မဲခေါင်၊ မေ ၁၂
အီရန်စစ်ပွဲကြောင့် ဖြစ်ပေါ်လာသော ကမ္ဘာလုံးဆိုင်ရာ ထောက်ပံ့ရေးကွင်းဆက် အကျပ်အတည်း လျော့ပါးစေရန် တရုတ်အနေဖြင့် စားနပ်ရိက္ခာနှင့် ဓာတ်မြေဩဇာများ လှောင်ထားခြင်းကို ရပ်တန့်သင့်သည်ဟု ကမ္ဘာ့ဘဏ်ဥက္ကဌဟောင်း ဒေးဗစ်မယ်ပက်စ်က ဘီဘီစီသတင်းဌာနကို ပြောကြားသည်။
ပေကျင်းမြို့တွင် ကျင်းပမည့် ထရမ့် – ရှီ ထိပ်သီးဆွေးနွေးပွဲမတိုင်မီ ဘီဘီစီ၏ World Business Report အစီအစဉ်တွင် ကမ္ဘာ့ဘဏ်ဥက္ကဌဟောင်း က ထိုသို့ပြောကြားခြင်းဖြစ်သည်။
“သူတို့မှာ ကမ္ဘာ့အကြီးဆုံး စားနပ်ရိက္ခာနဲ့ ဓာတ်မြေဩဇာ သိုလှောင်မှုရှိပါတယ်။ အဲဒီသိုလှောင်မှုတွေ ဆက်လုပ်နေတာကို သူတို့ ရပ်တန့်သင့်ပါတယ်” ဟု မယ်လ်ပက်စ်က ပြောသည်။
ဟော်မုဇ်ရေလက်ကြား ပိတ်ဆို့ထားမှုကြောင့် ဓာတ်မြေဩဇာ တင်ပို့မှုများ ထိခိုက်နေချိန် ဓာတ်မြေဩဇာများ ရရှိရန် ကမ္ဘာတစ်ဝန်းမှ နိုင်ငံများက အလုအယက် ကြိုးစားနေကြစဉ် မယ်လ်ပက်စ်၏ မှတ်ချက်များ ထွက်လာခဲ့သည်။
ပြည်တွင်းထောက်ပံ့မှုကို ကာကွယ်ရန်ဟုဆိုကာ မတ်လမှစ၍ ဓာတ်မြေဩဇာ အမျိုးအစားများစွာ ပြည်ပတင်ပို့မှုကို တရုတ်က ရပ်တန့်ထားခဲ့သည်။
ယင်းမတိုင်မီကလည်း ၂၀၂၁ ခုနှစ်မှစ၍ ဓာတ်မြေဩဇာ တင်ပို့မှုများကို တရုတ်က တဖြည်းဖြည်း ကန့်သတ်လာခဲ့ကြောင်း ဘီဘီစီသတင်းအရ သိရသည်။
ပြီးခဲ့သည့်နှစ်တွင် တရုတ်သည် ကမ္ဘာ့ဓာတ်မြေဩဇာ ထုတ်လုပ်မှု ၂၅ ရာခိုင်နှုန်းအထိ ထုတ်လုပ်ခဲ့ပြီး ပြည်ပသို့ ဒေါ်လာ ၁၃ ဘီလီယံဖိုးအထိ ရောင်းချခဲ့ကြောင်း သိရသည်။
ဖွံ့ဖြိုးဆဲနိုင်ငံဟု တရုတ်က ပြောဆိုနေခြင်းမှာလည်း မဖြစ်သင့်တော့ကြောင်း ၂၀၁၉ မှ ၂၀၂၃ ခုနှစ် အထိ ကမ္ဘာ့ဘဏ်အကြီးအကဲ တာဝန်ထမ်းခဲ့သည့် မစ္စတာမယ်လ်ပက်စ်က ဆက်ပြောသည်။
ကမ္ဘာတွင် ဒုတိယအကြီးဆုံးစီးပွားရေးကို ပိုင်ဆိုင်ထားပြီး ချမ်းသာကြွယ်ဝသော်လည်း တရုတ်နိုင်ငံက ၎င်းတို့ကိုယ်၎င်းတို့ ဖွံ့ဖြိုးဆဲနိုင်ငံအဖြစ် ပြောဆိုနေပြီး ထိုသို့ပြောဆိုမှုကို ဆိုင်းငံ့သင့်ပြီဖြစ်ကြောင်း ၎င်းက ပြောသည်။
လက်ရှိ ဖြစ်ပေါ်နေသော ကမ္ဘာ့စားနပ်ရိက္ခာနှင့် ဓာတ်မြေဩဇာ ထောက်ပံ့မှု ပြတ်တောက်ခြင်းများ နောက်ကွယ်က အကြောင်းရင်းများမှာ အလွန်ရှင်းလင်း ထင်ရှားနေပြီး တရုတ်ကို အပြစ်မတင်နိုင်ကြောင်း ဝါရှင်တန်မြို့ရှိ တရုတ်သံရုံး ပြောခွင့်ရသူ လျူပန်ယုက ဘီဘီစီထံသို့ အီးမေးလ်ဖြင့် ပြန်ကြားခဲ့သည်။
အချက်အလက် အထောက်အထားများအရ တရုတ်သည် ဖွံ့ဖြိုးဆဲနိုင်ငံ ဖြစ်သည်ဆိုခြင်းကို တစ်ကမ္ဘာလုံးက အသိအမှတ်ပြုထားသည်ဟုလည်း တရုတ်သံရုံး ပြောခွင့်ရသူက ဆက်ပြောသည်။
အေးကျော်
Ref:BBC
#MeKongNews
#စားနပ်ရိက္ခာ
#ဓာတ်မြေဩဇာ
#တရုတ်
#ကမ္ဘာ့ဘဏ်ဥက္ကဌ
