မဲခေါင်၊ သြဂုတ် ၁၈
ရှမ်းပြည်နယ် မြောက်ပိုင်း၊ ကွတ်ခိုင်မြို့နယ်၊ မိုင်းယုလေးရွာ အနီးမှာ ဩဂုတ်လ ၁၇ ရက်နေ့၊ မွန်းလွဲ ၁ နာရီခန့်က စစ်ကောင်စီတပ်နဲ့ TNLA တိုက်ပွဲဖြစ်ပွား ခဲ့တယ်လို့ PSLF/TNLA ပြန်ကြားရေးဌာနက ထုတ်ပြန်ပါတယ်။
ယမန်နေ့ မွန်းလွဲ ၁ နာရီ ကျော်ခန့်ကနေ ၂ နာရီ ခွဲခန့်အထိ တိုက်ပွဲ ပြင်းထန်ခဲ့ပြီး နမ့်ဖက်ကာ အခြေစိုက် ခမရ (၁၂၃) စစ်ကောင်စီတပ် ကနေ လက်နက်ကြီး ပစ်ကူခဲ့တယ်လို့ ဆိုပါတယ်။
“ TNLA နဲ့ စစ်ကောင်စီ ပြန်ဖြစ်တာ” လို့ ဒေသခံ တစ်ဦးက ပြောပါတယ်။
ကွတ်ခိုင်နဲ့ နမ့်ဖတ်ကာကြားရှိ မန်လွယ်၊ နမ့်ဖလွန်တောင် ဒေသမှာ လက်နက်ကြီး ပစ်ခတ်သံတွေ ကြားရတယ်လို့ သူက ပြောပါတယ်။
ယမန်နေ့ မနက် ၈ နာရီခွဲခန့်က ကွတ်ခိုင် အခြေစိုက် ခလ၇ (၂၄၁) နဲ့ (၂၄၂) ကနေ စစ်ကား ၁၀ စီးခန့်၊ ခန့်မှန်း အင်အား ၂၀၀ ဝန်းကျင်နဲ့ ကွတ်ခိုင်မြို့ကနေ မူဆယ်ဘက်သို့ ဦးတည် ထွက်ခွာသွားတယ်လို့ ကွတ်ခိုင် ဒေသခံတွေက ပြောပါတယ်။
အရှေ့မြောက် ကုန်သွယ်ရာ လမ်းမ၊ ကွတ်ခိုင် ရင်ကွဲတောင်ကနေ မိုင်းယုလေးရွာဘက် စစ်ကြောင်းထိုးလာတဲ့ စစ်ကောင်စီတပ်ဖွဲ့နဲ့ TNLA တပ်မဟာ (၁)၊ တပ်ရင်း (၈၇၆) တို့ တိုက်ပွဲ ဖြစ်ပွားတာလို့ PSLF/TNLA သတင်းနဲ့ ပြန်ကြားရေးဌာနက ဆိုပါတယ်။
ဩဂုတ်လ ၁၆ ရက်နေ့ကလည်း မူဆယ်-နမ့်ခမ်းကြား၊ ကားလမ်းမပေါ်ရှိ နောင်ဆိုင်ရွာမှာ စစ်ကောင်စီတပ်တွေ လှုပ်ရှားနေ သလို TNLA တပ်က ကိုင်းတော်ရွာဘက်မှာ လှုပ်ရှားနေတာကြောင့် စစ်ရေး တင်းမာခဲ့ပြီး လမ်းသွား လမ်းလာ ပြည်သူတွေကို ၂ ဖက်အဖွဲ့က စစ်ဆေးနေလို့ လမ်းပိတ်ဆို့မှု ဖြစ်ခဲ့ပါသေးတယ်။
စစ်ကောင်စီတပ် နဲ့ TNLA တို့ ဇူလိုင်လ ၂၃ ရက်နေ့ကစပြီး ယမန်နေ့ သြဂုတ်လ ၁၇ ရက်နေ့အထိ စုစုပေါင်း တိုက်ပွဲ ၁၃ ကြိမ် ဖြစ်ပွားခဲ့ကြောင်း ထုတ်ပြန်ချက်မှာ ဖော်ပြထားပါတယ်။
Photo-Crd
CJ-008
#MeKongNews
#မိုင်းယုလေးရွာ
#TNLA
#လက်နက်ကြီး