မဲခေါင်၊ မေ ၂၀
ပြန်ပေးဆွဲငွေညှစ်မှု အပါအဝင် ပြစ်မှုများကျူးလွန်သူ ၅ ဦးကို ကိုယ်ပိုင်ဥပဒေဖြင့် တစ်သက်တစ်ကျွန်း အပါအဝင် ထောင်ဒဏ်အသီးသီး ချမှတ်ခဲ့သည်ဟု “ဝ”တပ်ဖွဲ့- UWSA က ကြေညာသည်။
ယင်းပြစ်ဒဏ်ချမှတ်ခံရသူ ၅ ဦးသည် ပြန်ပေးဆွဲငွေညှစ်မှု၊ လုယက်မှု၊ အာဏာအလွဲသုံးစားမှုနှင့် တရားမဝင် လက်နက်ကိုင်ဆောင်မှုတို့ဖြင့် တရားစွဲဆိုခံရကာ အပြစ်ပေးခံရခြင်း ဖြစ်ကြောင်း ထုတ်ပြန်ချက်တွင် ဖော်ပြသည်။
ပြစ်ဒဏ် ချမှတ်ခံရသူများအနက် ချန်ဆိုင်းနာဆိုသူသည် စစ်ပြေးအဖြစ် ပုန်းအောင်းနေစဉ် ကာလအတွင်း အာဏာအလွဲသုံးစားလုပ်၍ ပြန်ပေးဆွဲငွေညှစ်မှုများ အကြိမ်ကြိမ် ကျူးလွန်ခဲ့ပြီး၊ မော်တော်ယာဉ်များ လုယက်ရောင်းချကာ ငွေအမြောက်အများ ရယူခဲ့သဖြင့် ထောင်ဒဏ်တသက်တစ်ကျွန်း ချမှတ်ခဲ့သည်။
စန်းရှုဆိုသူသည် ရဲအဖြစ် အယောင်ဆောင်၍ ပြန်ပေးဆွဲ ငွေညှစ်မှုများ နှင့် အာဏာအလွဲသုံးစားအကြိမ်ကြိမ် ပြုလုပ်ခဲ့သဖြင့် ထောင်ဒဏ် ၁၆ နှစ်ချမှတ်ခဲ့သည်။
ထိုပြင် လျိုရှမ်ယွမ် ဆိုသူသည် တရားမဝင် သေနတ်ကိုင်ဆောင်မှုနှင့် ပြန်ပေးဆွဲမှု ကျူးလွန်ခဲ့သဖြင့် ထောင်ဒဏ် ၇ နှစ် ချမှတ်ခဲ့ပြီး လီဟောက်နှင့် ယန်ကျွင်းဆိုသူတို့သည် ပြန်ပေးဆွဲမှု ကျူးလွန်သဖြင့် ထောင်ဒဏ် ၅ နှစ်စီချမှတ်ခဲ့သည်ဟု UWSA က ထုတ်ပြန်သည်။
၎င်းတို့ ၅ ဦးကို UWSA ၏ ကိုယ်ပိုင်ဥပဒေဖြစ်သည့် “ဝ” ပြည် အခြေခံဥပဒေ နှင့် ရာဇဝတ်ဥပဒေများဖြင့် အရေးယူဆောင်ရွက်ခဲ့ခြင်း ဖြစ်ကြောင်း ထုတ်ပြန်ချက်တွင် ဖော်ပြသည်။
၎င်းတို့ ၅ ဦးကို “ဝ”ပြည်နယ် တရားရေးကော်မတီ၊ ပြည်သူ့အစိုးရရှေ့နေဌာနမှ တရားစွဲဆိုခဲ့ပြီး တရားသူကြီးအဖွဲ့ ဖွဲ့စည်းကာ အများပြည်သူရှေ့တွင် စစ်ဆေးကြားနာခဲ့ရာ အမှုအခြေအနေများမှာ ခိုင်လုံသဖြင့် တရားခံ ၅ ဦးလုံးကို သက်ဆိုင်ရာ ပြစ်ဒဏ်များ ချမှတ်ခဲ့ခြင်းဖြစ်သည်ဟု UWSA က ထုတ်ပြန်ချက်တွင် ပြောသည်။
UWSA အနေဖြင့် ရဲအယောင်ဆောင်ကာ ပြစ်မှုကျူးလွန်ခြင်း၊ အာဏာအလွဲသုံးစားမှု၊ ပြန်ပေးဆွဲငွေညှစ်မှုနှင့် တရားမဝင် လက်နက်ကိုင်ဆောင်မှုကဲ့သို့ လူမှုလုံခြုံရေးနှင့် တရားရေးယုံကြည်မှုကို ထိခိုက်စေသော အပြစ်များအား ဆက်လက် နှိမ်နင်းအရေးယူသွားမည်ဟုလည်း ထုတ်ပြန်ချက်တွင် ဖော်ပြသည်။
#MeKongNews
#ပြန်ပေးဆွဲ
#ငွေညှစ်မှု
#ထောင်ဒဏ်တစ်သက်
#UWSA
