မဲခေါင်၊ မတ် ၂၁
နမ့်နိန်းရွာ လူအစုလိုက် အပြုံလိုက် သတ်ဖြတ်မှုဟာ လူသားမျိုးနွယ်အပေါ် ကျူးလွန်တဲ့ ရာဇဝတ်မှုနဲ့ စစ်ရာဇဝတ်မှုမြောက်ကြောင်း အတိအလင်း ပြောကြားလိုတယ်လို့ ကရင်နီ အရပ်ဘက်အဖွဲ့အစည်းတွေက မတ် ၂၀ ရက်နေ့မှာ ထုတ်ပြန်လိုက်ပါတယ်။
ပင်လောင်းမြို့နယ်၊ နမ့်နိန်းကျေးရွာရှိ ဘုန်းတော်ကြီးကျောင်းထဲမှာရှိတဲ့ သံဃာတော် ၃ ပါးနဲ့ အမျိုးသမီး တစ်ဦးအပါအဝင် စုစုပေါင်း ၂၂ ဦးကို စစ်ကောင်စီက လူသားမဆန်စွာ သတ်ဖြတ်ခဲ့တာကို ကရင်နီအရပ်ဘက်အဖွဲ့အစည်းတွေအနေနဲ့ အပြင်းအထန် ရှုတ်ချတယ်လို့ ဆိုပါတယ်။
ဒါ့အပြင် စစ်ကောင်စီရဲ့ လက်ရှိလုပ်ရပ်ဟာ လူမျိုးရေး၊ ဘာသာရေး၊ နယ်မြေ ပဋိပက္ခဖြစ်အောင် ရည်ရွယ်ချက်ရှိရှိ သွေးထိုးလှုံ့ဆော်နေတာဖြစ်တယ်လို့လည်း ထုတ်ပြန်ချက်မှာ ဖော်ပြထားပါတယ်။
ဒါကြောင့် ကရင်နီပြည်နယ်အတွင်း နဲ့ အခြား တိုင်းရင်းသား ညီနောင်များအနေနဲ့ စစ်ကောင်စီရဲ့ ထောင်ချောက်ထဲကို မဝင်ရောက်မိစေဖို့ အထူးသတိထားရမယ်လို့ ကရင်နီလူငယ်တစ်ဦးက တိုက်တွန်းထားပါတယ်။
“ပအိုဝ်းနဲ့ ကရင်နီဆိုတာ သမိုင်းကြောင်းအရ အတူတူဆင်းသက်လာတဲ့ မျိုးနွယ်စုညီအစ်ကိုဖြစ်တယ်။ သွေးချင်းရင်းနှီးမှုကို ရှိနေပြီးသား။ သွေးကွဲအောင် လုပ်နေတဲ့လူတွေကို ကျွန်တော်တို့ ရှုတ်ချဖို့လိုတယ်။ ထောက်ပြဖို့လိုတယ်”ဟု ထုတ်ပြန်ချက် တာဝန်ခံ ကရင်နီလူငယ်တစ်ဦးကပြောသည်။
စစ်ကောင်စီမှ ကရင်နီပြည် ရှမ်းပြည်နဲ့ မြန်မာနိုင်ငံမှာ ကျူးလွန်နေတဲ့ လူ့အခွင့်ရေး ချိုးဖောက်မှုများ လူသားမျိုးနွယ်အပေါ် ကျုးလွန်တဲ့ စစ်ရာဇဝတ်မှုများနဲ့ ပတ်သက်ပြီး တရားမျှတမှု ရရှိတဲ့အထိ အခြားညီနောင် တိုင်းရင်းသားများနဲ့အတူ ပြည်တွင်း ပြည်ပ ကရင်နီအဖွဲ့အစည်းများက ဆက်လက်ကြိုးပမ်းသွားမယ်လို့လည်း ပြောပါတယ်။
အဲ့ဒီထုတ်ပြန်ချက်ကို ကရင်နီပြည်တွင်း အရပ်ဘက်အဖွဲ့အစည်းတွေ၊ ကိုရီးယား ကရင်နီလူငယ်တွေနဲ့ စင်ကာပူရောက် ကရင်နီလူငယ်တွေပါဝင်တဲ့ ကရင်နီအရပ်ဘက်အဖွဲ့အစည်း ၁၈ ဖွဲ့က စုပေါင်းထုတ်ပြန်ထားတာဖြစ်ပါတယ်။
CJ – 002