မဲခေါင်၊ အောက်တိုဘာ ၂၂
UWSA ထိန်းချုပ် တရုတ်နယ်စပ် မုန်အားဂိတ် အဆင့်မြှင့်တင်မွမ်းမံရန် စီမံကိန်းများ စတင်မည်ဖြစ်သောကြောင့် နယ်စပ်ကုန်သွယ်ရေး လုပ်ငန်းများ ယာယီရပ်ဆိုင်းမည်ဖြစ်ကြောင်း WSTV က အောက်တိုဘာ ၂၀ ရက်စွဲနှင့် ထုတ်ပြန်ထားသည်။
ယင်းဆောက်လုပ်ရေး လုပ်ငန်းပြန်လည်ပြုပြင်အဆင့်မြှင့်တင်ခြင်းအား နိုဝင်ဘာ ၁ ရက်နေ့မှ စတင်ကာ ဆောင်ရွက်မည်ဖြစ်ပြီး နယ်စပ်ရေးရာ ကူးသန်းရောင်းဝယ်ရေးစင်တာကို ၃လခန့် ယာယီရပ်ဆိုင်းထားမည်ဖြစ်ကြောင်း သိရသည်။
ထုတ်ပြန်ချက်တွင် “ပြုပြင်မွမ်းမံချိန်ကာလအတွင်း နယ်စပ်ဒေသမှကူးသန်း ရောင်းဝယ်ရေး လုပ်ငန်းမှအပ၊ ကုန်စည်တိုက်မှ လူအဝင်အထွက်နှင့် ယာဉ်များ၊ စီးပွားရေး ကုန်စည်အကြီးစားများ သယ်ယူပို့ဆောင်ရေးလုပ်ငန်းများမှာ ပုံမှန်ဆက်လက်လုပ် ကိုင်သွားမည်ဖြစ်ပါသည်။ နယ်စပ်သူ/သားများ ကူးသန်းရောင်း ဝယ်ရေးလုပ်ငန်းနှင့် သက်ဆိုင်သည့် ဌာန၊ အဖွဲ့အစည်းများနှင့် ပုဂ္ဂိုလ်များသည် ၂၀၀ နံပါတ်လမ်းဘက်သို့ သတ်မှတ်ပေးထားသော နေရာတွင် သက်ဆိုင်ရာ လုပ်ငန်းစဉ်များကို ဆက်လက်ဆောင်ရွက်နိုင်ပါသည်”ဟု ဖော်ပြပါရှိကြောင်း “ဝ” ဒေသ သတင်းများဖော်ပြသည့် Wa News Land က ဖော်ပြထားသည်။
ပန်ဆန်း(မုန်အား) ဂိတ်သည် “ဝ” ဒေသရှိ တရုတ် နယ်စပ်ဂိတ်ကြီး ၄ ခုထဲမှ တစ်ခုအပါဖြစ်ပြီး ၁၀၂၇ စစ်ဆင်ရေး ဒုတိယလှိုင်း၌ တရုတ်ကုန်စည်များ တင်သွင်းခွင့် ကန့်သတ်ခံခဲ့ရသည့် နယ်စပ်ဂိတ်တစ်ခု ဖြစ်သည်။
လက်ရှိတွင် ယင်း မုန်အား(မုန်စီး)ဂိတ် ယာယီပိတ်ထားသော်လည်း ကျန်ဂိတ်များဖြစ်သည့် ဆောဖာ (ပန်ဝိုင်ဂိတ်)၊ မန်ခါး (နမ့်တစ်ဂိတ်) နဲ့ ယုံးဟော့ ဂိတ်တို့မှ ဖွင့်ထားပြီး မကြာခင်ကပင် တရုတ်ကုန်ပစ္စည်းများအနက် စစ်သုံးပစ္စည်းများမှအပ ကျန်ကုန်ပစ္စည်းများ ပြန်လည်သယ်ဆောင်ခွင့် ရရှိနေပြီဖြစ်သည်။
#MeKongNews
#မုန်အားဂိတ်
#ပန်ဆန်း
#UWSA
#တရုတ်နယ်စပ်
