မဲခေါင်၊ ဇန်နဝါရီ ၁၇
အမေရိကန်သမ္မတ ဒေါ်နယ်ထရမ့်က မက်မောနေသော ဂရင်းလန်းကျွန်းကို ပို၍ ကြီးမားသော အမြဲတမ်း နေတိုးတပ်ဖွဲ့ဖြင့် လုံခြုံရေးရယူရန် အစီအစဉ်ကို ဒိန်းမတ်က တွန်းအားပေးနေစဉ် ဥရောပအစိုးရများက စစ်ဘက်အရာရှိ အနည်းငယ်ကို ဇန်နဝါရီ ၁၅ ၇က်နေ့တွင် ဂရင်းလန်းသို့ ပို့ဆောင်ခဲ့သည်။
အမေရိကန်၊ ဒိန်းမတ်နှင့် ဂရင်းလန်း အရာရှိများတွေ့ဆုံပွဲတွင် လိပ်ခဲတည်းလည်း အခြေအနေအတွက် ဖြေရှင်းရန် လမ်းစမထွက်ပေါ်ခဲ့ပြီးနောက် နာရီပိုင်းမှာပင် စစ်ရေးလေ့ကျင့်မှု တစ်ခုကို ကူညီပြင်ဆင်ပေးရန် ဥရောပတပ်ဖွဲ့များကို စေလွှတ်ခြင်း ဖြစ်သည်။
ရုရှားနှင့် တရုတ်တို့က သိမ်းပိုက်ချင်ခဲ့ပါက ဂရင်းလန်းကို ကာကွယ်ပေးရန် ဒိန်းမတ်ကို အားကိုးနိုင်မည် မဟုတ် ကြောင်း ၃ နိုင်ငံအရာရှိများ အစည်းအဝေး ကျင်းပပြီးချိန်၌လည်း ထရမ့်က ၎င်း၏ တင်းမာသော သဘောထားကို ထပ်မံ ပြောကြားသည်။
၂၀၂၆ ခုနှစ် တစ်နှစ်လုံးတွင် ဂရင်းလန်း၌ ပိုမိုကြီးမားသော နေတိုးတပ်ဖွဲ့များ ချထားရန် စီစဉ်ထားကြောင်းနှင့် အာတိတ်၏ လုံခြုံရေးသည် ဒိန်းမတ်နိုင်ငံအတွက် သာမကဘဲ နေတိုးတစ်ဖွဲ့လုံးနှင့် သက်ဆိုင်ကြောင်း ပြသခြင်းမှာ အရေးပါကြောင်း ဒိန်းမတ် ကာကွယ်ရေးဝန်ကြီး ထရိုအဲလွန်းပိုလ်ဆန်က ပြောသည်။
အမေရိကန်အရာရှိများနှင့် ဒိန်းမတ် ၊ ဂရင်းလန်းကိုယ်စားလှယ်များ၏ တွေ့ဆုံမှုမှာ အပြုသဘော ဆောင်သည်ဟု အိမ်ဖြူတော်က ပြောကြားသော်လည်း ဂရင်းလန်းသို့ ဥရောပတပ်ဖွဲ့များ စေလွှတ်မှုမှာ ထိုဒေသနှင့်ပတ်သက်၍ ထရမ့်၏ စဉ်းစားချက်အပေါ် သက်ရောက်မှုရှိမည် မဟုတ်ကြောင်း အိမ်ဖြူတော်က ပြောသည်။
“ဥရောပတပ်ဖွဲ့တွေက သမ္မတရဲ့ ဆုံးဖြတ်ချက်ချတဲ့ လုပ်ငန်းစဉ်ကို သက်ရောက်လိမ့်မယ်၊ ဂရင်းလန်းကို ရယူရေး သူ့ရဲ့ ရည်မှန်းချက်ကို သက်ရောက်လိမ့်မယ်လို့ လုံးဝ မထင်ပါဘူး” ဟု အိမ်ဖြူတော် ပြန်ကြားရေးမှူး ကယ်ရိုလင်းလီဗစ်က ပြောသည်။
ယခုနှစ် နှောင်းပိုင်းတွင် ပြုလုပ်မည့် ပို၍ကြီးမားသော စစ်ရေး လေ့ကျင့်မှုများအတွက် ပြင်ဆင်မှုများ စတင်ရန် စစ်ဘက်အရာရှိများ စေလွှတ်သွားမည်ဟု ဂျာမနီ၊ ပြင်သစ်၊ ဆွီဒင်၊ နော်ဝေး၊ ဖင်လန် နှင့် နယ်သာလန်နိုင်ငံတို့က ပြောကြားကြသည်။
ထိုအတောအတွင်းမှာပင် မော်စကိုနှင့် ပေကျင်းမှာ ဂရင်းလန်းအတွက် ခြိမ်းခြောက်မှုဖြစ်ကြောင်း နေတိုးအဖွဲ့၏ ပြောဆိုမှုများမှာ စိတ်ခြောက်ခြားမှုများ ဖြစ်လာစေရန် ပုံဖော်ထားသည့် ယုံတမ်းစကားများဖြစ်သည်ဟု ရုရှားက ပြောကြားပြီး ယင်းဒေသတွင် ထိပ်တိုက်ရင်ဆိုင်မှုများ မြင့်တက်လာနိုင်သော အန္တရာယ်များ အကြောင်းကို သတိပေး ပြောကြားသည်။
အာတိတ်ဒေသမှ ရရှားတို့၏ အကျိုးစီးပွားများကို လျစ်လျှူရှုရန် ကြိုးပမ်းမှုများမှာလည်း တန်ပြန်မှုမရှိဘဲ နေမည်မဟုတ်ကြောင်း ရရှား နိုင်ငံခြားရေးဝန်ကြီးဌာနမှ ပြောခွင့်ရ အမျိုးသမီးတစ်ဦးက ပြောကြားသည်။
အေးကျော်
Ref: Reuters
#MeKongNews
#ထရမ့်
#ခြိမ်းခြောက်
#ဂရင်းလန်း
#တပ်ဖွဲ့များ
#စေလွှတ်
