မဲခေါင်၊ စက်တင်ဘာ ၃
တာချီလိတ်မြို့၊ မယ်ခေါင်ရပ်ကွက်ထဲက နေအိမ်တစ်အိမ်မှာ အပျော်တမ်းကစားနေတဲ့ ဖဲဝိုင်းကို တာချီလိတ်မြို့မစခန်းမှူးကိုယ်တိုင် အရပ်ဝတ်နဲ့ ဝင်ဖမ်းတာကြောင့် ဖဲကစားနေသူ အမျိုးသား ၄ ဦး ဖမ်းဆီးခံရတယ်လို့ ရပ်ကွက်နေပြည်သူတွေထံကနေ သိရပါတယ်။
ဩဂုတ်လ ၃၁ရက် ညနေ ၃နာရီလောက်က ဝင်ရောက်ဖမ်းဆီးတာဖြစ်ပြီး ဖမ်းဆီးရာမှာ ရပ်ကွက်တာဝန်ရှိသူတွေလည်း မပါဘူးလို့ ဒေသခံတစ်ဦးပြောပါတယ်။
“ဖမ်းတာက သာမာန်တင်ဖမ်းတာနဲ့တူဘူး။ ဝင်စီးသလိုမျိုးပဲ။ ပတ်ဝန်းကျင်ကလူတွေတောင် လန့်ကုန်ကြတယ်။ တကယ်တော့ အဲဒီဖဲဝိုင်းက ၁၀ဘတ်၊ ဘတ် ၂၀ ရိုက်ကြတာပါ” လို့ သူက ပြောပါတယ်။
တာချီလိတ်မြို့မှာ လောင်းကစားဝိုင်းတွေ၊ လောင်းကစားရုံငယ်၊ ရုံကြီးကနေ ကာစီနိုရုံတွေအထိ လက်ညိုးထိုးမလွဲ ရှိနေချိန်မှာ ဒီလို အပျော်တမ်းဖဲဝိုင်းကို ဝင်ဖမ်းတာဟာ ရယ်စရာဖြစ်နေတယ်လို့ တာချီလိတ်မြို့ခံတစ်ဦးက မှတ်ချက်ပြုပါတယ်။
“ရဲတပ်ဖွဲ့ကြီးရဲ့ ရွပ်ရွပ်ချွံချွံ လမ်းဘေးအပျော်တမ်းဖဲဝိုင်း ဖမ်းဆီးမှုကြီးကို လေးစားပါတယ်ဗျာဆိုပြီး ပြောရမလိုဖြစ်နေတယ်။ အဲဒီလိုအပျော်တမ်းဖဲဝိုင်းတွေက တာချီလိတ်မှာ လမ်းတိုင်းနီးပါးရှိတယ်။ ခရိုင်ရဲရုံးဘေးမှာတင် ရှိတယ်ဗျာ။ ရဲတွေတောင်သွားသွားရိုက်သေးတယ်။ တကယ့်ဟာသပဲ” လို့ သူက ပြောပါတယ်။
တာချီလိတ်မြို့မှာ စစ်တပ်အာဏာသိမ်းပြီးနောက်ပိုင်း ဆိုင်ကယ်အပါအဝင် ပစ္စည်းခိုးခံရတာတွေ နေ့စဉ်လို ဖြစ်နေပြီး ပြန်ပေးဆွဲမှု၊ လုယက်မှုတွေလည်း ပေါ်ပေါ်တင်တင်ကို ဆက်တိုက်ဖြစ်ပွားနေပါတယ်။
ဒီလိုမှုခင်းတွေကို တာချီလိတ်အာဏာပိုင်တွေအနေနဲ့ တစ်မှုမျှ မကိုင်တွယ်နိုင်ဘဲ နိုင်ငံရေးမှုတွေနဲ့ မယောင်ရာဆီလူးတဲ့အမှုတွေကိုပဲ ဖမ်းဆီးနေတာတွေ့ရတယ်လို့ ဒေသခံတွေက ဝေဖန်နေပါတယ်။
MK – 004
#MeKongNews
#တာချီလိတ်
#ဖဲဝိုင်း