က နောက်တစ်ဖန် အာဏာမသိမ်းရေးအဆို တင်ဖို့ စီစဥ်နေတာပါ။
စစ်ဗိုလ်ချုပ်တွေမှာ ရာဇဝတ်မှု မှတ်တမ်းမရှိရေး၊ အာဏာအသုံးချပြီး ကိုယ်ကျိုးစီးပွား ရှာဖွေမှု၊ မူးယစ်ဆေး၊ လူမှောင်ခို၊ သဘာ၀ရင်းမြစ်နဲ့ ပတ်ဝန်းကျင်အရေးတွေမှာ လွှမ်းမိုးမှု မရှိရေး၊ စစ်တပ် အဆင့်မြင့်ရာထူးတွေကို ဗိုလ်ချုပ်တွေက ခန့်အပ်နေတဲ့မူကိုပြင်ပြီး ဝန်ကြီးချုပ် (ပေထောင်တန်) ဥက္ကဌ လုပ်မယ့် ကာကွယ်ရေးကောင်စီကနေ တိုက်ရိုက်ခန့်အပ်ရေးဆိုတဲ့ အဆိုတွေကို ဇန်နဝါရီ ၁ ရက်နေ့ ပြည်သူ့ဆန္ဒခံယူပြီး လွှတ်တော်မှာ အဆိုတင်ဖို့ စီစဉ်နေခဲ့တာဖြစ်ပါတယ်။
အာဏာသိမ်းစစ်ခေါင်းဆောင် ပရာယွတ်လက်ထက်မှာ ဒုဝန်ကြီးချုပ်လုပ်ခဲ့သေးသလို ကျန်းမာရေးဝန်ကြီးလည်း တာဝန်ထမ်းခဲ့ဖူးတဲ့ အနူတင်က ဒီအဆိုနဲ့ပတ်သက်ပြီး “ ၁၉၉၁ ခုနှစ် စစ်အာဏာသိမ်းမှုအပါ အာဏာသိမ်းမှု ပေါင်းများစွာ အတွေ့အကြုံရှိပါတယ်။ တကယ်တမ်းက စစ်အာဏာသိမ်းမှုကို အခြေအနေ တချို့မှာ ရှောင်လွှဲနိုင်တာမို့ ခုလို အာဏာထပ်မသိမ်းရေးအဆိုကို မထောက်ခံပါဘူး။ မဲပေးမှာလည်း မဟုတ်ဘူး” လို့ ပြောသွားခဲ့ပါတယ်။
ကာကွယ်ရေးဝန်ကြီး ဖမ်သမ်ဝီချုင်ယာချိုင်ကလည်း လက်ရှိ အစိုးရနဲ့ ဒီအဆိုတင်သွင်းမှုကို စစ်တပ်ကိုယ်စားလှယ်တွေပါစေလွှတ်ပြီး ပူးပေါင်းဆောင်ရွက်မှာဖြစ်လို့ ဘာပြဿနာမှ မရှိပေမယ့် ဒီအဆိုဟာ ထိုင်းစစ်တပ်ရဲ့ အင်အားကို လျော့ပါးစေသလို အစိုးရနဲ့ လက်နက်ကိုင် စစ်တပ်အကြား ပဋိပက္ခကိုသာ ပိုဖြစ်စေနိုင်တာကြောင့် တုံ့ပြန်လာမှုတွေကို စောင့်ကြည့်ရမှာဖြစ်တယ်လို့ ပြောပါတယ်။
လက်ရှိမှာ စစ်တပ်က အာဏာသိမ်းဖို့လည်း အစီအစဉ်မရှိသလို နိုင်ငံရေးသမားတွေက စစ်တပ်အပေါ် အကျပ်ရိုက်မှုမလုပ်ရင် အာဏာသိမ်းမှုဆိုတာ ရှိလာမှာမဟုတ်ဘူးလို့ အနူတင်က ပြောဆိုသွားခဲ့ပါတယ်။
Ref: bangkokpost
MKF-001
#MeKongNews
