မဲခေါင်၊ စက်တင်ဘာ ၂၃

ကရင်နီပြည်နယ်၊ မယ်စဲ့၊ ဘောလခဲ၊ ဖား‌ဆောင်းမြို့နယ်ဘက်က စစ်ကောင်စီတပ်တွေကို လက်နက်နဲ့ ရိက္ခာ လာပို့တဲ့ စစ်ယာဥ်တန်းဟာ ကရင်နီ တော်လှန်ရေးတပ်ဖွဲ့တွေရဲ့ တိုက်ခိုက်မှုကြောင့် ဖရူဆိုမြို့နယ်ကို မကျော်နိုင်သေးဘူးလို့ ဒီးမော့ဆို PDF တွဲဖက်ပြန်ကြားရေး တာ၀န်ခံ ခွန်းဖရန့်စစ်က မဲခေါင်သတင်းဌာနကို ပြောပါတယ်။

မယ်စဲ့၊ ဘောလခဲနဲ့ ဖားဆောင်းမြို့နယ်တွေမှာ ကရင်နီ တော်လှန်ရေး အင်အားစုတွေ ၀ိုင်း၀န်း တိုက်ခိုက်မှုကြောင့် စစ်ကောင်စီတပ်တွေ ပိတ်မိနေပြီး လက်နက်နဲ့ ရိက္ခာ ပြတ်တောက်နေလို့ အခုလို စစ်ယာဥ်တန်းနဲ့ ထောက်ပို့ဖို့ ကြိုးစားနေတာလို့ ဆိုပါတယ်။

အဲဒီလို ပိတ်မိနေတဲ့ စစ်ကောင်စီတပ်တွေ အတွက် စစ်လက်နက် ခဲယမ်းနဲ့ ရိက္ခာတွေ ပို့ဆောင်နိုင်ဖို့ ဖရူဆိုမြို့နယ်ကို ဖြတ်ကျော်ဖို့ ကြိုးစားနေတဲ့ စစ်ကောင်စီတပ်နဲ့ ကရင်နီ တော်လှန်ရေးတပ်ဖွဲ့တို့ တိုက်ပွဲတွေ မကြာခဏ ဖြစ်နေတယ်လို့ ခွန်းဖရန့်စစ် ကပြောပါတယ်။

“ဘောလခဲ၊ ဖားဆောင်း၊ မယ်စဲ့ ဘက်ထိ ရောက်ဖို့ အတွက် ဖရူဆိုမြို့နယ်တို့ ဘာတို့ ဖြတ်ဖို့ လိုတဲ့အတွက်ကြောင့် ထိတွေ့မှုတော့ မကြာခဏ ဖြစ်တယ်။ အခြေအနေကတော့ အသေးစိတ် မပြောပြတော့ဘူး။ ယာဥ်တန်းကတော့ ဖြတ်လို့မရသေးဘူး။ ဖရူဆို ဘက်မှာပဲ ရှိသေးတယ်” လို့ သူကရှင်းပြပါတယ်။

လက်ရှိမှာတော့ ကားအစီးရေ ၃၀ ထက် မနည်း ပါ၀င်တဲ့ စစ်ကောင်စီ ထောက်ပို့ ယာဥ်တန်းဟာ ဖရူဆို-ဘောလခဲကြား၊ မော်ခရော် ရှေ့နဲ့ ထားလဲ ဒေသမှာ ရောက်ရှိနေပြီး ကရင်နီ တော်လှန်ရေးတပ်ဖွဲ့တွေနဲ့ တိုက်ပွဲတွေ ပြင်းထန်နေတယ်လို့ ဆိုပါတယ်။

စစ်ကောင်စီက တော်လှန်ရေးတပ်ဖွဲ့တွေ ထိန်းချုပ်ထားတဲ့ မယ်စဲ့၊ ဘောလခဲ၊ ဖားဆောင်းမြို့နယ်ဘက်တွေမှာ ပိတ်မိနေတဲ့ တပ်တွေကို အရင်က လေကြောင်းကနေ စစ်လက်နက် ရိက္ခာ ပို့ဆောင်ပေးခဲ့ပေမဲ့ လက်ရှိမှာတော့ ကားလမ်းကနေ စစ်ကားတွေနဲ့ ပို့ဆောင်ဖို့ ကြိုးစားနေတာ ဖြစ်ပါတယ်။

ဒီလို ကုန်းကြောင်းက ပို့ဆောင်ရာမှာ အရေးပါတဲ့ လမ်းဖြစ်တဲ့ လွိုင်ကော်-ဒီးမော့ဆို-ဖရူဆို ပြည်ထောင်စု လမ်းမကြီးကို ထိန်းချုပ်နိုင်ဖို့ စစ်ကောင်စီက ကြိုးစားနေတာကြောင့် အဆိုပါ လမ်းမကြီး တစ်လျှောက် တိုက်ပွဲတွေ ပြင်းထန်နေတာ ဖြစ်ပါတယ်။

စစ်တပ်အာဏာသိမ်းပြီးနောက် ဖြစ်ပွားခဲ့တဲ့ ကရင်နီပြည်နယ် တိုက်ပွဲတွေမှာ စစ်ကောင်စီဘက်က အထိနာကာ ပြည်နယ်ရဲ့ ၆၀ ရာခိုင်နှုန်းကျော်ကို တော်လှန်ရေး အင်အားစုတွေဘက်က ထိန်းချုပ်ထားပြီလို့ ကရင်နီပြည် ကြားကာလ အုပ်ချုပ်ရေး ကောင်စီ-IEC ဒုဥက္ကဌ၊ ကရင်နီ အမျိုးသားများ ကာကွယ်ရေးတပ်ဖွဲ့-KNDF ဥက္ကဌ ခွန်ဘီထူး က ပြောဆိုထားပါတယ်။

MK-007

#MeKongNews

#ဖရူဆိုမြို့နယ်

#KNDF

#IEC

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)