မဲခေါင်၊ ဧပြီ ၆
စစ်ပွဲ လုံးဝ အဆုံးသတ်ရေးဆီ ဦးတည်သွားမည့် ၄၅ ရက်ကြာ အပစ်အခတ် ရပ်စဲရေးအတွက် သတ်မှတ်ချက်များအပေါ် သဘောတူညီချက် ရရှိရန် အမေရိကန်၊ အီရန် နှင့် ဒေသတွင်းမှ ပါဝင်စေ့စပ် ညှိနှိုင်းပေးနေသူများက ဆွေးနွေးနေကြသည်ဟု ၎င်းဆွေးနွေးမှုအကြောင်း သိရှိထားသော အမေရိကန်၊ အစ္စရေး နှင့် ဒေသဆိုင်ရာ သတင်းရင်းမြစ်များကို ကိုးကား၍ Axios သတင်းဌာနက ဖော်ပြခဲ့သည်။
ယင်းသတင်းကို ရိုက်တာသတင်းဌာနက ချက်ချင်း စိစစ်အတည်ပြုနိုင်ခြင်း မရှိသလို မှတ်ချက်ပေးရန် ရိုက်တာ၏ တောင်းဆိုမှုများကိုလည်း အိမ်ဖြူတော်နှင့် အမေရိကန် နိုင်ငံခြား
ရေးဝန်ကြီးဌာနတို့က ချက်ချင်း မတုံ့ပြန်ခဲ့ကြပေ။
ညှိနှိုင်းရေးမှူးများသည် အဆင့် ၂ ဆင့်ပါ သဘောတူညီချက်ကို ဆွေးနွေးနေကြပြီး ပထမအဆင့်တွင် ၄၅ ရက် အပစ်အခတ် ရပ်စဲနိုင်ခြေ ပါဝင်သည်။
၎င်းအပစ်အခတ် ရပ်စဲမှုကာလအတွင်းမှာပင် စစ်ပွဲအမြဲတမ်း အဆုံးသတ်သွားရေးကို ဆွေးနွေးကြမည်ဖြစ်သည်။
ဒုတိယအဆင့်မှာ စစ်ပွဲအဆုံးသတ်ရေး သဘောတူညီမှု ရယူရန်ဖြစ်ကြောင်း သတင်းက ဆက်လက်ဖော်ပြသည်။
ဆွေးနွေးပွဲများလုပ်ရန် ထပ်မံ၍ အချိန်လိုအပ်ပါကလည်း အပစ်အခတ် ရပ်စဲမှုကို သတ်တမ်းတိုးသွားရန် ရည်မှန်းထားကြသည်။
ဟောမုဇ်ရေလက်ကြားအား ပြန်ဖွင့်ရန် သို့မဟုတ်ပါက အီရန်နိုင်ငံမှ အရေးပါသော အခြေခံအဆောက်အအုံများကို တိုက်ခိုက်သွားမည့် ၎င်း၏ရာဇသံ နောက် ဆုံးအချိန် သတ်မှတ်ချက်မှာ အင်္ဂါနေ့ ညနေဖြစ်ကြောင်း အမေရိကန်သမ္မတ ဒေါ်နယ်ထရမ့်က ယမန်နေ့တွင် ဝေါလ်စထရိဂျာနယ်အား ပြောကြားခဲ့သည်။
အမေရိကန်က အီရန်နှင့် ထဲထဲဝင်ဝင် လေးလေးနက်နက် ဆွေးနွေးနေကြောင်း နှင့် ၎င်းသတ်မှတ်ထားသော နောက်ဆုံးအချိန် မတိုင်မီ သဘောတူညီချက် ရရှိနိုင်သည်ဟု ဒေါ်နယ်ထရမ့်က Axios သတင်းဌာနကို ယမန်နေ့က ပြောကြားခဲ့သည်။
“ အခွင့်အရေးကောင်း ရှိနေပါတယ်။ ဒါပေမယ့်လည်း သူတို့က သဘောမတူခဲ့ရင်၊ အဲဒီမှာရှိတဲ့ အရာအားလုံးကို ကျနော်က ဖောက်ခွဲပစ်မှာပါ” ဟု ၎င်းက ပြောကြားခဲ့သည်။
ထိုကဲ့သို့ တိုက်ခိုက်မှုလာပါက အစ္စရေးနှင့် ပင်လယ်
ကွေ့နိုင်ငံများမှ အခြေခံအဆောက်အအုံများအပေါ် ပြန်လည် တိုက်ခိုက်၍ လက်တုံ့ ပြန်သွားမည်ဟု အီရန်က ပြန် လည် ခြိမ်းခြောက်ထားသည်။
အေးကျော်
Ref: Reuters/ Axio
#MeKongNews
#၄၅ရက်
#အပစ်ရပ်ရေး
#အီရန်အရေး
#ငြိမ်းချမ်းရေးပွဲစား
