မဲခေါင်၊ ဖေဖော်ဝါရီ ၄
ရေအောက် မီတာ ၅၇၀၀ နက်သော ပင်လယ်ကြမ်းပြင်မှ မြေရှားသတ္တုများ ပါဝင်သည်ဆိုသော ရွှံ့နွံများကို သင်္ဘောတစ်စီးပေါ်သို့ စုပ်တင်ရာတွင် ဂျပန်သုတေသီများ အောင်မြင်ခဲ့ကြောင်း သိရသည်။
ပင်လယ်ပြင်မြေလွှာသိပ္ပံနှင့် နည်းပညာဆိုင်ရာ ဂျပန်အေဂျင်စီ – JAMSTEC မှ စူးစမ်းလေ့လာရေးရေယာဉ် Chikyu သည် ဇန်နဝါရီလကတည်းက ပင်လယ်ကြမ်းပြင် ရွှံ့မြေများကို စမ်းသပ် တူးဖော်နေခဲ့သည်။
ယင်းစမ်းသပ် တူးဖော်နေသော နေရာသည် ပစိဖိတ်သမုဒ္ဒရာမှ ဂျပန်ပိုင် မီနာမီတိုရီရှီမာကျွန်း အရှေ့တောင်ဘက် ၁၅၀ ကီလိုမီတာအကွာ ဂျပန်အထူးစီးပွားရေးဇုန်အတွင်း တည်ရှိကြောင်း သိရသည်။
ဂျပန်အစိုးရအဖွဲ့ရုံးက ဦးဆောင်သော စီမံချက်အရ စမ်းသပ်မှုကို လုပ်ဆောင်ခြင်းဖြစ်ကာ ရွှံ့နွံများအား စုပ်ယူရန် ပြင်ဆင်မှုများကို သောကြာနေ့က စတင်ခဲ့ပြီး တနင်္ဂနွေနေ့တွင် ရွှံ့နွံများကို သင်္ဘောပေါ်သို့ တင်ဆောင်နိုင်ခဲ့သည်။
ပင်လယ်ရေအောက်သို့ ချလိုက်သော ပိုက်ထိပ်၌ ရွှံ့နွံစုပ်သည ့်ကိရိယာတပ်ဆင်၍ စုပ်တင်ခြင်းဖြစ်သည်။
ယင်းနည်းလမ်းကို အသုံးပြု၍ လွန်ခဲ့သော ၄ နှစ်က ပင်လယ်ကြမ်းပြင် အနက် ၂၄၇၀ မီတာမှ ရွှံ့နွံများကိုလည်း စုပ်တင်၍ စမ်းသပ်ခဲ့သေးသည်။
ယခုနောက်ဆုံး စမ်းသပ်မှုအရ ၎င်းတို့၏ စနစ်သည် ရေဖိအား အလွန်များသော ၂ ဆ နက်ရှိုင်းသည့် ပင်လယ် ကြမ်းပြင်မှာပင် အလုပ်ဖြစ်ကြောင်း တွေ့ရှိခဲ့သည်ဟု သုတေသီများက ပြောကြားကြသည်။
Chikyu စူးစမ်းလေ့လာရေးယာဉ်သည် ၎င်း၏မစ်ရှင်ကို ယမန်နေ့က အဆုံးသတ်လိုက်ကာ ဂျပန်နိုင်ငံအလယ်ပိုင်း ရှီဇူကာစီရင်စု ရှီမိဇုဆိပ်ကမ်းသို့ ဖေဖော်ဝါရီ ၁၅ ရက်တွင် ပြန်လာမည်ဖြစ်ကြောင်း သိရသည်။
ထို့နောက် ရွှံ့နွံများနှင့် မြေရှားသတ္တုများအား ခွဲခြားခြင်း၊ သန့်စင်ခြင်းများကို ဆက်လက် စမ်းသပ်သွားမည် ဖြစ်သည်။
တစ်ပြိုင်တည်းမှာပင် နေ့စဉ်သုံး လျှပ်စစ်ပစ္စည်းများမှ နောက်ဆုံးပေါ် လက်နက်စနစ်များအထိ အသုံးပြုနေသော မြေရှားသတ္တုများကို အမြောက်အမြား ထုတ်လုပ်သွားရေး ဆွေးနွေးကြရန်လည်း ပြင်ဆင်နေကြသည်။
ထို့ပြင် လာမည့်နှစ် ဖေဖော်ဝါရီမှစ၍ ပင်လယ်ကြမ်းပြင်၌ တစ်နေ့လျှင် ရွှံ့နွံတန်ပေါင်း ၃၅၀ တူးဖော်သွားရေး စမ်းသပ်မှုများ လုပ်ရန်လည်း အစိုးရအဖွဲ့ရုံးက စီစဉ်နေသည်။
အေးကျော်
Ref: NHK #MeKongnews
#ရေနက်ပိုင်း
#မြေရှားတူးဖော်
#ဂျပန်
#အောင်မြင်
