မဲခေါင်၊ မတ် ၆
တာချီလိတ်မြို့မှာ မတ်လ ၅ရက်ညပိုင်းက အွန်လိုင်းငွေလိမ်လုပ်ငန်း – ကျားဖြန့် တစ်ခုကို ဝင်ရောက်ဖမ်းဆီးရာမှာ လူရာဂဏန်းနီးပါး ဖမ်းမိသွားတယ်လို့ ဒေသခံတွေထံက သိရပါတယ်။
ဖမ်းဆီးခံရတဲ့ ကျားဖြန့်လုပ်ငန်းဟာ တာချီလိတ်မြို့၊ ပုန်းထွန်ရပ်ကွက်ထဲမှာရှိတဲ့ ပုန်းထွန်စိမ်းလမ်းသောတောင် အနီးမှာ တည်ရှိပြီး ည ၁၁နာရီ ဝန်းကျင်က ဖမ်းဆီးခံရတာဖြစ်တယ်လို့ ဒေသခံတစ်ဦးက မဲခေါင်ကို ပြောပါတယ်။
“မြန်မာတွေရော၊ ထိုင်းတွေရော၊ တရုတ်တွေရော လူတွေအများကြီးပဲ၊ ဆေးရုံကားတွေနဲ့အပြည့်၊ ရဲကားတွေနဲ့အပြည့်ပဲ။ တချို့တွေလည်း အုတ်တံတိုင်း ကျော်ပြီးထွက်ပြေးကြတာရှိတယ်။ လွတ်လား၊ မလွတ်လားတော့မသိဘူး။ အော်ဟစ်ပြီးလိုက်ဖမ်းကြတယ်” လို့ သူကပြောပါတယ်။
ဖမ်းဆီးခံရသူ အရေအတွက်ဟာ ရာဂဏန်းခန့်ရှိတယ်လို့ သိရပြီး ကျားဖြန့်လုပ်ငန်းလုပ်တဲ့နေရာကို သေဆုံးသွားတဲ့ အာခါလူမျိုးခေါင်းဆောင်ပိုင်ဆိုင်တာ ဖြစ်တယ်လို့ နီးစပ်တဲ့ သတင်းရင်းမြစ်တစ်ဦးက ပြောပါတယ်။
ဖမ်းဆီးရမိသူတွေကို ကျိုင်းတုံမြို့ကို တခါထဲခေါ်သွားတယ်လို့ သိရပြီး နောက်ဆက်တွဲအခြေအနေကိုတော့ မသိရသေးပါဘူး။
တာချီလိတ်မြို့မှာရှိတဲ့ ကျားဖြန့်လုပ်ငန်းတွေနဲ့ အွန်လိုင်းလောင်းကစားလုပ်ငန်းတွေကို မြန်မာစစ်တပ်က ဦးစီးကာ ဒီရက်ပိုင်းထဲ ပိုက်စိပ်တိုက်ဖမ်းနေပြီး ဖေဖော်ဝါရီလ ၂၃ရက်ညပိုင်းမှာ လူ ၇၀၀ ကျော်နဲ့ ဖေဖော်ဝါရီလ ၂၅ရက်မှာ လူ ၂၀၀ ကျော်ဖမ်းဆီးရမိခဲ့ပါတယ်။
တာချီလိတ်မှာ လုပ်ကိုင်နေတဲ့ ကျားဖြန့်လုပ်ငန်းနဲ့ အွန်လိုင်းလောင်းကစားလုပ်ငန်းတွေဟာ ရဲနဲ့ အာဏာပိုင်အချို့ကို လိုင်းကြေးပေးထားပေမယ့် စစ်တပ်က ဝင်ဖမ်းချိန်မှာတော့ ကြိုတင်သတင်းရရှိခြင်းမရှိဘဲ ဖမ်းဆီးခံရတာဖြစ်ပါတယ်။
MK – 004