မဲခေါင်၊ နိုဝင်ဘာ ၁
ကော်သူးလေ အုပ်ချုပ်နယ်မြေ၊ ခလယ်လွီထူ (ညောင်လေးပင်) ခရိုင်မှာ စစ်ကောင်စီတပ်ရဲ့ လက်နက်ကြီး ပစ်ခတ်မှုကြောင့် အသက် ၅ နှစ်အောက် ကလေး ၂ ဦး အပါအဝင် အရပ်သား ၈ ဦး ထိခိုက်ဒဏ်ရာရခဲ့တယ်လို့ KNU က ဒီကနေ့ ထုတ်ပြန်ပါတယ်။
အောက်တိုဘာ ၃၀ ရက်နေ့ ညနေ ၃ နာရီခွဲမှာ စစ်ကောင်စီ ခလရ (၂၆၄) တပ်က သာယာကုန်းကနေပြီး ၁၂၀ မမ လက်နက်ကြီး ၂ လုံး ပစ်ခတ်ရာ တောင်ခင်ကျေးရွာထဲ ကျရောက် ပေါက်ကွဲပြီး မအိရွှေစင် ၁၃ နှစ်၊ မသွန်းရွှေစင် ၁၈ နှစ်၊ မသေးသေး ၅၅ နှစ်နဲ့ ဦးထွေးတင် ၅၈ နှစ်တို့ လက်နက်ကြီးကျည်စ ထိမှန် ဒဏ်ရာရခဲ့တယ်လို့ ဆိုပါတယ်။
ဒါ့အပြင် ဆောထိမြို့နယ် အုပ်ချုပ်နယ်မြေအတွင်း အဲဒီနေ့ ည ၈ နာရီကျော်ကနေ ၁၂ နာရီကျော်အထိ ခမရ (၂၀) ညောင်လေးပင်စခန်းကနေ ၁၂၂ မမ လက်နက်ကြီး၊ လေဆူမှန်တိုင်းကနေ ၈၁ မမ လက်နက်ကြီး စုစုပေါင်း ၁၉ လုံးကို ပစ်ခတ်ခဲ့တယ်လို့ ဖော်ြပပါတယ်။
အဲဒီ ပစ်ခတ်မှုကြောင့် ပျဉ်ရေကြီးကျေးရွာ၊ ဂွေးကုန်းကျေးရွာ၊ ရေဖြူကန်ကျေးရွာ၊ ကောက်မဲ့သူ ရာဘာခြံ၊ ညောင်ပင်ကြီးကျေးရွာနဲ့ မီးလောင်ကုန်းကျေးရွာတွေထဲ ကျရောက် ပေါက်ကွဲပြီး ရေဖြူကန်ကျေးရွာက မောင်မင်းခန့်ဇော် အသက် တစ်နှစ်ခွဲ၊ မယွန်းယွန်း ၃ နှစ်၊ မခင်မိုးဝေ ၂၈ နှစ်နဲ့ ဦးရန်ဝင်းအောင် ၂၇ တို့ ထိခိုက်ဒဏ်ရာ ရခဲ့တယ်လို့ သိရပါတယ်။
ခလယ်လွီထူခရိုင်၊ မုန်းမြို့နယ်မှာ စစ်ကောင်စီတပ်တွေရဲ့ လက်နက်ကြီး ပစ်ခတ်မှုတွေကြောင့် ပြည်သူ ၂,၅၀၀ ဝန်းကျင် စစ်ဘေးရှောင်နေရပြီး အရေးပေါ် လူသားချင်း စာနာထောက်ထားမှုဆိုင်ရာ အကူအညီတွေ လိုအပ်နေတယ်လို့ ကရင်အမျိုးသား အစည်းအရုံးက ထုတ်ပြန်ထားပါတယ်။
MK-009
