မဲခေါင်၊ ဇူလိုင် ၁၄
ဇူလိုင် ၁၃ ရက်နေ့ ထိုင်းလွှတ်တော်မှာ ဝန်ကြီးချုပ်အဖြစ် တစ်ဦးတည်း အဆိုပြု လျှောက်ထားသူ MFP ပါတီ ခေါင်းဆောင် ဖိထာလင်ဂျာရိုအန်နက် လိုအပ်တဲ့ မဲအရေအတွက် မရခဲ့မှု အပေါ် တွစ်တာမှာ ရိုင်းစိုင်းတဲ့ ဝမ်းမြောက် စာသား ရေးတင်ခဲ့တဲ့ ကမ္ဘောဒီးယား ဝန်ကြီးချုပ် အာဏာရှင် ဟွမ်ဆန်က သူ့မှတ်ချက်ဟာ ဖိထာကို မရည်ရွယ်ကြောင်းနဲ့ အဓိပ္ပါယ် အယူကောက် မလွဲကြဖို့ ပြန်လည် ဖြေရှင်း သွားခဲ့ပါတယ်။
ကမ္ဘောဒီးယားနိုင်ငံမှာလည်း ရွေးကောက်ပွဲ နီးလာပြီဖြစ်ပြီး အာဏာရှင်အဖြစ် နိုင်ငံကို နှစ်ပေါင်းများစွာ အုပ်ချုပ် နေတဲ့ ဟွမ်ဆန်ဟာ အတိုက်အခံပါတီ ခေါင်းဆောင်တွေကို ရက်စက်စွာ ခြိမ်းခြောက် ဖမ်းဆီးမှုတွေ လုပ်နေသူ ဖြစ်ပါတယ်။
ဖိထာ ဝန်ကြီးချုပ် မဲအလုံအလောက် မရတော့ ဟွမ်ဆန်က “ဝန်ကြီးချုပ် ဖြစ်ဖို့ ဖိထာ လုံလောက်တဲ့ မဲမရဘဲ ကျရှုံးမှုဟာ ကမ္ဘောဒီးယားက အဓိက အရိုင်းအစိုင်း အတိုက်အခံတွေအတွက် ကျရှုံးမှုပဲ” လို့ ရေးတင်ခဲ့တာ ဖြစ်ပါတယ်။
ဒီရေးသားမှုနဲ့ ပတ်သက်လို့ ကမ္ဘောဒီးယားနိုင်ငံမှာသာမက ထိုင်းနိုင်ငံသား အများစုကပါ ဟွမ်ဆန် ရဲ့ ရိုင်းစိုင်းတဲ့ မှတ်ချက်အပေါ် ဒေါသထွက် ပေါက်ကွဲပြီး တုံ့ပြန်မှုများစွာ ပြုလုပ်ခဲ့ကြပါတယ်။
ဇူလိုင် ၁၄ ရက်နေ့ မှာတော့ ဟွမ်ဆန်က “အခု ရက်စက်ရိုင်းစိုင်းတဲ့ အတိုက်အခံ အစုအဖွဲ့တွေရဲ့ မျှော်လင့်ချက်ဟာ ရေထဲ ဆားထည့်လိုက်သလို ပျော်ဝင်ပျောက်ကွယ်သွားရပါပြီ။ နိုင်ငံရေးကို နိုင်ငံရေး လမ်းစဉ်နဲ့ မလုပ်ဘဲ အစွန်းရောက်လမ်းစဉ်နဲ့ လုပ်ကြတဲ့ သူတွေကို ရည်ညွှန်းတာပါ။ ကမ္ဘောဒီးယားမှာရော ထိုင်းနိုင်ငံပါသွားပြီး ဒီအတိုက်အခံ အုပ်စုတွေက ဖိထာ နာမည် သုံးလို့ ကျွန်တော့်ကို တိုက်ခိုက်နေခဲ့တာ ထိုင်းရွေးကောက်ပွဲအပြီး ၂ လစလုံးပဲ။ သူတို့ကို ရည်ရွယ်တာပါ။ ဖိထာ ကိုရော၊ ထိုင်းနိုင်ငံ ပြည်တွင်းရေးကို ပါဝင်ပတ်သက် ပြောဆိုမှု မဟုတ်ပါဘူး။ ဖိထာ ဝန်ကြီးချုပ် ဖြစ်လာရင်လည်း ပူးပေါင်းဆောင်ရွက်သွားဖို့ ကျွန်တော်တို့ဘက်က အဆင်သင့် ပြင်ဆင်ထားတာပါ။ သူ့ကို ဆန့်ကျင်တာမဟုတ်ပါဘူး” လို့ ဖြေရှင်း ပြောကြားသွားခဲ့ပါတယ်။
MKF-001
#MekongNews
#ဝန်ကြီးချုပ်
#ဟွမ်ဆန်
#ဖိထာလင်ဂျာရိုအန်နက်
Ref:phnompenhpost