တရုတ် ကြက်သွန်နီ ဝင်ရောက်မှုကြောင့် ယခု သီတင်းပတ် အတွင်း ပြည်တွင်း ကြက်သွန်နီဈေး ကျဆင်းခဲ့ ပေမယ့် ဗီယက်နမ် ကုန်သည်တွေ ဝယ်ယူနေတာကြောင့် ဈေးပြန်တက်လာနိုင်တယ်လို့ ဘုရင့်နောင် ကုန်စည်ဒိုင်မှ တာဝန်ရှိသူ တစ်ဦးက ပြောပါတယ်။
ပြီးခဲ့တဲ့ အပတ်က တရုတ် ကြက်သွန်နီတွေ စတင် ဝင်ရောက်လာမှုနဲ့ အတူ ပြည်တွင်းက ကုန်သည်တွေ သိုလှောင်ထားတာ ပြန်ထုတ်ရောင်းလာတာကြောင့် ဈေးကျတာ ဖြစ်တယ်လို့ ၎င်းကပြောပါတယ်။
“ တရုတ်ဘက်က ကြက်သွန်ဝင်လာတာရယ် စက်တင်ဘာလဆန်း လောက်က ကုန်အဝင် နည်းတာကြောင့် ဈေးက တော်တော်မြင့်သွားတယ်။ အသစ်က ပေါ်ချိန် ရောက်တော့ လက်ကျန်တွေ ထွက်လာတာ၊ ဗီယက်နမ်ဘက်က အဝယ်လိုက်နေတော့ ဈေးက ပြန်တက်နိုင်ချေ ရှိတယ်။ စိုက်တဲ့သူတွေ သိပ်မထိခိုက်နိုင်ဘူး၊ ဈေးကို ထိန်းချင်လို့ လှောင်ထားတာတွေလည်း ထုတ်ရောင်းနေတော့ ဈေးကကျလာတာ” လို့ ၎င်းက ရှင်းပြပါတယ်။
စက်တင်ဘာလ ၂၁ ရက်နေ့က တစ်ပိဿာကို ၂၈၀၀ ကျပ်ကနေ ၃၂၀၀ ကျပ်ကြားရှိခဲ့တဲ့ ဆိပ်ဖြူ ကြက်သွန်နီဟာ စက်တင်ဘာလ ၃၀ ရက်နေ့မှာ တစ်ပိဿာကို ၂၄၀၀ ကျပ်ကနေ ၃၀၅၀ ကျပ်အထိ ပြန်လည် ကျဆင်းခဲ့ပါတယ်။
ပြီးခဲ့တဲ့ သြဂုတ်လက ကုန်စည်ဒိုင်အဖွင့်ဈေး အနေနဲ့ ကြက်သွန်နီ တပိဿာ ကျပ် ၃၀၀၀ ကနေ ၄၅၀၀ ကြားရှိကာ ပြင်ပ ဈေးကွက်မှာတော့ ကျပ် ၅၀၀၀ ကျော်အထိ စံချိန်တင် မြင့်တက်ခဲ့ပါတယ်။
လာမယ့် နိုဝင်ဘာလမှာ မန္တလေးတိုင်း၊ စစ်ကိုင်းတိုင်း၊ မကွေးတိုင်းတို့မှာ စိုက်ပျိုးထားတဲ့ ကြက်သွန်နီ ဧက ၁ သိန်းနီး ပါးဈေးကွက်ထဲ ဝင်ရောက်လာဖို့ ရှိနေပါတယ်။