မဲခေါင်၊ ဇူလိုင် ၁၃
ဇူလိုင် ၁၃ ရက် ဒီနေ့မှာ ကျင်းပနေတဲ့ ထိုင်းလွှတ်တော် ဝန်ကြီးချုပ်သစ် မဲပေးရွေးချယ်မှုမှာ တစ်ဦးတည်း လျှောက်ထားသူ ရွေးကောက်ပွဲ အနိုင်ရပါတီ Move Forward Party (MFP) ရဲ့ ထိုင်းဘုရင်မိသားစု ဂုဏ်သရေ ညှိုးနွမ်းစေမှု ဥပဒေ ပုဒ်မ ၁၂၂ (The lese majeste law) ဖျက်သိမ်းရေး သို့မဟုတ် ပြင်ဆင်ရေး ကိစ္စအတွက် အတိုက်အခံပါတီတွေနဲ့ အချေအတင် ငြင်းခုန်ပြောဆို နေကြရပါတယ်။
MFP ပါတီ အထွေထွေ အတွင်းရေးမှူး ချိုင်တာဝပ်တူလာသွန်က “ဘုရင်စနစ် အဖွဲ့အစည်းဟာ လွှတ်တော်နဲ့ ဥပဒေ အထက်မှာ ရှိသင့်ပါသလား။ အဖွဲ့အစည်းတိုင်းဟာ ပါဝင်ပတ်သက်တဲ့ လူသားတွေနဲ့ပဲ သက်ဆိုင်တယ်။ သူတို့ဆီက လာတဲ့ သဘောတရားကပဲ ဥပဒေ တည်စေသင့်တယ်” လို့ တင်ပြ ပြောကြားခဲ့ပါတယ်။
ပြီးခဲ့တဲ့ရက်ကမှ နိုင်ငံရေး လောကက အနားယူပြီလို့ ပြောခဲ့တဲ့ ဝန်ကြီးချုပ်ဟောင်း ပရာယွတ်ပါတီ United Thai Nation Party လွှတ်တော်အမတ် ဆာထရာဆရီပန်က ချိုင်တာဝပ် အဆိုကို လက်မခံနိုင်ကြောင်း တုံ့ပြန်ခဲ့ပါတယ်။
“ဘုရင် ဂုဏ်သရေညှိုးနွမ်းမှု ဥပဒေ ဖျက်သိမ်းဖို့ MFP ရဲ့ အဆိုကို လက်မခံနိုင်ပါဘူး။ ထိုင်း ပြည်သူတွေရဲ့ နှလုံးသားတွေကို ချမနင်းဖို့ တောင်းပန်ပါတယ်။ လူပေါင်းများစွာဟာ ကိုယ့်ဘုရင်အတွက် အသေခံဖို့ အသင့်ပါပဲ။ ဥပဒေကို မပြင်ဖို့ ကျေးဇူးပြုပြီး တောင်းပန်ပါတယ်” လို့ သူကပြောသွားခဲ့တယ်။
စစ်တပ်ခန့်အထက်လွှတ်တော်အမတ် ခမ်နွန်းချစ်ဟီဆာမန် ကလည်း ဘုရင်မင်းမြတ်ရဲ့ ဂုဏ်သိက္ခာကို ထိခိုက်မယ်၊ ဘုရင်စနစ်ရဲ့ အကာအကွယ်အဆင့်ကို နိမ့်ကျစေလိမ့်မယ်၊ ပြစ်မှုကျူးလွန်သူတွေကို နောက်ဖေးတံခါးကနေ လွတ်ငြိမ်းခွင့် ပေးနေသလို ဖြစ်စေတယ်လို့ ထကန့်ကွက်ခဲ့တယ်။
ဘုရင့်သစ္စာတော်ခံ၊ ရှေးရိုးစွဲဝါဒီ လက်ကိုင်ထားတဲ့ ထိုင်းနိုင်ငံရဲ့ သက်တမ်းအရင့်ဆုံး Democrat Party လွှတ်တော် အမတ် ချိုင်ချနာဒါဒီချို ကလည်း “ဘာကြောင့် ဘုရင်မင်းမြတ်ကို အကာအကွယ်ပေးတဲ့ ဥပဒေကို ပယ်ဖျက်ချင်နေတာလဲ။ အဆုံးအထိ ဆန့်ကျင်သွားရပါလိမ့်မယ်။ MFP ပါတီဝင်တွေဟာ တောင်ပိုင်းခွဲထွက်ရေး တောင်းဆိုမှုတွေကိုလည်း ထောက်ခံအားပေးနေကြသူတွေ” လို့ ပြင်းပြင်းထန်ထန် ဝေဖန်သွားခဲ့ပါတယ်။
ဒီစွပ်စွဲချက်ကို ဖိထာ ကိုယ်တိုင်က လုံးဝမဟုတ်ကြောင်း၊ တောင်ပိုင်းခွဲထွက်ရေးကို သူတို့ပါတီ မထောက်ခံ ကြောင်းနဲ့ စက်တင်ဘာလမှာ ကုလသမဂ္ဂ အစည်းအဝေးကို နယူးယောက်မှာ လုပ်မှာဖြစ်လို့ ဝန်ကြီး ချုပ်ရွေးချယ်မှုကို အမြန်အတည်ပြုဖို့လိုကြောင်း၊ ထိုင်းနိုင်ငံသားများ အရေးဟာ စီးပွားရေးသာဖြစ်ပြီး စူပါပါဝါ နိုင်ငံကြီးတွေနဲ့ စီးပွာရေးချိန်ခွင်လျှာ မျှတရေးကို စောလျှင်စွာ လုပ်ဖို့ လိုအပ်နေပါတယ်လို့ ရှင်းလင်း ပြောဆိုပါတယ်။
ပါတီအထွေထွေအတွင်းရေးမှူး ချိုင်တာဝပ် ကလည်း “ဘုရင်ဂုဏ်သရေ ဥပဒေကို ပြင်ရင် အနာဂတ်အတွက် ချိန်ကိုက်ဗုံး တစ်လုံးလို ဖြစ်စေပါလိမ့်မယ်၊ ဒီဥပဒေကြောင့် ရာနဲ့ချီပြီး ဖမ်းဆီးထောင်ချခံထား ရတယ်။ ဥပဒေကို မျက်မှောက်မပြု၊ လွတ်လပ်စွာ ရေးသားဖော်ပြခွင့်ဆိုတဲ့ ဒီမိုကရေစီ စံနှုန်းကို ဖျက်ဆီးနေတဲ့ ဥပဒေသာ ဖြစ်တယ်” လို့ ထပ်ပြီး ရှင်းလင်းပြောဆိုခဲ့ပြန်ပါတယ်။
MKF-001
#MekongNews
#ဝန်ကြီးချုပ်
#လွှတ်တော်
#Move-Forward-Party
Ref: Khaosod
