မဲခေါင်၊ နိုဝင်ဘာ ၁

မြန်မာနိုင်ငံမှာ စစ်အာဏာသိမ်းပြီးနောက် ပြည်သူကို ပြန်လည်အကြမ်းဖက် သတ်ဖြတ်နေတဲ့ စစ်ကောင်စီရဲ့ တစ်ခုတည်းသော ပင်မထောက်တိုင်ဝင်ငွေရင်းမြစ်ဖြစ်တဲ့ မြန်မာ့ရေနံနှင့်သဘာဝဓာတ်ငွေ့လုပ်ငန်း (MOGE) ကို အမေရိကန်က ပိတ်ဆို့အရေးယူမှု စတင်ပြုလုပ်လိုက်ပြီဖြစ်ပါတယ်။

မြန်မာနိုင်ငံဆိုင်ရာ ကုလသမဂ္ဂလူ့အခွင့်အရေးအထူးကိုယ်စားလှယ် တွမ်အင်ဒရူးစ်က စစ်ကောင်စီဟာ MOGE ကနေ နှစ်စဉ်ရရှိနေတဲ့ ဒေါ်လာသန်း ရာချီကို လက်နက်တွေဝယ်ယူပြီး ပြည်သူကို ပြန်လည်အကြမ်းဖက်နေတာဖြစ်လို့ အမေရိကန်အနေနဲ့ ပိတ်ဆို့အရေးယူမှု လုပ်သင့်ကြောင်း တင်ပြခဲ့တာပါ။

အခု အရေးယူလိုက်ပြီဖြစ်တဲ့အတွက် တစ်ကမ္ဘာလုံးက ကျန်နိုင်ငံတွေပါ အမေရိကန်လမ်းစဉ်လိုက်ပြီး MOGE ကို ဝိုင်းဝန်းပိတ်ဆို့ အရေးယူကြမယ်လို့ မျှော်လင့်ကြောင်း ပြောသွားပါတယ်။

အမေရိကန် ဘဏ္ဍာရေးဌာနက အောက်တိုဘာ ၃၁ ရက်နေ့မှာ MOGE ကို ပစ်မှတ်ထားပိတ်ဆို့အရေးယူမှု စလုပ်ခဲ့ ကြောင်း ကြေညာတာဖြစ်ပြီး အပြည့်အ၀ ပိတ်ဆို့တာမဟုတ်ပေမယ့် ဘယ်အမေရိကန်နိုင်ငံသား၊ အဖွဲ့အစည်းမှ MOGE အတွက် ငွေကြေးဝန်ဆောင်မှုမပေးဖို့ ပိတ်ပင်လိုက်တာဖြစ်ပါတယ်။

ဒီဇင်ဘာ ၁၅ ရက်ကတည်းက စလို့ MOGE နဲ့ပတ်သက်တဲ့ အဓိကအရေးပါသူတွေကို ပစ်မှတ်ထား ပိတ်ဆို့အရေးယူမှု စလုပ်ခဲ့ပြီး အခုမှ MOGE တစ်ခုလုံးနဲ့ပတ်သက်တဲ့ ငွေကြေးဝန်ဆောင်မှုလုပ်ငန်း (ငွေချေးခြင်း၊ ဘဏ်စာရင်းဖွင့်ခြင်း၊ အာမခံ၊ ရင်းနှီးမြှုပ်နှံမှုနဲ့ တခြား)တွေမှာ ဘယ်အမေရိကန်နိုင်ငံသားကမှ ပါဝင်ကူညီခြင်းမလုပ်ရ၊ ချိုးဖောက်ခဲ့ရင် နိုင်ငံသားအဖြစ်မှ ပယ်ဖျက်ခံရမှု၊ ပြည်နှင်ဒဏ်ပေးမှု၊ အမေရိကန်ဘဏ်စနစ်ထဲက ထုတ်ပယ်မှု၊ အမေရိကန်တွေနဲ့ ကုန်သွယ်မှုနဲ့ ပိုင်ဆိုင်မှုတွေ သိမ်းဆည်းခံရမှုတွေ ပြုလုပ်မှာဖြစ်တယ်လို့ ထုတ်ပြန်ကြေညာသွားပါတယ်။

