မဲခေါင်၊ စက်တင်ဘာ ၃

တာချီလိတ်မြို့မှာ မူးယစ်ဆေးဝါးနဲ့ လက်နက်တွေ လက်ဝယ်တွေ့ရှိမှုနဲ့ ဖမ်းဆီး ထောင်ချခံရတဲ့ ရဲတပ်ဖွဲ့ဝင် ဗိုလ်လုံမြင့်ထွေးဟာ ဩဂုတ်လ ၂၉ ရက်က ပြန်လည်လွတ်မြောက်လာတယ်လို့ သတင်းရင်းမြစ်တွေထံကနေ စုံစမ်းသိရပါတယ်။

ဗိုလ်လုံမြင့်ထွေးဟာ ဩဂုတ်လ ၂၉ ရက်က ပြန်လည်လွတ်မြောက်လာပြီး ၃၀ ရက်နေ့မှာ အမှတ် ၁ တံတားကနေတဆင့် ချင်းရိုင်ကို သွားရောက်လည်ပတ်ခဲ့တယ်လို့ အမည်မဖော်လိုတဲ့ သတင်းရင်းမြစ်တစ်ဦးက မဲခေါင်ကို ပြောပါတယ်။

“ချင်းရိုင်ကို ဘာသွားလုပ်တာလဲတော့ မသိဘူး။ ဆေးသွားစစ်တာ ဖြစ်နိုင်တယ်လို့တော့ ပြောကြတယ်” သူက ပြောပါတယ်။

ထောင်ဒဏ်နှစ်ရှည်ချခံထားရတဲ့ ဗိုလ်လုံမြင့်ထွေးဟာ လွတ်ငြိမ်းချမ်းသာခွင့်နဲ့ ပြန်လည်လွတ်မြောက်လာတာမျိုးမဟုတ်ဘဲ အယူခံဝင်ပြီး အယူခံအောင်လို့ ပြန်လွတ်လာတာမျိုးဖြစ်မယ်လို့ တရားရေးနဲ့ နီးစပ်တဲ့ သတင်းရင်းမြစ်တစ်ဦးက သုံးသပ်ပါတယ်။

ဒီအရင်ကလည်း တာချီလိတ်မြို့မှာ လူသတ်မှုနဲ့ ဖမ်းဆီးခံထားရတဲ့ ဇွဲသာယာကမ်းခြေပိုင်ရှင် ဦးဇွဲလည်း ပြန်လည်လွတ်မြောက်ခဲ့ပါတယ်။

လူကုန်တားရဲတပ်ဖွဲ့ဝင်တစ်ဦးဖြစ်တဲ့ ဗိုလ်လုံမြင့်ထွေးကို ၂၀၂၂ ခုနှစ် ဒီဇင်ဘာလ ၁ ရက် ညပိုင်းက တာချီလိတ်မြို့က ကေတီဗီတစ်ခုမှာ ဖမ်းဆီးခံရတာဖြစ်ပြီး သူဖွင့်ထားတဲ့ Music Zone KTV ကိုလည်း စစ်တပ်က ဝင်ရောက်စီးနင်းရှာဖွေခဲ့တာ ဖြစ်ပါတယ်။ အဲဒီကေတီဗီမှာ ဝန်ထမ်းတစ်ချို့လည်း ဖမ်းဆီးခံရပြီး ဒေသအခေါ် ‘ခေး’လို့ ခေါ်တဲ့ မူးယစ်ဆေးတွေလည်း ဖမ်းဆီးရမိခဲ့ပါတယ်။

ဗိုလ်လုံမြင့်ထွေးဟာ တာချီလိတ်မြို့လောင်းကစားရုံဖွင့်လှစ်တာ၊ မူးယစ်ဆေးဝါးဖြန့်ဖြူးတာတွေနဲ့ ပတ်သက်ပြီး နာမည်ဆိုးထွက်နေသူတစ်ဦးလည်း ဖြစ်ပါတယ်။

MK – 004

#MeKongNews

#တာချီလိတ်

#ဗိုလ်လုံမြင့်ထွေး

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)