မဲခေါင်၊ ဖေဖော်ဝါရီ ၈
ထိုင်းနိုင်ငံသည် လက်ရှိတွင် အတွေ့အကြုံရင့်ကျက်သည့် ပညာရှင်များကို လိုအပ်နေခြင်းဖြစ်ပြီး အုပ်ချုပ်ရေးမှာ အသင့်မဖြစ်သေးသူများအတွက် စမ်းသပ်ကွင်းတစ်ခု မဟုတ်ကြောင်း ရွေးကောက်ပွဲမတိုင်မီ နောက်ဆုံးမဲဆွယ်ပွဲ၌ ဘွန်ဂျိုင်ထိုင်းပါတီ ခေါင်းဆောင် အနုတင် ချန်ဗီရာကူးလ်က ပြောကြားလိုက်သည်။
၎င်းတို့ပါတီ အနိုင်ရရှိပါက အစိုးရ၏ ကဏ္ဍစုံကို လွှမ်းခြုံနိုင်မည့် အပြင် အထူးသဖြင့် စီးပွားရေးနှင့် နိုင်ငံခြားရေးကို အဓိကထားမည့် အုပ်ချုပ်ရေးအဖွဲ့ကို ဖွဲ့စည်းသွားမည်ဟု အနုတင်က ထုတ်ဖော် ပြောကြားခဲ့သည်။
နိုင်ငံခြားရေး၊ စီးပွားကူးသန်းနှင့် ဘဏ္ဍာရေးဝန်ကြီးဌာနတို့ကို ကိုင်တွယ်မည့် သီဟာဆက်၊ အက်နီတီနှင့် ဆူပါဝီးတို့သည် ဒုတိယဝန်ကြီးချုပ်များအဖြစ်ပါ တာဝန်ယူသွားမည်ဟု သိရသည်။
ထို့နောက် ဘွန်ဂျိုင်ထိုင်းပါတီ အနေဖြင့် အမျိုးသားစီမံခန့်ခွဲမှု၏ အဓိကနယ်ပယ် ၄ ခုဖြစ်သော စီးပွားရေး၊ လုံခြုံရေး၊ သဘာဝဘေးစီမံခန့်ခွဲရေးနှင့် လူမှုဘဝအရည်အသွေး တိုးတက်ရေးတို့ကို အလေးထား ဆောင် ရွက်သွားမည်ဟု ဆိုသည်။
ငွေကြေးဖြန့်ဝေပေးသည့် ရေတိုလူကြိုက်များရေး မူဝါဒများထက် ရေရှည် ဝင်ငွေရရှိစေမည့် စီးပွားရေး အခွင့်အလမ်းများ ဖန်တီးပေးရေးကို ပိုမိုအာရုံစိုက်မည်ဟု လက်ရှိ အိမ်စောင့်ဝန်ကြီးချုပ်ဖြစ်သူ အနုတင်က ပြောကြားသည်။
ထို့ပြင် နိုင်ငံ၏ စီးပွားရေးတန်ဖိုး မြှင့်တင်ရန် လျှပ်စစ်ကား နှင့် ဉာဏ်ရည်တုနည်းပညာ ကဲ့သို့သော New S-Curve လုပ်ငန်းများကို ဆက်လက် တွန်းအားပေးသွားမည်ဟု ၎င်းက ဆိုသည်။
ထိုင်းနိုင်ငံကို “အာရှ၏လူမမာ” ဟု ကင်ပွန်းတပ်ခံထားရခြင်းကို လက်မခံဘဲ စီးပွားရေး ပူးပေါင်းဆောင်ရွက်မှုနှင့် ဖွံ့ဖြိုးတိုးတက်ရေးအဖွဲ့ – OECD သို့ ဝင်ရောက်နိုင်ရန် ကြိုးပမ်းကာ ကမ္ဘာ့စီးပွားရေး အစီအစဉ်သစ်တွင် အဓိကမဟာမိတ်အဖြစ် တက်လှမ်းမည်ဟု ဆိုသည်။
အခြားမူဝါဒများအနေဖြင့် အမြင့်ဆုံးအဆင့်အထိ အခမဲ့ ပညာသင်ကြားနိုင်ရေး၊ သက်ကြီးရွယ်အိုများ အတွက် အလုပ်အကိုင်နှင့် စောင့်ရှောက်ရေး စင်တာများ တည်ထောင်ရေးတို့ကိုလည်း အဆိုပြုထား သည်။
ထို့ပြင် စစ်ဘက်ဆိုင်ရာတွင် ကိုယ့်ဆန္ဒအလျောက် စစ်မှုထမ်းသည့်စနစ်သို့ ပြုပြင်ပြောင်းလဲရန်နှင့် ထိုင်း – ကမ္ဘောဒီးယား နယ်စပ်အရေးတွင် တင်းမာသော ရပ်တည်ချက်ဖြင့် နယ်မြေတစ်လက်မမျှ အဆုံးရှုံးခံမည် မဟုတ်ကြောင်းလည်း အနုတင်က ပြောကြားခဲ့သည်။
ထိုင်းနိုင်ငံ၌ အထွေထွေရွေးကောက်ပွဲကို ယနေ့ ဖေဖော်ဝါရီ ၈ ရက်တွင် ကျင်းပနေပြီဖြစ်သည်။
အေးကျော်
Ref: The Nation
#MeKongNews
#အာရှ၏လူမမာ
#ထိုင်းနိုင်ငံ
#ကျွမ်းကျင်ပညာရှင်အဖွဲ့
#ကုစား
#အနုတင်
