မဲခေါင်၊ ဖေဖော်ဝါရီ ၆
တနင်္ဂနွေနေ့ ထိုင်းလွှတ်တော် ရွေးကောက်ပွဲ မတိုင်မီ နောက်ဆုံး တွန်းအားပေးမှုတွင် အဓိက နိုင်ငံရေးပါတီကြီး ၄ ခုဖြစ်သော ဘွန်ဂျိုင်ထိုင်း – BJT၊ ဖွေထိုင်းပါတီ၊ ပြည်သူ့ပါတီ – PP နှင့် ဒီမိုကရက်ပါတီ တို့က ယနေ့ ဘန်ကောက်မြို့တစ်ဝန်းတွင် ကြီးမားသော မဲဆွယ်ပွဲများ လုပ်ဆောင်နေကြသည်။
ဂျူလပွန် အမွန်ဝီဗက်ဦးဆောင်သော ဖွေထိုင်းပါတီက သက်ဟာဆာဒင် အားကစားကွင်းတွင် မဲဆွယ် သွားမည်ဖြစ်ကာ စီးပွားရေးအကြောင်းအရာများ၊ စီးပွားရေး ပြန်လည်နာလန်ထူရေး၊ လူနေမှုစရိတ်များ လျှော့ချရေး ၊ အလုပ်အကိုင် ဖန်တီးရေးတို့ကို ဦးစားပေးသွားမည်ဟု မျှော်လင့်ရသည်။
ပါတီခေါင်းဆောင်နှင့် ဝန်ကြီးချုပ်လောင်း အနုတင်ချန်ဗီရာကူးလ်ဦးဆောင်သော ဘွန်ဂျိုင်ထိုင်းပါတီက ဘုရင်မသီရိခေတ် အမျိုးသားကွန်ဗင်းရှင်းစင်တာတွင် မဲဆွယ်ပွဲ ကျင်းပသွားမည်ဖြစ်သည်။
BJT ပါတီက ဒေသခံတို့၏ စီးပွားရေးကို အားပေးရန် ၎င်းတို့၏ ထိပ်တန်းဦးစားပေး ဆေးခြောက်မူဝါဒ အပါအဝင် အောက်ခြေစီးပွားရေးများ ဖွံ့ဖြိုးတိုးတက်ရေး ၊ ပြည်သူ့ကျန်းမာရေး မူဝါဒများကို အဓိကထား နေသည်။
ဝန်ကြီးချုပ်နေရာ လျာထားသူ နက်သာဖောင်ရူအန်ပန်ယာဝတ် ဦးဆောင်နေသည့် ပြည်သူ့ပါတီက ဒင်ဒန်းဒေသ ထိုင်း – ဂျပန်အားကစားရုံမှ လူငယ်အားကစားစင်တာ၌ လူထုမဲဆွယ်ပွဲ ကျင်းပနေပြီး နိုင်ငံ သားများက မောင်းနှင်သော နိုင်ငံရေး အသွင်ကူးပြောင်းမှု၊ ထိုင်းနိုင်ငံရေးနှင့် စီးပွားရေး တည်ဆောက် ပုံများတွင် ပြည်သူလူထု ပူးပေါင်းပါဝင်ရေးတို့ကို အဓိက အကြောင်းအရာများအဖြစ် မဲဆွယ်ကြသည်။
ပြည်သူ့ပါတီမှာ လူထုစစ်တမ်းများတွင်လည်း ထောက်ခံမှုအများဆုံး ရသည့်ပါတီဖြစ်သည်။
နောက်ဆုံး သီတင်းပတ်အတွင်း တောင်ပိုင်းတွင် မဲဆွယ်စည်းရုံးရေးများ လုပ်နေခဲ့သော ဒီမိုကရက်ပါတီက နောက်ဆုံး လူထုစုဝေးပွဲကို ဘန်ကောက်မြို့လယ်မှ One Bangkok ဈေးဝယ်စင်တာကြီးတွင် ကျင်းပမည်ဖြစ်ကာ ပါတီခေါင်းဆောင် အဘီဆစ်ဝိဇ္ဇာဇီဝက မိန့်ခွန်းပြောကြားမည်ဖြစ်သည်။
ဒီမိုကရက်ပါတီက နိုင်ငံအတွက် ဘေးကင်းသော ထွက်ပေါက်ဟူသော ၎င်းတို့၏ မျှော်မှန်းချက် အကြောင်းကို မြှင့်တင် ပြောဆိုသွားမည်ဖြစ်ကာ နိုင်ငံရေးတည်ငြိမ်မှု၊ ပွင့်လင်းမြင်သာမှု၊ ရေရှည် စီးပွား ရေးလုံခြုံမှု လူမှုဖူလုံရေးတို့ကိုလည်း ဦးစားပေးသွားမည်ဟု ဆိုသည်။
ကြီးမားသော လူအုပ်စုများကို ဆွဲဆောင်နိုင်မည်ဟု မျှော်လင့်ထားသော မဲဆွယ်ပွဲများတွင် ပါတီကြီးများက စိတ်ပိုင်းဖြတ်မှု မလုပ်ရသေးသော မဲဆန္ဒရှင်များအတွက် အလဲထိုးချက်များ ပေးအပ်နိုင်ရန် အရေးပါသော အခိုက်အတန့်များလည်း ဖြစ်နိုင်သည်။
ရွေးကောက်ပွဲ ဥပဒေအရ မဲဆွယ်စည်းရုံးရေး လှုပ်ရှားမှုအားလုံးကို မနက်ဖြန် စနေနေ့ ညနေ ၆ နာရီတွင် ရပ်တန့်ရမည်ဖြစ်ကာ အမတ်နေရာ ၃၃ နေရာရှိသော မြို့တော် ဘန်ကောက်သည် အဓိက တိုက်ပွဲနယ် မြေတစ်ခုဖြစ်သည်။
အေးကျော်
Ref:bangkokpost
#ရွေးကောက်ပွဲ
#ထိုင်းပါတီ
#ဘန်ကောက်
#အပြိုင်မဲဆွယ်
