မဲခေါင်၊ ဇန်နဝါရီ ၃၁
ဒီပဲယင်း၊ ရုံးသာရွာမှာတပ်စွဲထားတဲ့ မော်လိုက်အခြေစိုက် ခမရ ၃၆၄ တပ်နဲ့ မှော်ဘီ အခြေစိုက် ခလရ ၇၀၁ စစ်ကောင်စီစစ်ကြောင်းတွေဟာ ရွှေဘိုမြို့နယ်ထဲက ကျေးရွာ ၃ ခုကို ဇန်နဝါရီလ ၃၀ နဲ့ ဒီကနေ့ ၃၁ ရက်နေ့တို့မှာ မီးရှို့သွားခဲ့တယ်လို့ ဒေသခံတွေက မဲခေါင်သတင်းကို ပြောပါတယ်။
ဒီနေ့မနက်ပိုင်း ၈ နာရီဝန်းကျင်မှာ စိုင်ဒိုးရွာထဲက အင်အား ၂၀၀ ဝန်းကျင်လောက်ရှိတဲ့ စစ်တပ်နဲ့ ပျူစောထီးအဖွဲ့ဝင်တွေဟာ အိမ်ခြေ ၁,၀၀၀ ဝန်းကျင်ရှိတဲ့ သရက်ပင်ဝန်းကျေးရွာကို ရောက်ရှိပြီးမီးရှို့ နေတယ်လို့ သိရပါတယ်။
မနေ့က ဇန်နဝါရီ ၃၀ ရက်နေ့မှာ ရွှေဘိုနယ် မအူပင်ရွာကို ဝင်ရောက်မီးရှို့ခဲ့ပြီး အဲ့ဒီကတဆင့် အင်ကြင်းရွာနဲ့ စိုင်ဒိုးရွာကို မီးရှို့ခဲ့ကာ စိုင်ဒိုးရွာထဲက နွားတွေကိုဆွဲပြီး ပစ္စည်းတွေကိုလည်း သယ်ယူသွားတယ်လို့ သိရပါတယ်။
“အိမ်တွေကို အကြောင်းမဲ့မီးရှို့သွားတယ်။ ခွေးအင်အားအများအပြားနဲ့ ကာကွယ်ရေးတပ်တွေနဲ့ တိုက်ပွဲလည်းမရှိ၊ မိုင်းဆွဲခြင်းမရှိဘဲ ဝင်ရောက်ခြင်းဖြစ်တယ်” လို့ ဒေသခံတစ်ဦးက ပြောပြပါတယ်။
ရွှေဘိုနယ်အတွင်းမှာ မနေ့ကနဲ့ ဒီနေ့ ၂ရက်အတွင်း ကျေးရွာ ၃ရွာမီးရှို့ခံထားရပြီး ဒေသခံပြည်သူ ၃,၀၀၀ ဝန်းကျင် နေရပ်စွန့်ခွာထွက်ပြေးတိမ်းရှောင်နေကြရတာကြောင့် စားနပ်ရိက္ခာနဲ့ နေစရာအခက်တွေ့နေကြရတယ်လို့ ရွှေဘိုအခြေစိုက် ပြည်သူ့ ကာကွယ်ရေးတပ်ဖွဲ့ဝင်တစ်ဦးက ပြောပြပါတယ်။
စစ်ကောင်စီတပ်ရဲ့ မီးရှို့ခံရမှုကြောင့် မအူပင်ရွာထဲက အိမ်ခြေ ရာနဲ့ချီ ပျက်စီးဆုံးရှုံးခဲ့ရပြီး စိုင်ဒိုးနဲ့ ဒီနေ့မီးရှို့ခံရတဲ့ သရက်ပင်ဝန်း ကျေးရွာ မီးလောင်အိမ်ခြေတွေကိုတော့ စစ်ကြောင်းရှိနေဆဲဖြစ်တာကြောင့် မသိရသေးဘူးလို့ ဆိုပါတယ်။
စစ်ကိုင်းတိုင်း၊ ဒီပဲယင်းမြို့နယ်ထဲက ကျေးရွာတွေကို လှည့်ပတ်မီးရှို့နေတဲ့ အဲဒီစစ်ကောင်စီတပ်နဲ့ ပျူစောထီးအဖွဲ့ဝင်တွေပါတဲ့ စစ်ကြောင်းဟာ ရွှေဘိုနယ်ထဲကို ဆက်လက်ဝင်ရောက်ပြီး ကျေးရွာတွေကို လှည့်လည်မီးရှို့နေတာလို့ သိရပါတယ်။
စစ်တပ်အာဏာသိမ်းပြီးနောက်ပိုင်း ၂၀၂၂ ခုနှစ်၊ ဒီဇင်ဘာ ၃၁ ရက်နေ့ထိ စစ်ကောင်စီတပ်နဲ့ ပျူစောထီးလက်အောက်ခံတပ်ဖွဲ့ဝင်တွေ မီးရှို့ဖျက်ဆီးမှုကြောင့် မြန်မာနိုင်ငံမှာ အရပ်သားပြည်သူနေအိမ် ၄၈,၄၆၃ လုံး မီးရှို့ဖျက်ဆီးခံထားရပြီး စစ်ကိုင်းတိုင်းထဲက နေအိမ် ၃၆,၆၆၇ လုံး ပါဝင်ခဲ့တယ်လို့ မြန်မာနိုင်ငံထဲက နေအိမ်မီးရှို့ခံရမှုအချက်အလက်တွေကို စာရင်းကောက်ယူနေတဲ့ Data For Myanmar က ထုတ်ပြန်ထားပါတယ်။
MK – 009
ဓာတ်ပုံ – Shwe Bo Local People Defense Force
