မဲခေါင်၊ နို၀င်ဘာ ၁၇
စစ်တပ် အာဏာသိမ်းထားတဲ့ ကာလ အတွင်း KNU နယ်မြေထဲမှာ စစ်တပ်နဲ့ KNLA အပါအဝင် မဟာမိတ် ပူးပေါင်းတပ်တွေကြား တိုက်ပွဲ အကြိမ်ရေ ၁၀,၀၀၀ ကျော် ဖြစ်ပွားခဲ့တယ်လို့ KNU ပြောရေးဆိုခွင့်ရှိသူ ဖဒို စောတောနီးက ဒီကနေ့ ထုတ်ပြန်ပြောဆိုပါတယ်။
၂၀၂၁ ခုနှစ်၊ ဖေဖော်ဝါရီ ၁ ရက်နေ့ကနေ ၂၀၂၃ ခုနှစ်၊ စက်တင်ဘာ ၃၀ ရက်နေ့အထိ KNU နယ်မြေထဲမှာ တိုက်ပွဲ ၁၁,၆၀၈ ကြိမ် ဖြစ်ပွားခဲ့ရာ အဆိုပါ တိုက်ပွဲတွေ အတွင်း စစ်ကောင်စီ တပ်သား ၁၀,၇၄၁ ဦးကို သုတ်သင်နိုင် ခဲ့တယ်လို့ ဖဒိုစောတောနီး ကဆိုပါတယ်။
ဒီတိုက်ပွဲတွေ အတွင်း စစ်ကောင်စီဘက်က ဒဏ်ရာရသူ ၇,၇၇၉ ဦးအထိ ရှိခဲ့တယ်လို့ ဖော်ပြပါတယ်။
စစ်ကောင်စီတပ် ဖွဲ့စည်းပုံအရ တပ်မ တစ်ခုကို တပ်ရင်း ၁၀ ရင်းနဲ့ ဖွဲ့စည်းထားရာ တပ်မ တစ်ခုမှာ ဖွဲ့စည်းပုံ အင်အား ၁၀,၀၀၀ ရှိဖို့ လိုပေမယ့် လက်ရှိ အင်အား ၃,၀၀၀ သာရှိပြီး ရှေ့တန်းထွက် တိုက်ပွဲဝင်နိုင်တဲ့ အင်အား ၇၀၀ သာ ရှိတယ်လို့ ဖဒို စောတောနီးက ပြောပါတယ်။
အဆိုပါ ဖွဲ့စည်းပုံအရ KNU နယ်မြေအတွင်း စစ်သား သေဆုံးမှုဟာ တပ်မ ၂၆ ခုနဲ့ ညီမျှတယ်လို့ သုံးသပ်ပြီး လက်ရှိ စစ်တပ် ဖွဲ့စည်းပုံ အင်အားအရ ရှမ်းပြည် မြောက်ပိုင်း တိုက်ပွဲ စစ်မြေပြင်ကို စစ်ကူ ပို့နိုင်တော့မှာ မဟုတ်သလို ပြုန်းတီး အင်အား ပြန်လည် ဖြည့်နိုင်မှာ မဟုတ်ဘူးလို့ ဖဒို စောတောနီးက သုံးသပ်ပါတယ်။
လက်ရှိ တိုက်ပွဲတွေဟာ အဖြူအမည်း သဲကွဲနေပြီး စစ်တပ်ဘက်က ဆုံးရှုံးမှုတော့မှာဖြစ်လို့ စစ်သားတွေ အနေနဲ့ အချိန်မနှောင်းခင် တော်လှန်ရေး အင်အားစုတွေနဲ့ လက်တွဲ ပူးပေါင်း ဘက်ပြောင်းလာဖို့နဲ့ ရှိတဲ့နေရာမှာ ဖြစ်တဲ့နည်းနဲ့ စစ်ကောင်စီကို အပြုတ်တိုက်ဖို့ သူက တိုက်တွန်းပါတယ်။
KNU အနေနဲ့ စစ်အာဏာရှင်ကို တော်လှန် တိုက်ပွဲဝင်သူတွေနဲ့ အဆုံးထိ လက်တွဲသွားမယ် ဆိုတဲ့ ကြေညာချက်နဲ့ အညီ လက်ရှိ အာဏာရှင် တော်လှန်ရေး ဆက်လက် တိုက်ပွဲဝင်နေတဲ့ အပြင် လူသားချင်း စာနာထောက်ထားမှု အပေါ် အခြေခံကာ ပြည်သူလူထု ထောင်သောင်းမက လက်ခံ ကျွေးမွေး စောင့်ရှောက် ခဲ့တယ်လို့ ဆိုပါတယ်။
ဒါ့အပြင် စစ်အာဏာရှင် တော်လှန်လိုတဲ့ လူငယ်တွေကို KNU နယ်မြေမှာ စစ်သင်တန်းပေးတာ၊ အတူလက်တွဲ တိုက်ပွဲဝင်တာတွေ အပြင် လူငယ်တွေကို နေရာအနှံ့ စိမ့်ဝင်နိုင်အောင် ဆောင်ရွက်ထားပြီး အချိန်အခါကောင်းကို စောင့်နေကြတယ်လို့လည်း ဖဒိုစောတောနီးက ထုတ်ဖော် ပြောဆိုပါတယ်။
လက်ရှိ စစ်ကောင်စီတပ်ဟာ နိုင်ငံရေးအရရော စစ်ရေးအရာပါ ဆောက်တည်ရာမရ ဖြစ်နေပြီး လုပ်ရိုးလုပ်စဉ် အတိုင်း ပြည်သူလူထု ဝေဝါးစေနိုင်တာတွေ လုပ်ဆောင်တော့မှာဖြစ်လို့ တော်လှန်ရေး အင်အားစုတွေ အားလုံး အပါအဝင် ပြည်သူတွေ အနေနဲ့ စစ်အာဏာရှင်စနစ် ပြုတ်ကျရေး ဆက်လက် လုပ်ဆောင်ကြဖို့ ဖဒို စောတောနီးက တိုက်တွန်းပြောဆိုပါတယ်။
MK-009
#MekongNews
#KNU
#ဖဒိုစောတောနီး
#နိုင်ငံရေး_စစ်ရေး