မဲခေါင်၊ ဇူလိုင် ၁၄

ထိုင်းရွေးကောက်ပွဲမှာ အနိုင်ရပါတီ ခေါင်းဆောင် ဖိထာ ဝန်ကြီးချုပ် ဖြစ်ရေး ဇူလိုင် ၁၃ ရက်နေ့က မဲခွဲ ဆုံးဖြတ်မှုမှာ စစ်တပ်ခန့် အထက်လွှတ်တော် အမတ် အားလုံး နီးပါးက ကန့်ကွက်မဲ ပေးခဲ့ကြလို့ မဲမပြည့်ခဲ့မှု အပေါ် သမ်မာဆတ်တက္ကသိုလ် ကျောင်းသား အဖွဲ့အစည်းပေါင်း ၂၉ ခုက ပြင်းထန်စွာ ရှုတ်ချကြောင်း ပူးတွဲကြေညာချက် ထုတ်ပြန်လိုက်ပါတယ်။

MFP ပါတီခေါင်းဆောင် ဖိထာ ဝန်ကြီးချုပ် ဖြစ်ရေးအတွက် ပါတီ ၈ ခု မဟာမိတ်ဖွဲ့ပြီး မဲပေးမှုဟာ ၃၁၂ မဲရှိ ထားပြီးသား ဖြစ်ပေမယ့် ၃၇၆ မဲရမှ အနိုင်ရမှာဖြစ်လို့ မဲပေးရာမှာ စစ်တပ်ခန့် အထက်လွှတ်တော် အမတ် ၂၅၀ ထဲက ဖိထာကို ထောက်ခံမဲပေးသူ ၁၃ မဲသာပေးပြီး ဝိုင်းကန့်ကွက်ခဲ့လို့ ၃၂၄ မဲသာရပြီး မအောင်မြင်ဘဲ နောက်ထပ် မဲပေးမှုတွေ ထပ်လုပ်ရတော့မှာ ဖြစ်ပါတယ်။

အာဏာသိမ်း ထိုင်းစစ်တပ်ရဲ့ လွှတ်တော် သက်တမ်း ၂၀၁၇ မှာ စစ်တပ်ခန့် လွှတ်တော်အမတ် ၂၅၀ ကို အထက် လွှတ်တော်မှာ အခန့်သားထားရှိပြီး ပြည်သူလူထု မဲအများဆုံးပေးတဲ့ ကိုယ်စားလှယ်ကို ဝန်ကြီးချုပ် မဖြစ်အောင် ဝိုင်းကန့်ကွက်ခဲ့ကြမှုနဲ့ ပတ်သက်လို့ သမ်မာဆတ်တက္ကသိုလ် ကျောင်းကောင်စီ၊ ကျောင်းသား သမဂ္ဂ၊ အင်စတီကျု၊ ဌာန၊ ကောလိပ်နဲ့ ပရိုဂရမ် အဖွဲ့အစည်းပေါင်း ၂၉ ဖွဲ့က ရှုတ်ချခဲ့တာပါ။

ပြည်သူ့ဆန္ဒကို လက်နဲ့ချေမွခြင်း၊ တိုင်းပြည်တိုးတက်ရေး အတွက် ဒီမိုကရေစီ ပြောင်းလဲမှုကို ဖျက်လိုဖျက်ဆီး လုပ်ခြင်း၊ ပညာမဲ့ပြီး သူရဲဘောကြောင်ခြင်း၊ တစ်ကိုယ်ရေ စိတ်ဆန္ဒကို ပြည်သူ တစ်ရပ်လုံးရဲ့ ဆန္ဒကို မျက်ကွယ်ပြုပြီး နှောင့်ယှက်ခြင်းသာ ဖြစ်တယ်လို့ ပြင်းထန်တဲ့ စကားလုံးတွေသုံးပြီး ရှုတ်ချစာ ထုတ်ပြန်ခဲ့တာ ဖြစ်ပါတယ်။

တိုင်းပြည် တိုးတက်ဖို့၊ ပြည်သူလူထု ဘ၀ တိုးတက်ဖို့ အရေး အားလုံးက သူတို့ကိုယ်ပိုင် အခွင့်အရေး မဟုတ်ပါ ဘူး။ ဒီမိုကရေစီ အသိပညာ ခေါင်းပါးပြီး အလုပ်မဖြစ်တဲ့ အုပ်ချုပ်ရေး ယန္တရားကို အလုံးစုံ သိပါလျှက် တိုင်းပြည် တိုးတက်ဖို့ အဟန့်အတားပြုကြသူ လွှတ်တော်အမတ်တွေ အတွက် စကားလုံး မရှိတော့ပါဘူး။ ငြိမ်းချမ်းစွာနဲ့ မဲရုံတွေမှာ ဆန္ဒမဲပေးပြီး တိုင်းပြည်တိုးတက်ပြောင်းလဲဖို့ လုံလောက်တဲ့ မဲပေးခဲ့သူတွေ၊ ပြည်သူတွေ အားလုံး ဆန္ဒကို ဆန့်ကျင်တဲ့ ဒီလူတွေကို ကျောင်းသားထု ကိုယ်စား၊ မဲပေးသူအားလုံး ကိုယ်စား၊ ထိုင်းပြည်သူ တစ်ရပ်လုံး ကိုယ်စား ရှုတ်ချကြောင်း ပူးတွဲစာ ထုတ်ပြန်လိုက်ပါတယ်။ နောက်ဆုံးမှာ ပြည်သူတွေရဲ့ ငြိမ်းချမ်းစွာ မဲပေးခြင်းနဲ့ တိုင်းပြည်ပြောင်းလဲ တိုးတက်မှုကို မလုပ်နိုင်ရင် စိတ်ရှည်မှုတွေဟာလည်း အားလုံး ကုန်ဆုံးသွားပါပြီ။ လူတွေရဲ့ မျှော်လင့်ချက်တွေတိုင်း ဖျက်ဆီးခံနေရလို့ နောက်ဘာတွေ ဖြစ်လာမလဲ ဆိုတာ ကျွနှ်ပ်တို့လည်း မသိနိုင်တော့ပြီ” လို့ ထုတ်ပြန်သွားခဲ့ပါတယ်။

MKF-001

#MekongNews

#ဝန်ကြီးချုပ်

#သမ်မာဆတ်တက္ကသိုလ်

#ဖိထာလင်ဂျာရိုအန်နက်

Ref: The Reporters

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)