မဲခေါင်၊ ဖေဖော်ဝါရီ ၂၃
တာချီလိတ်မြို့ပေါ်မှာရှိတဲ့ အွန်လိုင်းလောင်းကစားလုပ်တဲ့နေရာတွေကို စစ်တပ်က ဝင်ရာက်ဖမ်းဆီးခဲ့တာမှာ တာချီလိတ်မြို့ပေါ်က လူငယ် အမျိုးသား၊ အမျိုးသမီးတွေ အပါအဝင် လူ ၄၀၀ ကျော်လောက် ဖမ်းဆီးခံထားရတယ်လို့ သိရပါတယ်။
ဖေဖော်ဝါရီလ ၂၂ရက် အကုန် ၂၃ရက်အကူး ညသန်းခေါင်ကစပြီး တာချီလိတ်မြို့ထဲက အွန်လိုင်းလောင်းကစားလုပ်ကိုင်တဲ့နေရာ အနည်းဆုံး ၃နေရာကို စစ်တပ်က ဝင်ရောက်ဖမ်းဆီးခဲ့ပြီး ဖမ်းဆီးခံရသူတွေထဲ တရုတ်နိုင်ငံသားနဲ့ ထိုင်းနိုင်ငံသားတွေလည်း ပါဝင်တယ်လို့ သတင်းရင်းမြစ်တွေထံက သိရပါတယ်။
ဖမ်းဆီးခံထားရသူတွေထဲ အမျိုးသားသပ်သပ်၊ အမျိုးသမီးသပ်သပ် ခွဲခြားထားပြီး အမျိုးသားတွေကို အချုပ်ကားတွေနဲ့တင်ဆောင်သွားပေမယ့် အမျိုးသမီးတွေကိုတော့ အခန်းတွေခွဲပြီး ထားတယ်လို့သိရပါတယ်။
ဖမ်းဆီးခံရတဲ့ နေရာတွထဲမှာ ထိုင်းနိုင်ငံမယ်ဆိုင်မြို့နဲ့ရေချောင်းသာခြားတဲ့ ဆန်ဆိုင်း(က)ရပ်ကွက်က တစ်နေရာ၊ တာချီလိတ်ရွှေတိဂုံဘုရားအောက်ဘက်ကက အရင်မြရွှေရည်ဟိုတယ်နေရာနဲ့ ဆန်ဆိုင်း (ခ)ရပ်ကွက်ထဲက တစ်နေရာပါဝင်တယ်လို့ သတင်းရင်းမြစ်က ပြောပါတယ်။
ဖမ်းဆီးတဲ့အဖွဲ့တွေထဲမှာ မြန်မာစစ်တပ်က စစ်သားတွေပဲ ပါဝင်ပြီး ရဲတွေမပါဝင်သလို ဘာကြောင့်ဝင်ဖမ်းတယ်ဆိုတာကိုလည်း မသိရဘူးလို့ အဲဒီသတင်းရင်းမြစ်က ပြောပါတယ်။ လက်ရှိမှာ ဖမ်းဆီးခံရသူတွေကို မှတ်ပုံတင်စစ်ဆေးနေတယ်လို့ သိရပါတယ်။
ရွှေတြိဂံဒေသက နယ်စပ်မြို့ဖြစ်တဲ့ တာချီလိတ်မြို့မှာ အရင်ကတည်းက အွန်လိုင်းလောင်းကစားလုပ်ငန်းတွေ တည်ရှိနေပြီး တာချီလိတ်ဒေသခံနဲ့ တာချီလိတ်ကို လာရောက်အလုပ်လုပ်ကိုင်တဲ့ လူငယ်တွေဟာ အဲဒီလုပ်ငန်းမှာ ဝင်ရောက်လုပ်ကိုင်ကြသလို ထိုင်းနိုင်ငံဘက်ကနေလည်း ထိုင်းလူငယ်တွေနေ့ချင်းပြန် လာရောက်လုပ်ကိုင်ကြပါတယ်။
စစ်တပ်အာဏာမသိမ်းခင် တစ်နှစ်ခန့်နဲ့ အာဏာသိမ်းပြီးနောက်ပိုင်းကာလတွေမှာ အွန်လိုင်းလောင်းကစားလုပ်ငန်းနဲ့ ဆင်တူတဲ့ ကျားဖြန့်(အွန်လိုင်းငွေလိမ်ဂိုဏ်း)တွေ တာချီလိတ်မှာ အခြေချလာပြီး အွန်လိုင်းလောင်းကစားအလုပ်လို့ လိမ်လည်ကာ ကျားဖြန့်လုပ်ငန်းတွေမှာ အလုပ်ခေါ်ယူတာတွေရှိခဲ့သလို လူငယ်အများအပြား ကျားဖြန့်လုပ်ငန်းတွေမှာ ရောင်းစားခံရတာတွေ ရှိခဲ့ပါတယ်။
၂၀၁၉ခုနှစ်အတွင်းကလည်း တာချီလိတ်မြို့အတွင်းက အွန်လိုင်းလောင်းကစားလုပ်ငန်းလုပ်တဲ့ နေရာ ၃နေရာကို စစ်တပ်က ဝင်ဖမ်းခဲ့ပြီး တရုတ်နိုင်ငံသား ၁၈၀ကျော်ကို ဖမ်းဆီးရမိခဲ့ပါသေးတယ်။
MK – 012