မဲခေါင်၊ သြဂုတ်၂၃

စားသုံးဆီဈေးနှုန်း ပြင်ပလက်လီဈေးကွက်မှာ ၁ ပိဿာ တစ်သောင်းကျော်နေတာက နိုင်ငံတော်ရဲ့ စေတနာနဲ့ ပံ့ပိုးပေးထားတဲ့ ဆောင်ရွက်မှုတွေက အရာမထင်တဲ့ ပုံစံမျိုးပေါက်နေတယ်လို့စစ်ကောင်စီလက်အောက်ခံ ရင်းနှီး/စီးပွား (MIFER) ဒုတိယဝန်ကြီး ဒေါက်တာဝါဝါမောင်က ပြောပါတယ်။

‘‘ဒီနေ့ စားအုန်းဆီ ရည်ညွှန်းဈေးက ၄၀၆၅ ကျပ် ဖြစ်ပါတယ်။ လက်ကားဈေးက ၈၀၀၀ ကျပ် ၊ဘုရင့်နောင်လက်ကားဈေးက ၉၀၀၀ ကျပ် ဖြစ်ပါတယ်။ လက်လီဈေးက ၁၀၀၀၀ ကျပ်ပေါက်နေပါတယ်။ ဒါ့ကြောင့်မို့လို့ ၅၀ ရာခိုင်နှုန်းကို စက်သုံးဆီ၊ စားသုံးဆီတွေမှာ ထောက်ပံ့ဈေးနဲ့ ပေးထားတာ။ သယ်ယူပို့ဆောင်ရေးစရိတ်တွေ တက်လို့။ နောက်တစ်ခုက ထုတ်လုပ်မှုကုန်ကျစရိတ်တွေ တက်လို့ဆိုပြီး ဈေးတွေကို တက်ပြီး ရောင်းတဲ့အခါမှာ FESC ကနေပြီးတော့ နိုင်ငံတော်ရဲ့ စေတနာနဲ့ ပံ့ပိုးပေးထားတဲ့ ဆောင်ရွက်မှုတွေက အရာမထင်တဲ့ ပုံစံမျိုးပေါက်နေတဲ့ အနေအထား ဖြစ်ပါတယ်’’လို့ မနေ့က နေပြည်တော်မှာ လုပ်တဲ့ စစ်ကောင်စီသတင်းစာ ရှင်းလင်းပွဲမှာ ဒုဝန်ကြီး က ပြောပါတယ်။

စားသုံးဆီမလုံလောက်တဲ့အတွက် ပြည်ပမှတင်သွင်းနေရပြီး ၊ စားသုံးဆီတင်သွင်းမှုအတွက် သုံးစွဲရတဲ့ နိုင်ငံခြားငွေ ၅၀ ရာခိုင်နှုန်းကို အစိုးရထောက်ပံ့ ငွေလဲလှယ်နှုန်းနှင့်ရောင်းပေးနေသော်လည်း လက်လီဈေးကွက်မှာ စားအုန်းဆီတပိဿာ ၁ သောင်းကျော် ဖြစ်ပေါ်နေတယ်လို့ သူက ပြောပါတယ်။

လက်တွေ့မြေပြင်မှာ နိုင်ငံတကာအရေးယူပိတ်ဆို့မှုတွေ စီးပွားရေးကဏ္ဍအပေါ် စီမံခန့်ခွဲမှုညံဖျင်းတာကြောင့် ငွေစက္ကူအသစ်ထုတ်ဝေရတဲ့အထိဖြစ်နေပြီ ဒေါ်လာငွေရှားပါးလာတာကြောင့် ဒေါ်လာငွေအဓိကတိုက်ရိုက်အသုံးပြုရတဲ့ စားဆီနဲ့ စက်သုံးဆီ တင်သွင်းခွင့်၊ ဖြန့်ချိခွင့်တွေကို ထိန်းချူပ်ထားတာကြောင့် ပြင်ဈေးကွက်မှာ ဆီပြတ်လပ်လာပြီး ဈေးနှုန်းအဆမတန်မြင့်တက်နေရတယ်လို့ ဆီလုပ်ငန်းရှင်များက ပြောပါတယ်။

“ သူတို့အာဏာသိမ်းပြီးကတည်းက ကိုတာစနစ်နဲ့ဘဲ ဆီကိုရတော့တာ၊ ပြီးခဲ့တဲ့၂ လလောက်ကတည်းက ဒေါ်လာက အကြောင်းအမျိုးမျိုးတွေဖြစ်ပြီး တော်တော်ရှားလာတော့ သူတို့ထုတ်ရောင်းပေးစရာမရှိတော့ တင်သွင်းခွင့်ကို ၅၀ ရာခိုင်နှုန်းလျော့ချလိုက်တယ်၊ အဲ့မှာမှ သူတို့နဲ့ပနာသင့်ကုန်သည်ကိုကြတော့ ဆီပေးတယ်၊ တစ်ချို့ဈေးကွက်ထဲတကယ် ရောင်းချတဲ့သူကြမရတော့ ပစ္စည်းပြတ်ပြီး၊ ဈေးတွေတက်ကုန်တာ၊ ဘာကြောင့်ဖြစ်တာသိရဲ့သားနဲ့ ဟန်လုပ်နေတာ” လို့ ဆီလုပ်ငန်းရှင်တစ်ဦးကဆိုပါတယ်။

စားသုံးဆီများပြတ်လပ်မှုရှိနေတာကြောင့် ထိုင်းဘက်ကအဝင်ဟင်းသီးဟင်းရွက်ဆီတွေ ကန်ဆီအဖြစ်ရောင်းချနေရပြီး လက်ရှိမှာ ထိုင်းကုန်အဝင်မရတော့တဲ့အတွက် ပစ္စည်းပြတ်ကာ ဈေးတက်နေရတယ်လို့ သိရပါတယ်။

မြန်မာနိုင်ငံမှာ စားအုန်းဆီ သုံးစွဲမှု ပမာဏမှာ တန်ချိန် ၁၀ သိန်းကျော်ခန့်ရှိပြီး မလေးရှားနိုင်ငံနဲ့ အင်ဒိုနီးရှားနိုင်ငံတို့မှ တန်ချိန် ၇ သိန်းကျော်ကို ပြည်ပမှ တင်သွင်းနေရတယ်လို့ စစ်ကောင်စီက ဖော်ပြတဲ့သတင်းအချက်အလက်အရသိရပါတယ်။

MK-006

#MeKongNews

#စားသုံးဆီ

#စစ်ကောင်စီ

#ပြင်ပဈေး

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)