အမေရိကန်နိုင်ငံခြားရေးဝန်ကြီး အန်တိုနီဘလင်ကန်ကိုယ်တိုင်ကလည်း သီးခြားထုတ်ပြန်ချက်ထဲမှာ မိမိတို့ရဲ့ ပိတ်ဆို့အရေးယူမှုကို နိုင်ငံတိုင်းက နမူနာယူလိုက်ပါပြီး မြန်မာစစ်အာဏာရှင်ဆီ လက်နက်ခဲယမ်းတွေ၊ လေယာဉ် ဆီတွေ၊ ဝင်ငွေတွေမရောက်ဖို့ တာဝန်ယူကြစေချင်တယ်လို့ ထုတ်ပြန်သွားပါတယ်။

အမေရိကန်ရဲ့ အခုပိတ်ဆို့ အရေးယူမှုနဲ့တစ်ပြိုင်နက် ကနေဒါနဲ့ ဗြိတိန်ကလည်း စစ်ကောင်စီနဲ့ပတ်သက်တဲ့ ထပ်တိုးအရေးယူမှုတွေကို ထုတ်ပြန်ခဲ့ကြပါတယ်။

ဒီနှစ်နိုင်ငံကတော့ MOGE လို့ ခေါင်းစဉ်မတပ်ခဲ့ပေမယ့် ဗြိတိန်က လူ ၅ ယောက်နဲ့ အဖွဲ့ အစည်းတစ်ခုကို ပိတ်ဆို့အရေးယူကြောင်း၊ ကနေဒါက လူ ၃၉ ယောက်နဲ့ အဖွဲ့အစည်းသို့မဟုတ် ကုမ္ပဏီ ၂၂ ခုကို စစ်ကောင်စီအားပေးထောက်ခံမှုနဲ့ ပိတ်ဆို့အရေးယူကြောင်း ထုတ်ပြန်ကြေညာခဲ့ပါတယ်။

ဒီထုတ်ပြန်မှုနဲ့ပတ်သက်လို့ ဝါရှင်တန်မှာရှိတဲ့ စစ်ကောင်စီမြန်မာသံရုံး၊ MOGE နဲ့ ဖေဖော်ဝါရီလက ရှယ်ယာ ခေါ်ရာမှာ MOGE ရှယ်ယာတွေကိုပါ ထည့်သွင်းထားတဲ့ အမေရိကန်ရဲ့ အကြီးဆုံး စွမ်းအင် ကုမ္ပဏီကြီး Chevron တို့က တစ်စုံတစ်ရာ တုံ့ပြန်ဖြေကြားခြင်းမရှိဘူးလို့ ရိုက်တာသတင်းဌာနက ဖော်ပြသွားပါတယ်။

အမေရိကန်ဟာ ဒီအရေးယူမှုမတိုင်ခင်ဇွန်လက မြန်မာစစ်ကောင်စီရဲ့ နိုင်ငံခြားဝင်ငွေအဓိက ချုပ်ကိုင်ရာ မြန်မာ့နိုင်ငံခြားကုန်သွယ်မှုဘဏ် (MFTB) နဲ့ မြန်မာ့ရင်းနှီးမြှုပ်နှံမှုနှင့် ကူးသန်းရောင်းဝယ်ရေးဘဏ် (MICB) တို့ကို ပိတ်ဆို့အရေးယူမှုတွေ လုပ်ခဲ့ပါ သေးတယ်။

Ref:Reuter
MKF-001

#MeKongNews

#MOGE

#စစ်ကောင်စီ

#အမေရိကန်

#ပိတ်ဆို့

#စွမ်းအင်

#ဝင်ငွေ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)