မဲခေါင်၊ ဇန်နဝါရီ ၂၀
တံတားနံရံ အက်ကွဲတာကြောင့် ဖြတ်သန်းသွားလာခွင့်ပိတ်ထားတဲ့ တာလေတံတားပေါ်ကနေ အိမ်စီးကားနဲ့ ၂၃တန်အောက်ယာဉ်တွေကို ဒီနေ့ ဇန်နဝါရီလ ၂၀ရက်က စပြီး ပြန်လည်ဖြတ်သန်းခွင့်ပြုနေပြီလို့ ဒေသခံတွေထံကနေ သိရပါတယ်။
နံရံအက်ကွဲနေတဲ့ တာလေတံတားပေါ်မှာ သစ်သားဘေလီတံတားတံစင်း ယာယီထိုးပြီး အဲဒီအပေါ်ကနေ ဖြတ်သန်းသွားလာခွင့် ပြုတာဖြစ်တယ်လို့ ဒေသခံတစ်ဦးက မဲခေါင်ကို ပြောပါတယ်။
“နံရံအက်နေတဲ့ တံတားကိုတော့ ကျောက်တွေဖြည့်နေတယ်။ ဘေလီတံတားကိုတော့ ကောင်းတဲ့ဘက်မှာ ပိုးထားတယ်။ အက်ကြောင်းထတဲ့ဘက်မှာ မထားဘူး” လို့ သူက ပြောပါတယ်။
မူလတံတားကို ပြုပြင်ပြီး ၂၃တန်အထက် ကုန်တင်ယာဉ်တွေပြန်လည်သွားလာနိုင်မယ့်ရက်ကိုတော့ အတိအကျမသိရသေးဘူးလို့ ဒေသခံတွေက ပြောပါတယ်။
တာချီလိတ်ဒေသခံတွေအနေနဲ့ တာလေတံတား ပြုပြင်နေစဉ်အတွင်း မိုင်းဖြတ်မြို့နဲ့ ကျိုင်းတုံမြို့တွေကို သွားလာဖို့အတွက် တာချီလိတ်မြို့ ပုံလို့ဘက်ကနေ မိုင်းဖြတ်မြို့ကို ပေါက်တဲ့ ဘူရှီးလမ်းကို အသုံးပြုကြတယ်လို့ တာချီလိတ်မ်ြို့ခံတွေက ပြောပါတယ်။
တာချီလိတ်မြို့နယ်နဲ့ မိုင်းဖြတ်၊ ကျိုင်းတုံ မြို့နယ်တွေကို သွားလာကုန်သွယ်ရာမှာ အဓိကအသုံးပြုရတဲ့ တာလေတံတားဇန်နဝါရီ ၁၈ရက် နေ့လည်ပိုင်းမှာ နံရံတွေအက်ကွဲတာကြောင့် ကုန်တင်ယာဉ်သွားလာမှုတွေ ယာယီပိတ်ပင်ခဲ့တာ ဖြစ်ပါတယ်။
MK – 004
#MeKongNews
#တာလေတံတား
#တာချီလိတ်