မဲခေါင်၊ ဇွန် ၁၉
ယနေ့တွင် အသက် ၈၁ နှစ် ပြည့်ပြီဖြစ်သည့် မတရား ဖမ်းဆီးထိန်းသိမ်းခံထားရသော လူထုခေါင်း ဆောင် ဒေါ်အောင်ဆန်းစုကြည်နှင့်တကွ နိုင်ငံရေးအကျဉ်းသား၊ အကျဉ်းသူများအားလုံး ခြွင်းချက်မရှိ ချက်ချင်းလွှတ်ရန် ရှမ်းတောင် အထူးတပ်ဖွဲ့ P.9720 က ရုပ်သံလွှင့်၍ တောင်းဆိုလိုက်သည်။
” ကျမတို့ အခု မတရားချုပ်နှောင်ခြင်း ခံထားရတဲ့ အမေစုဟာ ၈၁ နှစ် ရှိပါပြီ။ ကျမတို့ရဲ့ အမေစု ၈၁ နှစ် ရှိပြီ ဖြစ်တဲ့အတွက်ကြောင့်မို့ ထောင်နဲ့လည်း မထိုက်တန်တော့သလို၊ ထောင်မှာရှိလို့လည်း မသင့်တော် တော့ပါဘူး။ အဲဒါကြောင့် ကျမတို့ရဲ့ အမေစုကို အမြန်ဆုံးလွှတ်ပေးဖို့ တောင်းဆိုပါတယ် “ဟု P.9720 တပ်ဖွဲ့ခေါင်းဆောင်မနီနီက ယင်းရုပ်သံတွင် တောင်းဆိုထားသည်။
အလားတူ ယင်းတပ်ဖွဲ့မှ ရဲဘော်မောင်မောင်ကလည်း “အမေစု ၈၁ နှစ်ပြည့် မွေးနေ့ကစပြီး အမေစု အသက်ထက်ဆုံး အသက်ရာကျော် နေရပါစေ။ စစ်အစိုးရရဲ့ ချုပ်နှောင်မှုအောက်ကနေ အမြန်ဆုံး လွတ်မြောက်ပါစေလို့ ကျနော် ဆုမွန်ကောင်း တောင်းပေးလိုက်ပါတယ်”ဟု ပြောကြားခဲ့သည်။
မြန်မာ့နိုင်ငံရေးအကျဥ်းသားများအရေးဆောင်ရွက်နေသည့် Myanmar Prisons Witness (MPW) ကလည်း မတရား ဖမ်းဆီးထိန်းသိမ်းခံထားရသော လူထုခေါင်းဆောင် ဒေါ်အောင်ဆန်းစုကြည်နှင့်တကွ နိုင်ငံရေးအကျဉ်းသား၊ နိုင်ငံရေးအကျဉ်းသူများအားလုံး ခြွင်းချက်မရှိ ချက်ချင်းလွှတ်ရန် ယနေ့ တောင်းဆိုလိုက်သည်။
မြန်မာ့ဒီမိုကရေစီခေါင်းဆောင် ဒေါ်အောင်ဆန်းစုကြည်သည် ၂၀၂၁ ခုနှစ်၊ ဖေဖော်ဝါရီ ၁ ရက် စစ်အာဏာသိမ်းပြီးနောက်ပိုင်း စစ်ကောင်စီ၏ ဖမ်းဆီးထိန်းသိမ်းခြင်းကို ခံခဲ့ရပြီး အမှုပေါင်းများစွာဖြင့် တရားစွဲဆိုခြင်း ခံခဲ့ရသည်။
ဒေါ်အောင်ဆန်းစုကြည်သည် ရဟတ်ယာဉ်ငှားရမ်းမှု၊ အဂတိလိုက်စားမှု၊ ရွေးကောက်ပွဲမသမာမှု၊ နိုင်ငံတော်လျှို့ဝှက်ချက်အက်ဥပဒေ ချိုးဖောက်မှု၊ သဘာဝဘေးအန္တရာယ်ဆိုင်ရာ စီမံခန့်ခွဲမှုဥပဒေ၊ ဆက်သွယ်ရေးဥပဒေနှင့် ဆူပူအောင်လှုံ့ဆော်မှု စသည့် စွပ်စွဲချက်အမျိုးမျိုးဖြင့် အမှုပေါင်း ၁၉ မှုဖြင့် တရားစွဲဆိုခြင်း ခံခဲ့ရပြီး ထောင်ဒဏ် ၃၃ နှစ် အထိ ချမှတ်ခြင်း ခံခဲ့ရသည်။
ထိုထဲမှ လက်ကျန်ထောင်ဒဏ် ၂၇ နှစ်အနက် ပြီးခဲ့သည့် ဧပြီ ၃၀ ရက်တွင် ကျရောက်သော ကဆုန်လပြည့်နေ့ အထိမ်းအမှတ်အဖြစ် ပြစ်ဒဏ်၏ ခြောက်ပုံတစ်ပုံ လွတ်ငြိမ်းသက်သာခွင့်ကြောင့် ထောင်ဒဏ် ၁၈ နှစ်နှင့် ၉ လ ကျခံနေရဆဲဖြစ်သည်။
