မဲခေါင်၊ ဇူလိုင် ၇
ရှမ်းပြည်နယ် တောင်ပိုင်း၊ ဖယ်ခုံမြို့နယ်၊ မိုးဗြဲမြို့၊ ဈေးကုန်းရပ်ကွက်မှာ အသက် ၁၇ နှစ်အရွယ် မိန်းကလေး တစ်ဦး ဒီကနေ့ ဇူလိုင်လ ၇ ရက်နေ့၊ မနက်ပိုင်းက နေအိမ်ခြံဝန်းအတွင်း သွားလာစဉ် မိုင်းနင်းမိလို့ ဒဏ်ရာ အပြင်းအထန် ရသွားတယ်လို့ ဒေသခံ တစ်ဦးက ပြောပါတယ်။
တိုက်ပွဲတွေ ဖြစ်ပွားနေတဲ့ မိုးဗြဲမြို့ပေါ်မှာ စစ်ကောင်စီတပ်က တစ်အိမ်တက်ဆင်း စစ်ကြောင်းထိုးရှင်းလင်း စခန်းချစဉ် မိုင်းထောင်ထားခဲ့တာဖြစ်ပြီး စစ်ကောင်စီ အထိုင်ချရာ လူနေအိမ်တွေရဲ့ အနီးတဝိုက်မှာ မိုင်းတွေ အများကြီး ထောင်ထားခဲ့တယ်လို့ ဆိုပါတယ်။
“ မနက် ၈ နာရီခွဲ လောက်မှာ ဖြစ်တာ။ ဖြစ်ပြီးတော့ ချက်ချင်းသွေးတွေနဲ့ လဲသွားတာ။ ဘယ်ကိုထိလည်းတော့ ကောင်းကောင်းမသိဘူး။ မိုင်းဆိုတော့ အနီးသွားမကြည့်ရဲကြဘူးလေ။ ထပ်ရှိနိုင်တယ်ဆိုပြီး အဝေးကပဲ ကြည့်နေကြတယ်။ လုံခြုံရေး ယူထားတဲ့ စကစတွေ ချက်ချင်း ရောက်လာတယ်။ သွားမကြည့်ကြတာ ကောင်းတယ်၊ မဟုတ်ရင် သံသယနဲ့ ခေါ်သွားကြမှာ” လို့ ဒေသခံ တစ်ဦးက ပြောပါတယ်။
မိုင်းနင်းမိတဲ့ မိန်းကလေးကို လွိုင်ကော်ဆေးရုံသို့ ပို့ဆောင်ထားပြီး ထိခိုက်မှုနဲ့ ဖြစ်စဉ် အသေးစိတ်ကို ဆက်လက် စုံစမ်းနေဆဲ ဖြစ်ပါတယ်။
လူဦးရေ ၂ သောင်းဝန်းကျင် နေထိုင်တဲ့ မိုးဗြဲမြို့က ဒေသခံ အများစု မြို့ကို စွန့်ခွာသွားပေမယ့် မြို့ခံတစ်ချို့ နေထိုင်နေဆဲ ဖြစ်ပြီး တိုက်ပွဲငြိမ်သက်ချိန် ရိက္ခာ ပြန်ယူသူတွေလည်း ရှိနေတယ်လို့ ဒေသခံတွေက ပြောပါတယ်။
လက်ရှိ မိုးဗြဲမြို့ခံတွေနဲ့ စစ်ဘေးရှောင် ပြည်သူတွေရဲ့ နေထိုင်သွားလာမှုကို စစ်ကောင်စီတပ်က စောင့်ကြည့်နေပြီး ရပ်ကွက်အတွင်း ဝင်ထွက်သွားလာခွင့် ပိတ်ပင်တားမြစ်တာတွေ ရှိတယ်လို့ သိရပါတယ်။
ပြီးခဲ့တဲ့ ရက်ပိုင်းတွေက စစ်ကောင်စီတပ်ရဲ့ ခွင့်ပြုချက်မရဘဲ အပြင်ထွက်လို့ ပစ်သတ်ခံရသူတွေ ရှိခဲ့ပေမယ့် အလောင်းကို ချက်ချင်း မြေမြှုပ်လိုက်တဲ့ အတွက် သေဆုံးသူ ဘယ်သူဆိုတာ မသိရဘူးလို့ ဒေသခံတွေက ပြောပါတယ်။
CJ-004
#MekongNews
#မိုးဗြဲမြို့
#မိုင်းနင်းမိ
#လွိုင်ကော်ဆေးရုံ
