မဲခေါင်၊ မတ် ၂၄
ရှမ်းပြည်တောင်ပိုင်း၊ ပင်လောင်းမြို့နယ်၊ နန်းတုတ်ကျေးရွာကို စစ်ကောင်စီက မတ်လ ၂၃ ရက် ညပိုင်းမှာ လက်နက်ကြီးနဲ့ပစ်ခတ်ခဲ့တယ်လို့ ဒေသခံတွေက မဲခေါင်ကို ပြောပါတယ်။
စစ်ကောင်စီရဲ့ ကလောအခြေစိုက် အမြောက်တပ်မ ၉၀၃ ရဲ့ ဖယ်ခုံ အခြေပြုလက်နက်ကြီးတပ်ကပစ်ခတ်တာဖြစ်ပြီး နန်းတုတ်ကျေးရွာအတွင်း မတ်လ ၂၃ရက် ည ၁၀ နာရီဝန်းကျင်မှာ လက်နက်ကြီး ၅ လုံးရွာအတွင်းကျရောက်ပေါက်ကွဲခဲ့တယ်လို့ ဒေသခံတစ်ဦးကပြောပါတယ်။
“လူတော့ အထိအခိုက်မရှိဘူး၊ ကံကောင်းတာ၊ ရှေ့ညက လေယာဉ်နဲ့လာကြဲလို့ အဲဆိုင် ထိခိုက်ပျက်သေးတယ်၊ ခုထပ်ထိတာ” လို့ သူကပြောပါတယ်။
လက်နက်ကြီးကျည် ၁ လုံးဟာ နန်းတုတ်ဈေး အရှေ့ဘက် ကုန်စုံဆိုင်(အိမ်ဆိုင်)အတွင်း ကျရောက်ပေါက်ကွဲခဲ့ပေမယ့် လူတွေမရှိလို့အိမ်ဆိုင်ပျက်စီးတာပဲ ရှိတယ်လို့သိရပါတယ်။
နန်းတုတ်ကျေးရွာကို စစ်ကောင်စီက လက်နက်ကြီးနဲ့ မြေပြင်တိုက်ပွဲမဖြစ်ဘဲ အကြောင်းမဲ့ပစ်ခတ်နေတာဟာ နေ့စဉ်နီးပါးရှိနေပြီး
မတ်လ ၂၂ရက် ညပိုင်းတွင်လည်း လေယာဉ်နဲ့ ဗုံးကြဲခဲ့တာကြောင့် ဆေးခန်းနဲ့ နေအိမ် ၆ အိမ်ပျက်စီးခဲ့တယ်လို့သိရပါတယ်။
ရှမ်းတောင်တော်လှန်ရေးတပ်ဖွဲ့ဝင်တွေပါဝင်နေတဲ့ ၁၁၁၁ စစ်ဆင်ရေးနောက်ပိုင်း သိမ်းပိုက်ရရှိခဲ့တဲ့ စခန်းတွေထဲမှာ ဖယ်ခုံမြို့နယ်ကစခန်း ၁၇ ခုအနက် တောင်မဲသင်း၊ နန်းဖာမူရွာတွေဟာ အခုပစ်ခံရတဲ့နန်းတုတ်ရွာအနားက ရွာတွေဖြစ်တယ်လို့ သိရပါတယ်။
မနေ့ မတ်လ၂၃ ရက်က ကြေညာတဲ့ ကရင်နီတော်လှန်ရေးတပ်ပေါင်းစုရဲ့ ကရင်နီပြည်စစ်ဆင်ရေးအခြေအနေကြေညာချက်မှာ ကရင်နီတော်လှန်ရေးတပ်ဖွဲ့တွေ ထိန်းချုပ်ထားတဲ့ မြို့တွေထဲမှာ ဖယ်ခုံ ပါသလို စစ်ကောင်စီကင်းစင်သွားတဲ့မြို့နယ်ထဲမှာ ဖယ်ခုံမြို့နယ်ပါတယ်ဖော်ပြထားပါတယ်။
MK – 012