ယင်းနေ့တွင်ပင် တရုတ်နိုင်ငံခြားရေးဝန်ကြီးဌာန ပြောရေးဆိုခွင့်ရှိသူ လင်ကျန်းက ဒေါ်အောင်ဆန်းစုကြည်သည် တရုတ်နိုင်ငံ၏ “မိတ်ဆွေဟောင်း” တစ်ဦးဖြစ်ပြီး ၎င်း၏ အခြေအနေကို အမြဲမပြတ် အလေးထား စောင့်ကြည့်နေကြောင်း သတင်းစာရှင်းလင်းပွဲ၌ ပြောကြားခဲ့ပြီးနောက် ထိုနေ့ညပိုင်းတွင်ပင် ၎င်းအား ကျန်ရှိသည့် ပြစ်ဒဏ်များကို သတ်မှတ်ထားသည့် နေအိမ်၌ ဆက်လက်ကျခံစေရန် ပြောင်းလဲသတ်မှတ်ကြောင်း စစ်ကောင်စီကကြေညာခဲ့သည်။
သို့ရာတွင် ၎င်းအား ထိန်းသ်မ်းထားသည့်နေရာနှင့် သက်ရှိထင်ရှား ရှိ၊ မရှိကို စစ်ကောင်စီက အများပြည်သူအား ပွင့်လင်းမြင်သာစွာ ချပြနိုင်ခြင်း မရှိသေးသလို နိုင်ငံတကာသံတမန်များနှင့်လည်း တွေ့ဆုံခွင့် မပေးသေးပေ။
ထို့ကြောင့် ဒေါ်အောင်ဆန်းစုကြည် လွတ်မြောက်ရေးနှင့် သက်ရှိထင်ရှား ရှိ၊ မရှိကို သက်သေပြပေးရန် ၎င်း၏ သားဖြစ်သူ ကိုထိန်လင်း(ခ) ကင်မ်အဲရစ်နှင့်အတူ ပြည်ပရောက် မြန်မာနိုင်ငံသားများက Proof of life အစီအစဉ်ဖြင့် ကျယ်ကျယ်ပြန့်ပြန့် တောင်းဆိုနေကြသလို နိုင်ငံတကာသံတမန် အသိုင်းအဝိုင်းကလည်း ပွင့်လင်းမြင်သာစွာ ချပြရန် တိုက်တွန်းထားသည်။
ဒေါ်အောင်ဆန်းစုကြည်အပေါ် စွပ်စွဲချက်များသည် နိုင်ငံရေးအရ လုပ်ကြံဖန်တီးထားခြင်းသာ ဖြစ်သည်ဟု အပြည်ပြည်ဆိုင်ရာ လူ့အခွင့်အရေးအဖွဲ့အစည်းများနှင့် ကုလသမဂ္ဂတို့က ရှုတ်ချထားပြီး ၎င်းအား ချက်ချင်းနှင့် ခြွင်းချက်မရှိ ပြန်လည်လွှတ်ပေးရန် စဉ်ဆက်မပြတ် တောင်းဆိုနေကြဆဲ ဖြစ်သည်။
MPW ၏ စာရင်းကောက်ယူချက်များအရ ၂၀၂၁ ခုနှစ်၊ ဖေဖော်ဝါရီ ၁ ရက် စစ်အာဏာသိမ်းပြီးချိန်မှစ၍ ၂၀၂၆ ခုနှစ်၊ မေ ၃၁ ရက်အထိ မြန်မာနိုင်ငံတဝန်းလုံးရှိ အကျဉ်းထောင်ပေါင်း ၃၅ ခုမှ နိုင်ငံရေးအကျဉ်းသား ၂၈၂ ဦး ကျဆုံးခဲ့ပြီဟု ဆိုသည်။
ယင်းတို့မှာ ကျန်းမာရေးစောင့်ရှောက်မှု လုံလောက်စွာ မရရှိ၍ ကျဆုံးခဲ့ရသော နိုင်ငံရေး အကျဉ်း သားဦးရေမှာ ၁၄၈ ဦး၊ ညှင်းပန်းနှိပ်စက် သတ်ဖြတ်ခံရ၍ ကျဆုံးခဲ့ရသော နိုင်ငံရေးအကျဉ်းသားဦးရေမှာ ၇၁ ဦး၊ သဘာဝဘေးအန္တရာယ်ကြောင့် ကျဆုံးခဲ့ရသော နိုင်ငံရေးအကျဉ်းသားဦးရေမှာ ၅၉ ဦးနှင့် သေဒဏ်ကျခံခဲ့ရသော နိုင်ငံရေးအကျဉ်းသားမှာ ၄ ဦးအထိ ရှိခဲ့ပြီး ဖြစ်သည်ဟု ဆိုသည်။
#MeKongNews
#လူထုခေါင်းဆောင်
#ဒေါ်အောင်ဆန်းစုကြည်
#ရှမ်းတောင်
#အထူးတပ်ဖွဲ့
#တောင်းဆို
