မဲခေါင်၊ မတ် ၁၁
ရှမ်းပြည်နယ်တောင်ပိုင်း၊ အမှတ် ၁၀၀၈ တပ်ရင်း Southern Shan Revolution Youth -SSRY တပ်ရင်းရဲ့ တပ်ခွဲ ၁ ဖြစ်တဲ့ Eagle Force တပ်က မတ်လ ၉ ရက်နေ့ကစပြီး ရဲဘော်သစ်တွေ ဖိတ်ခေါ်နေတယ်လို့ တပ်ခွဲတာဝန်ရှိသူက ပြောပါတယ်။
ရဲဘော်ခေါ်ယူရာမှာ အမျိုးသမီး ၁၀ ယောက် နဲ့ အမျိုးသား ၁၉ဝ ယောက်၊ စုစုပေါင်း ရဲဘော် အယောက် ၂၀၀ ကို ခေါ်ယူသွားမှာဖြစ်တယ်လို့ဆိုပါတယ်။
“ မိခင်ရှမ်းတောင်ကို အမြန်ဆုံးဝင်ရောက်နိုင်ဖို့၊ တိုက်ခိုက်ရေးစွမ်းရည်ပြည့်ဝပြီး ကိုယ့်မြေကို ကာကွယ်လိုတဲ့သူတွေကို ဖိတ်ခေါ်တာပါ။ ပြီးတော့ မြို့ပေါ်မှာ စစ်ကောင်စီတပ်က ပေါ်တာဆွဲတာတွေကို မြင်ရကြားရတော့ ပြည်သူအချင်းချင်းကြား ရှေ့တန်းမှာ ပြန်မတိုက်ချင်လို့ပါ။” လို့ သူက ပြောပါတယ်။
ရဲဘော်/ရဲမေတွေအနေနဲ့ အသက် ၁၈ နှစ်ပြည့်ပြီး ကျန်းမာရေးအထူးကောင်းမွန်သူ၊ ပေးအပ်တဲ့တာဝန်နဲ့ ဝတ္တရားကို ကျေပွန်အောင်ထမ်းဆောင်နိုင်ပြီး ပြည်သူလူထုရဲ့ အသက်အိုးအိမ်စည်းစိမ်ကို ကာကွယ်နိုင်ရမယ်လို့ ဆိုပါတယ်။
ဒါ့အပြင် တပ်ဖွဲ့က ပို့ချတဲ့ နိုင်ငံရေး၊ စစ်ရေးစစ်ရာတွေကို လေ့လာသင်ကြားနိုင်ပြီး မူဝါဒနဲ့ နည်းဥပဒေတွေကို လိုက်နာနိုင်တဲ့အပြင် ဖက်ဒရယ်ဒီမိုကရေစီ ပြည်ထောင်စုပေါ်ပေါက်လာတဲ့အထိ အတူတကွတိုက်ပွဲဝင်လိုတဲ့သူဖြစ်ရမယ်လို့ သိရပါတယ်။
Eagle Force တပ်ဖွဲ့က ကရင်နီပြည်နယ်နဲ့ ရှမ်းပြည်တောင်ပိုင်းက ရှေ့တန်းစစ်မျက်နှာပြင်တွေမှာ မဟာမိတ်ပူးပေါင်းတပ်တွေနဲ့အတူ ပါဝင်တိုက်ခိုက်နေပြီး တိုက်ပွဲပေါင်းများစွာကို ရင်ဆိုင်တိုက်ခိုက်ခဲ့တယ်လို့ သိရပါတယ်။
CJ-004