မဲခေါင်၊ သြဂုတ် ၇
စင်ကာပူအခြေစိုက် United Overseas Bank ဘဏ် ကလုပ်ငန်းသုံးငွေလွှဲငွေပေးချေမှုတွေကို ယာယီဆိုင်းငံ့ဖို့ ရှိနေတဲ့အတွက် ဆီပြတ်လပ်မှုနဲ့ ဈေးနှုန်းမြင့်တက်မှုတွေရှိလာနိုင်တယ်လို့ ဆီလုပ်ငန်းရှင်အသိုင်းအဝန်းက သိရပါတယ်။
UOB ဘဏ်ဟာ မြန်မာနိုင်ငံက စက်သုံးဆီ နဲ့ စားသုံးဆီ လုပ်ငန်းရှင်တွေ အများဆုံး အသုံးပြုနေတဲ့ ဘဏ်ဖြစ်ပြီး၊ စက်တင်ဘာ ၁ ရက်ကစလို့ ရပ်နားမှုစတင်ကာ အီလက်ထရောနစ်စနစ်နဲ့ နိုင်ငံခြားငွေလွှဲပြောင်းပေးတဲ့စနစ် (Telegraphic transfer) ပါ အသုံးပြုလို့မရနိုင်တာကြောင့် အခက်ခဲတွေနဲ့ကြုံတွေ့ရမှာဖြစ်တယ်လို့ လုပ်ငန်းရှင်များက ပြောပါတယ်။
“ပို့ကုန်သွင်းကုန်၊ လုပ်ငန်းရှင်တော်တော်များများ အသုံးပြုတဲ့ဘဏ်ဆိုလည်း မမှားဘူး၊ ဆီသမားတွေအကြပ်ရိုက်မှာတော့ မလွဲဘဲ၊ စစ်ကောင်စီ ဟိုနေ့ကမှခေါ်ပြီး စက်သုံးဆီကိုတာစနစ်ကို လုပ်ငန်းရှင်တစ်ဦးကို ပုံမှန်ထက် ၅၀ ရာခိုင်နှုန်း လျော့ချသွင်းခိုင်းထားတာ၊ နိုင်ငံခြားငွေကိုလည်း ဗဟိုဘဏ်က သတ်မှတ်တဲ့ ၂၁၀၀ နှုန်းနဲ့ကို ၅၀ ရာခိုင်နှုန်းဘဲ၊ ရောင်းပေးမယ် လိုတာကိုအပြင်ကဝယ်ခိုင်းနေတာ၊ အခုအခြေနေတိုင်းသာဆို ဆီပြတ်လပ်မှုတွေ၊ ဈေးကြီးမြင့်လာတာတွေက ဖြစ်လာတော့မယ်” လို့ စက်သုံးဆီအသိုင်းအဝန်းက နီးစပ်သူတစ်ဦးကပြောပါတယ်။
မြန်မာ့နိုင်ငံခြားကုန်သွယ်မှုဘဏ်(MFTB) နဲ့ မြန်မာ့ရင်းနှီး မြှုပ်နှံမှုနှင့် ကူးသန်းရောင်းဝယ်ရေးဘဏ် (MICB) တို့ကို အမေရိကန်က ပိတ်ဆို့အရေးယူကြောင်း ကြေညာတဲ့ ဇွန် ၂၁ ရက်နောက်ပိုင်းကစလို့ UOB ဘဏ်မှာ အကောင့်ဖွင့်လှစ်အသုံးပြုနေတဲ့ မြန်မာလုပ်ငန်းရှင်တွေရဲ့ ငွေပေးချေမှုတွေကို ဘဏ်ဘက်က ပိုပြီးတင်းကြပ်လာခဲ့တယ်လို့ ဆိုပါတယ်။
အခြားသော နိုင်ငံခြားဘဏ်တွေ ရှိနေပေမယ့် လုပ်ငန်းသုံးငွေလွှဲတာအတွက် မလုံခြုံတာ၊ ကြန့်ကြာတာတွေရှိတာကြောင့် UOB ဘဏ်ကနေ အလွယ်တကူ နိုင်ငံပြောင်းဆောင်ရွက်နေရပြီး အခုကြေညာချက်ကြောင့် ပို့ကုန်သွင်းကုန်လုပ်ငန်းတွေမှာ ပိုပြီးအခက်အခဲကြုံလာရလိမ့်မယ်လို လုပ်ငန်းရှင်များက သုံးသပ်ပြောဆိုထားပါတယ်။
စစ်ကောင်စီက ပြီးခဲ့တဲ့ ဇွန်လနောက်ဆုံးအပတ်မှာ ဆီလုပ်ငန်းရှင်များအား အထူးအရေးပေါ်အစည်းအဝေးဟုဆိုကာ နေပြည်တော်သို့ဖိတ်ခေါ်ပြီး၊ ဖိအားပေးတင်းကြပ်မှုတွေလုပ်ဆောင်ခဲ့တယ်လို့ သိရပါတယ်။
စစ်ကောင်စီကို နိုင်ငံတကာက အရေးယူပိတ်ဆို့မှုတွေလုပ်ဆောင်လာတာကြောင့် နိုင်ငံခြားငွေလိုအပ်ချက်ပိုမိုမြင့်တက်လာပြီး ငွေစက္ကူအသစ်ရိုက်ထုတ်တဲ့အထိဖြစ်လာနေတာလို့ သုံးသပ်သူက ပြောပါတယ်။
“အခု ၂သောင်းတန်ကြောင့် ဆီဈေးကအတက်အကျ မတည်ငြိမ်ဘူး၊ အခုထပ်ပြီး ဒီလိုသာဆိုရင် ဆီဝယ်ယူရတဲ့နေရာမှာ အခက်ခဲတွေကြုံလာနိုင်တယ်၊ ဆီကုန်သည်အကြီးတွေက လှောင်ပြီးထုတ်မရောင်းရင် အခက်ခဲက အောက်ခြေက သူတွေအခက်ခဲပိုဖြစ်နိုင်တယ်” လို့ စက်သုံးဆီ အသေးစား အရောင်းအဝယ်လုပ်သူတစ်ဦးက ဆိုပါတယ်။
စစ်ကောင်စီ ၂သောင်းတန် ငွေစက္ကူအသစ် ထုတ်ဝေမယ်လို့ သတင်းထုတ်အပြန်ပြီးကတည်းက စက်သုံးဆီဈေးမှာ တစ်ရက်လျှင် ၁၀၀ကျပ် လောက်မြင့်တက်မှုရှိနေပြီး ၊ လက်ရှိမှာတော့ ဆယ်ဂဏန်းသာ ပြန်လည်ကျဆင်းမှုရှိပြီး ဈေးတည်ငြိမ်မှုမရှိဘူးလို့လည်း သိရပါတယ်။
MK-006
#MeKongNews
#UOB
#စက်သုံးဆီ
#စားသုံးဆီ