မဲခေါင်၊ ဒီဇင်ဘာ ၆
ဆယ်စုနှစ် ၆ ခုအတွင်း အဆိုးရွားဆုံးမိုးခေါင်ရေရှားမှုကြုံတွေ့နေရသော အီရန်နိုင်ငံမြို့တော် တီဟီရန် ရှိ အဓိကရေပေးဝေရာ ရေလှောင်ကန်ကြီးတွင် ရေလက်ကျန် ၈ ရာခိုင်နှုန်းသာ ကျန်ရှိတော့သဖြင့် မည်သို့မျှ မဖြေရှင်းနိုင်တော့ဘဲ ရေဒေဝါလီခံမြို့အဖြစ်သတ်မှတ်ကာ မြို့နေလူသား ၁၅ သန်းလုံး ပြောင်းရွှေ့ရမည့်အခြေအနေ အလွန်နီးကပ်လာပြီဖြစ်သည်။
အီရန်တွင် မိုးခေါင်လွန်းသဖြင့် မြေအောက်ရေလက်ကျန်သည်ပင်လျှင် ခမ်းခြောက်လုနီးအခြေအနေ ရောက်နေပြီး တီဟီရန်မြို့နေပြည်သူ ၄ ပုံ ၁ ပုံအတွက် အဓိက ရေပေးဝေရာ ကာရက်ဂျ်ရေလှောင်ကန် အတွင်း လက်ကျန်ရေ ၈ ရာခိုင်နှုန်းသာ ကျန်ရှိတော့သည်။
ယင်းကာရက်ဂျ်ရေလှောင်ကန်သည် အရှေ့အလယ်ပိုင်းဒေသတွင် အကြီးများဆုံးရေလှောင်ကန်ဖြစ်ကာ ယခုနှစ်အတွင်း ကန်ရေကျဆင်းမှု သည့် ၉၀ ရာခိုင်နှုန်းအထိ ရှိလာပြီး မြို့မပြောင်းရရေးအတွက် နောက်ဆုံးမျှော်လင့်ချက်သည် မိုးပြန် လည်ရွာသွန်းရန်သာ ရှိတော့သည်ဟု ပညာရှင်များကပါ သုံးသပ်နေကြသည်။
တီဟီရန်မြို့တော်ရေပေးဝေရေး အဖွဲ့အကြီးအကဲ ကာဗန်နာဒါဗီက ကပ်ဘေးဆိုသည်ထက်ပင် ပိုဆိုးသည့် ရေရှားပါးမှုမျိုးကြုံနေရပြီး တက္ကသိုလ်အဆောင်များတွင် ရေချိုးခန်းများ ရေပိတ်ရခြင်း၊ ရေအား လျှပ်စစ်ပေးရာဆည်တွင်လည်း ရေမရှိတော့သဖြင့် လုပ်ငန်းရပ်ဆိုင်းလိုက်ရခြင်းတို့ကြောင့် မြို့တော် သည် ရေဒေဝါလီခံကာ ပြောင်းရွှေ့ရမည့်အရေး အလွန်နီးကပ်နေပြီဟု ပြောကြားသွားခဲ့သည်။
တီဟီရန်နေ့စဉ်ထုတ်သတင်းစာ အယ်ဒီတာ့အာဘော်တွင်လည်း နိုင်ငံခေါင်းဆောင် ခါမီနီ၏ ပိတ်ဆို့ခံရခြင်းများကြောင့် ကိုယ်ထူကိုယ်ထ စိုက်ပျိုးရေးကဏ္ဍဖြင့် စီးပွားရေးတော်လှန်မှုဆိုသည်မှာ မိုးလည်း မရွာ၊ ရေလည်းမရှိတော့ခြင်းကြောင့် မည်သို့မျှ မဖြစ်နိုင်တော့သော မူဝါဒဖြစ်သည်ဟု ရဲရင့်စွာဖြင့် ရေးသားဖော်ပြသွားခဲ့သည်။
ကိုကလင်း
Ref: Thesun
#MeKongNews
#အီရန်
#တီဟီရန်
#ရေလှောင်ကန်
#မိုးခေါင်ရေရှား
