မဲခေါင်၊ ဧပြီ ၂၅
ရှမ်းပြည်နယ် တောင်ပိုင်း၊ ပင်လောင်း-ဖယ်ခုံ တိုက်ပွဲတွေကြောင့် နေရပ်စွန့်ခွာ ထွက်ပြေးနေရတဲ့ စစ်ရှောင် ပြည်သူတွေကို PNO ပအိုဝ်းပြည်သူ့စစ်က နေရပ်ပြန်ပို့ပေးမယ်ဆိုပြီး မိုင်းရှင်းခ တစ်အိမ် အနည်းဆုံး ကျပ် ၅,၀၀၀ ကောက်သွားပေမဲ့ အခုထိ နေရပ် မပြန်ရသေးဘူးလို့ စစ်ရှောင် ပြည်သူ တစ်ဦးက မဲခေါင်သတင်းကို ပြောပါတယ်။
ပင်လောင်းဒေသ၊ တောင်မဲသင်းကျေးရွာက စစ်ရှောင် ပြည်သူတွေကို PNO က နေရပ် ပြန်ပို့ပေးမယ် ဆိုပြီး မိုင်းရှင်းခ အပြင် ဟင်းဖိုး တစ်အိမ် ကျပ် ၁,၀၀၀ ထပ်ကောက်သွား သေးတယ်လို့ ဒေသခံက ပြောပါတယ်။
“ကျွန်တော်က ပင်လောင်းဘက်က စစ်ဘေးရှောင် စခန်းကပါ။ PNO တွေ ကျွန်တော်တို့ ရွာပြန်ရ တော့မယ်ဆိုပြီး မိုင်းရှင်းပေးမယ်၊ ရှင်းခ တစ်အိမ် ၅,၀၀၀ အထက် လိုက်ကောက်တယ်။ တချို့ စခန်းတွေကို အကန့်သတ်မရှိ ကောက်တယ်။ သင်္ကြန် အတက်နေ့ကပေါ့။ ခုချိန်ထိ မပြန်ရတဲ့ အရေးထဲက တစ်အိမ် ၁,၀၀၀ ဆိုပြီး ဟင်းဖိုး ထပ်ကောက်တယ်ဗျာ။ စားဖို့နေရေး အရမ်းခက်ခဲတဲ့ ကြားကနေ၊ အဲ့တာကို အများပြည်သူကို သိစေချင်တယ်ဗျာ” လို့ သူကပြောပါတယ်။
PNO က မိုင်းရှင်းဖို့ ပစ္စည်းတွေ ဝယ်ရမယ်ဆိုပြီး စစ်ရှောင် ပြည်သူတွေဆီက ပိုက်ဆံ တစ်အိမ် ကျပ် ၅,၀၀၀ အထက် ကောက်သွားပေမဲ့ အကုန် နေရပ် ပြန်ရမယ်လို့ ပြောတာ မဟုတ်ဘဲ မဲနှိုက်ပြီး အိမ်ထောင်စု ၈ ခုသာ ပြန်ရမယ် ဆိုပြီး ထပ်မံ ပြောဆိုတယ်လို့ သူကပြောပါတယ်။
စစ်ရှောင် ပြည်သူတွေဟာ အဝတ်တစ်ထည် ကိုယ်တစ်ခုနဲ့ ပြေးလာရပြီး အလှူရှင်တွေ လှူဒါန်းမှုနဲ့ ရပ်တည် စားသောက်နေရတဲ့ အခြေအနေမှာ နေရပ်ပြန်ရမယ် ဆိုတာကြောင့် ချေးငှားပေါင်နှံ ပေးလိုက်ကြတာလို့ စစ်ရှောင် ပြည်သူတွေက ပြောပါတယ်။
ပအိုဝ်းဒေသမှာ သာမက မြန်မာနိုင်ငံတဝှမ်း PNO ပြည်သူ့စစ်ပိုင် စီးပွားရေး လုပ်ငန်းတွေ လက်ညှိုးထိုးမလွဲ ရှိနေပြီး ဒေသရဲ့ စီးပွားရေး တစ်ခုလုံးကို လက်ဝါးကြီး အုပ်ထားပေမဲ့ ပအိုဝ်း ပြည်သူတွေဆီက ကျည်ဖိုး၊ ရိက္ခာဖိုးတွေ သာမက ကားဘီးအခွန် ဆိုပြီးပါ တောင်းယူနေတယ်လို့ ဒေသခံ တစ်ဦးက ဆိုပါတယ်။
တောင်းတဲ့ ပိုက်ဆံ မပေးနိုင်ပါက သေနတ်ပြ ခြိမ်းခြောက်တာ၊ ရိုက်နှက်တာတွေ လုပ်လေ့ရှိတာကြောင့် ပေါင်နှံ ချေးငှား ပေးနေရတယ်လို့ ပအိုဝ်း ဒေသခံက ပြောပါတယ်။
လက်ရှိ စစ်ကောင်စီနဲ့ PNO ပြည်သူ့စစ်က ကရင်နီပြည်ထဲ ဝင်ရောက်ဖို့ ပင်လောင်း-ဖယ်ခုံ နယ်စပ်ကနေ စစ်ကြောင်းထိုးနေပြီး ဒေသခံတွေကို သတ်ဖြတ်တာ၊ ရွာတွေကို မီးရှို့တာကြောင့် ဒေသခံ ၆,၀၀၀ ကျော် ထွက်ပြေး နေရပါတယ်။
MK-007
#MeKongNews
#ပင်လောင်း #PNO #မိုင်းရှင်းခ