မဲခေါင်၊ ဇန်နဝါရီ ၃၁
ထိုင်းပညာရေးဝန်ကြီးဌာနက ၂၀၂၅ ပညာသင်နှစ်မှ စတင်ပြီး ဝန်ကြီးဌာနကြီးကြပ်မှုအောက်တွင် ရှိသည့် ထိုင်းစာသင်ကျောင်းအားလုံး ပြည်ပမှ အလုပ်လာလုပ်သည့် ရွှေ့ပြောင်းလုပ်သားများ၏ ရင်သွေးများကို အိမ်ထောင်စုစာရင်းမရှိ၊ ထိုင်းနိုင်ငံသားကတ် မရှိလည်း ကျောင်းအပ်လက်ခံရမည်ဟု ဇန်န ဝါရီ ၃၀ ရက်၌ ထိုင်းတော်ဝင်ပြန်တမ်းမှတစ်ဆင့် အတည်ပြု အမိန့်ထုတ်ပြန်သွားခဲ့သည်။
၂၀၁၉ အောက်တိုဘာ ၃၁ ရက်က ထုတ်ပြန်ခဲ့သည့် ယခင် ပညာရေးမူဝါဒသည် မျက်မှောက်အခြေအနေများနှင့် ကိုက်ညီမှုမရှိတော့သည့်အတွက် ပယ်ဖျက်ကြောင်းနှင့် မူဝါဒသစ်ချမှတ်ကာ ယခုလို ကြေညာကြောင်း ပညာရေးဝန်ကြီး နာရူမွန်ပင်ယိုဆင်ဝပ်ကလက်မှတ်ရေးထိုး ထုတ်ပြန်သွားသည်။
အစိုးရဝန်ကြီးအဖွဲ့၏ ၂၀၀၅ ခုနှစ် ဇူလိုင် ၅ ရက်က တင်သွင်းသည့် သန်းခေါင်စာရင်း၊ မှတ်ပုံတင် ရှိစရာမလိုဘဲ မည်သူမဆို ထိုင်းကျောင်းများတွင် တက်ရောက်ခွင့်ပြုရမည်ဆိုသော အဆိုကို ယခု လက်ခံအသိအမှတ်ပြုကာ တရားဝင်ကျင့်သုံးခြင်းဖြစ်သည်ဟုလည်း ဝန်ကြီးက ဆိုသည်။
ယခင်က အစုအဖွဲ့၊ ပညာရေးအဆင့်၊ ဧရိယာများခွဲခြားပြီးမှ ထိုင်းကျောင်းများတက်ခွင့်ပြုသော်လည်း ယခုတွင်မူ ထိုင်းနိုင်ငံအတွင်း နေထိုင်သူတိုင်း မည်သည့် ပညာရေးအဆင့်မဆို၊ မည်သည့် ကျောင်းအမျိုးအစားတွင်မဆို တစ်နိုင်ငံလုံးအတိုင်းအတာဖြင့် အားလုံးကို တက်ခွင့်ပြုလိုက်ခြင်း ဖြစ်သည်ဟုလည်း ကြေညာသွားသည်။
ထိုင်းနိုင်ငံသည် ကလေးသူငယ်အခွင့်အရေးများဆိုင်ရာ ကွန်ဗင်းရှင်းလက်မှတ်ထိုးထားသော နိုင်ငံ ဖြစ်ခြင်းကြောင့် ယခုလို ရွှေ့ပြောင်းလုပ်သား ရင်သွေးများအား ပညာရေးအခွင့်အလမ်းများပေးရန် တာဝန်ရှိကာ ယခုလို ခွင့်ပြုခြင်းသည် ထိုင်းနိုင်ငံအတွက် အပြုသဘောဆောင်သော ကောင်းမွန်မှုဆီသို့ ဦးတည်သဖြင့် ကြိုဆိုကြကာ နိုင်ငံတော်ရေရှည်လုံခြုံရေးအတွက်လည်း အကျိုးပြုနိုင်မည်ဟု မျှော်မှန်းကြောင်းလည်း ဝန်ကြီးကဆိုသည်။
စည်းမျဉ်းဥပဒေသစ်အရ ကျောင်းသားများသည် တရားဝင်မှု သို့မဟုတ် နိုင်ငံသားအဆင့်အတန်း မည်သို့ပင်ရှိစေကာမူ ကျောင်းအပ်လက်ခံပေးရမည်ဖြစ်သလို လျှောက်ထားသူများသည် တရားဝင် နိုင်ငံသားမှတ်ပုံတင် စာရွက်စာတမ်းများ သို့မဟုတ် ဂဏန်း ၁၃ လုံးပါ အမျိုးသား မှတ်ပုံတင်နံပါတ်ရှိပါက ကျောင်းသားများသည် ပုံမှန်ဝင်ခွင့် လျှောက်ထားနိုင်သည်။
မရှိပါက G Code စနစ်အောက်တွင် မှတ်ပုံတင်ရန် လိုအပ်ပြီး ၎င်းသည် အရပ်ဘက်မှတ်ပုံတင်မရှိသူများအတွက် G အက္ခရာဖြင့်စတင်သော အထူးဂဏန်း ၁၃ လုံးပါ ကျောင်းသားမှတ်ပုံတင်နံပါတ် ဖြစ်စေမည်ဖြစ်သည်။
ကျောင်းများအနေဖြင့် သက်ဆိုင်ရာစာရွက်စာတမ်းများကို စုဆောင်းရန် မိဘ သို့မဟုတ် အုပ်ထိန်းသူများနှင့် ညှိနှိုင်းဆောင်ရွက်ရန်နှင့် ခရိုင် သို့မဟုတ် ဒေသဆိုင်ရာမှတ်ပုံတင်ရုံးများနှင့် ပူးပေါင်းဆောင်ရွက်ရန်လည်း ညွှန်ကြားထားသည်။
ကျောင်းသားတစ်ဦးအား နိုင်ငံသားအဆင့်အတန်း သို့မဟုတ် မှတ်ပုံတင်နံပါတ်ကို တရားဝင်ပေးအပ်နိုင်ခြင်းမရှိပါက ကျောင်းသားသည် ၎င်းတို့၏ ပညာရေးပြီးဆုံးသည်အထိ G Code ကို ကျောင်းမှသိမ်းဆည်းထားရမည်ဟု ဆိုသည်။
ကိုကလင်း
Ref: khaosodenglish
#MeKongNews
#ရွှေ့ပြောင်းလုပ်သား
#ရင်သွေး
#ထိုင်းကျောင်း
#တက်ခွင့်ပြု
