မဲခေါင်၊ ဒီဇင်ဘာ ၂၄
ဖေဖော်ဝါရီ ၈ ရက်တွင် ကျင်းပမည့် ထိုင်းနိုင်ငံ အထွေထွေရွေးကောက်ပွဲ မတိုင်မီ နိုင်ငံ၏ အကြီးဆုံး နိုင်ငံရေးပါတီကြီး ၃ ခုက ၎င်းတို့၏ ဝန်ကြီးချုပ်လောင်းများကို ထုတ်ဖော် ကြေညာခဲ့ကြသည်။
ယင်းတွင် လက်ရှိအာဏာရ ဘွန်ဂျိုင်ထိုင်းပါတီက ယာယီဝန်ကြီးချုပ် အနုတင် ချန်ဗီရာကူးလ်ကို အဆိုပြုခဲ့ပြီး၊ အတိုက်အခံ ဖွေထိုင်းပါတီကမူ ခေါင်းဆောင်ဟောင်း သက်ဆင်ရှင်နာဝပ်၏ တူဖြစ်သူကို ရွေးချယ်ခဲ့သည်။
ယနေ့တွင် အသက် ၅၉ နှစ်အရွယ် ဘွန်ဂျိုင်ထိုင်းပါတီခေါင်းဆောင် ယာယီဝန်ကြီးချုပ် အနုတင်က ဝန်ကြီးချုပ်လောင်းအဖြစ် ၎င်းကိုယ်၎င်း အဆိုပြုခဲ့သည်။
“ထိုင်းပြည်သူတွေက ဘွန်ဂျိုင်ထိုင်းပါတီကို မဲပေးမယ်ဆိုရင် ကျွန်တော် ဝန်ကြီးချုပ် ဖြစ်လာမှာပါ” ဟု ၎င်းက ပါတီမဲဆွယ် စည်းရုံးရေး စတင်သည့် အခမ်းအနားတွင် ပြောကြားသည်။
၎င်းအနေဖြင့် ဝန်ကြီးချုပ်အဖြစ် ပြန်လည်ရွေးခံရပါက ဒုတိယဝန်ကြီးချုပ်နှင့် ဘဏ္ဍာရေးဝန်ကြီး အီကနီတီကဲ့သို့သော လက်ရှိဝန်ကြီးများကို ရာထူးတွင် ဆက်လက် ထားရှိမည်ဟုလည်း အနုတင်က ကတိပြုခဲ့သည်။
ထို့ပြင် စီးပွားကူးသန်းဝန်ကြီး ဆူဖာဂျီးနှင့် နိုင်ငံခြားရေးဝန်ကြီး သီဟာဆက်တို့သည်လည်း လက်ရှိ ဝန်ကြီးဌာန တာဝန်များကို ဆက်လက်ယူထားရင်း ဒုတိယဝန်ကြီးချုပ်များ ဖြစ်လာမည် ဖြစ်သည်။
၂၀၂၃ ခုနှစ်မှ ၂၀၂၅ ခုနှစ်အတွင်း ဝန်ကြီးချုပ်များ ဖြစ်ကြသော ပေထောင်တန် ရှင်နာဝပ်နှင့် ဆေထာ ထဝီဆင်တို့ လက်ထက်တွင် အစိုးရကို ဦးဆောင်ခဲ့သည့် ဖွေထိုင်းပါတီသည် သက်ဆင်၏ တူဖြစ်သူ ယော့ချနန် ဝမ်စဝပ် အပါအဝင် ဝန်ကြီးချုပ်လောင်း ၃ ဦးကို အမည်စာရင်း တင်သွင်းခဲ့သည်။
၎င်းမှာ လက်ရှိတွင် သက်ဆင်ရှင်နာဝပ် ထောင်ဒဏ် ကျခံနေရသော်လည်း ပါတီအတွင်း ရှင်နာဝပ်မိသားစု၏ ဩဇာလွှမ်းမိုးမှု ဆက်လက် တည်ရှိနေဆဲဖြစ်ကြောင်း ညွှန်ပြနေသည်။
ထို့အတူ ပညာတတ် လူငယ်၊ လူလတ်များ ဦးဆောင်ပြီး တိုးတက်သော အမြင်ရှိသည့် အဓိက အတိုက်အခံ အုပ်စု ပြည်သူ့ပါတီက ၎င်း၏ ခေါင်းဆောင် အသက် ၃၈ နှစ်အရွယ် နတ်သဖွန် ရွမ်ပန်ညာဝပ်ကို ဦးစားပေး ဝန်ကြီးချုပ်လောင်းအဖြစ် အမည်စာရင်း တင်သွင်းခဲ့သည်။
ထို့နောက် ဒုတိယခေါင်းဆောင် အဖြစ် ၄၄ နှစ်အရွယ် စီရီကန်ညာ တန်စာကူးလ်ကို ဒုတိယအဖြစ်နှင့်၊ တိုကျိုမြို့ရှိ အမျိုးသားမူဝါဒရေးရာ ဘွဲ့လွန်တက္ကသိုလ်မှ ၄၆ နှစ် အရွယ် ကထိက ဝီရာယုသ် ကန်ချူးချက်ကို တတိယမြောက် ကိုယ်စားလှယ်လောင်းအဖြစ် အသီးသီး အဆိုပြုခဲ့သည်။
ထိုင်းတွင် နိုင်ငံရေးပါတီများက ဝန်ကြီးချုပ်လောင်း ၃ ဦးအထိ အမည်စာရင်း တင်သွင်းနိုင်ပြီး ယင်းပုဂ္ဂိုလ်များက ရွေးကောက်ပွဲတွင် ကိုယ်တိုင် ဝင်ရောက်ယှဉ်ပြိုင်ရန် မလိုအပ်ပေ။
အထွေထွေ ရွေးကောက်ပွဲအပြီးတွင် ကြိုတင် တင်သွင်းထားသော ကိုယ်စားလှယ်လောင်းများထဲမှ ဝန်ကြီးချုပ်အသစ်ကို လွှတ်တော်တွင်း မဲပေးစနစ်ဖြင့် ရွေးချယ်မည်ဖြစ်သည်။
ယခုတစ်ကြိမ်တွင် ပါတီများသည် ဒီဇင်ဘာ ၂၈ ရက်မှ ၃၁ ရက်အတွင်း ၎င်းတို့၏ ကိုယ်စားလှယ်လောင်း စာရင်းကို တင်သွင်းရမည် ဖြစ်သည်။
ထိုင်းနိုင်ငံ အောက်လွှတ်တော်တွင် အမတ်နေရာ စုစုပေါင်း ၅၀ဝ ရှိပြီး မဲဆန္ဒနယ်အလိုက် အမတ် ၄၀ဝ နှင့် ပါတီအမတ် ၁၀ဝ တို့ ပါဝင်သည်။
ပြီးခဲ့သည့် ဒီဇင်ဘာ ၁၂ ရက်တွင် လွှတ်တော်ကို မဖျက်သိမ်းမီက ဘွန်ဂျိုင်ထိုင်းပါတီတွင် အမတ် ၇၁ နေရာရှိခဲ့ပြီး၊ ဖွေထိုင်းပါတီနှင့် ပြည်သူ့ပါတီတို့က ၁၄၀ နှင့် ၁၄၃ နေရာ အသီးသီး ရရှိထားခဲ့ကြသည်။
#MeKongNews
#ရွေးကောက်ပွဲ
#ထိုင်းပါတီ
#ဝန်ကြီးချုပ်လောင်း
#ကြေညာ
