မဲခေါင်၊ ဇန်နဝါရီ ၂၄
အင်းလေးပြည်သူ့ကာကွယ်ရေးတပ်ဖွဲ့တွေ အင်းလေးဒေသကိုစတင်အခြေချနေပြီဖြစ်ပြီး အတုအယောင်ရွေးကောက်ပွဲကို ပါဝင်ကူညီအားဖြည့်နေသူတွေကို ထိရောက်စွာအရေးယူမယ်လို့ ဒီနေ့မှာ အင်းလေးလူထုလှုပ်ရှားမှုအဖွဲ့တွေက ဒီနေ့ ဇန်နဝါရီ ၂၃ ရက်မှာ ထုတ်ပြန်တယ်။
၁၁.၁၁ စစ်ဆင်ရေးနဲ့အတူ လွိုင်ကော်မြို့ နေရာအများအပြားကို တော်လှန်ရေးတပ်ပေါင်းစုတွေ က ထိန်းချုပ်ထားနိုင်ပြီး စစ်ကောင်စီတပ်များဟာ စစ်စခန်းကြီးတွေကလွဲလို့ မည်သည့်နေရာမျှမနေရဲတော့ပဲ နေ့စဉ်လက်နက်တဖွဲဖွဲချနေပြီး စိတ်ဓတ်တွေလည်းအောက်ဆုံးကိုရောက်ရှိနေတယ်လို့ ထုတ်ပြန်ချက်မှာပါရှိပါတယ်။
မိုးဗြဲမြို့၊ ဆောင်ကမ်းလမ်းခွဲနဲ့ စက်တော်နေရာတွေကို တော်လှန်ရေးတပ်တွေက သိမ်းပိုက်နိုင်ခဲ့ပြီး ဖယ်ခုံမြို့ကိုလည်း ဝန်းရံပိတ်ဆို့ထားကြောင်း၊ ပြီးခဲ့တဲ့ ဒီဇင်ဘာ ၁၁ ရက်က ဖယ်ခုံအင်းအရှေ့ခြမ်း၊ ဆောင်နန်းခဲစခန်းကို သိမ်းယူလိုက်ပြီဖြစ်လို့ ညောင်ရွှေမြို့နယ်၊ တောင်ဘို့ကွဲ၊ ဟိုပန်နဲ့ ညောင်လေးပင်ရွာတွေ၊ ပင်လောင်းမြို့နယ် နမ့်တုတ်၊ ကုန်းသာနဲ့အိမ်မူရွာကို တော်လှန်ရေးတပ်တွေ ရောက်နေပြီဖြစ်လို့ အင်းလေးကာကွယ်ရေးပြည်သူ့တပ်ဖွဲ့တွေဟာ အင်းလေးဒေသကိုစတင် အခြေချနေပြီလို့ ထုတ်ပြန်ချက်က ဆိုပါတယ်။
ဒါ့အပြင် ပြီးခဲ့တဲ့ ဒီဇင်ဘာ ၁၈ ရက်ကစပြီး အင်းလေးတိုက်ခိုက်ရေးအထူးတပ်(ဓါးမကူး)တပ်တွေဟာ စစ်ကောင်စီရဲ့ အရေးပါတဲ့ အင်းပျူ ခေါင်းဆောင်နဲ့နောက်လိုက်တစ်ဦးကို ပျူအားကောင်းတဲ့ မင်းချောင်းရွာအနီးမှာ ပစ်ခတ်သတ်ဖြတ်နိုင်ခဲ့တာဖြစ်လို့ တော်လှန်ရေးဟာ အင်းမြောက်ခြမ်းနဲ့ ညောင်ရွှေမြို့ကိုလည်း လက်လမ်းမီတယ်ဆိုတာ ပြနေတယ်လို့ ဖော်ပြထားပါတယ်။
စစ်ရှုံးနေတဲ့ စစ်တပ်ဟာ လူမျိုးရေးပဋိပက္ခ ဖန်တီးဖို့ တော်လှန်ရေးတပ်တွေ ထီရီးစခန်းကိုတိုက်ရင် ရွာကိုမီးရှို့ရမယ်လို့သူ့တပ်တွေကို ညွန်ကြားထားပြီး PDF တွေက မီးရှိုှုတယ်လို့ ဝါဒဖြန့်ချိရေးလို့ပြင်ဆင်ထားတယ်လို့ဆိုပါတယ်။
ပအိုဝ်းလူမျိုးတွေရဲ့ အဆင့်အတန်း၊ ရပိုင်ခွင့်၊ အချုပ်အချာကို အစဉ်လေးစားလျက်ရှိပြီး ဖောက်ပြန်တဲ့ PNO အဖွဲ့အစည်းနဲ့ခွဲခြားရှုုမြင်သလို ရန်သူကောင်စီနဲ့ပူးပေါင်းပြီး လူထုအခက်အခဲဖြစ်အောင်စာရေရိက္ခာနဲ့ စက်သုံးဆီ ပိတ်ဆို့နေတာကိုလည်းပြင်းထန်စွာ ဆန့်ကျင်တယ်လို့ ပါရှိပါတယ်။
စစ်ကောင်စီရဲ့ တစ်ခုတည်းသော ထွက်ပေါက်ဖြစ်တဲ့ အတုအယောင်ရွေးကောက်ပွဲကို ပြင်းထန်စွာဆန့်ကျင်ပြီး ယင်းကို ပါဝင်ကူညီအားဖြည့်နေသူတွေကိုလည်း ထိရောက်စွာ အရေးယူမယ်လို့ ဆိုပါတယ်။
အုပ်ချုပ်ရေးမှူးတွေ၊ ရာအိမ်၊ ဆယ်အိမ်မှူးတွေ စစ်လက်အောက်ခံဝန်ထမ်းတွေ အမြန်ဆုံးအသိတရားရရန်နဲ့ ဆက်လက်လုပ်ဆောင်နေပါက ကိုယ့်လုပ်ရပ် ကိုယ်တာဝန်ခံကြရမယ်လို့လည်း သတိပေးထားပါတယ်။
ယင်းစာကို အင်းပြည်သူ့ကာကွယ်ရေးတပ်ဖွဲ့(PDF)၊ အင်းလေးဖက်ဒရယ်ဒီမိုကရေစီလှုပ်ရှားမှု((IFDM)၊ အင်းလေးအမျိုးသမီးသမဂ္ဂ((IWU)၊ မြို့နယ်ရပ်မိရပ်ဖ ကိုယ်စားလှယ်တွေက လက်မှတ်ထိုးထုတ်ပြန်ထားတာ ဖြစ်ပါတယ်။
MK – 012
#MeKongNews
#အင်းလေး
#စစ်ကောင်စီ
#သတိပေး
#အုပ်ချုပ်ရေးမှူး