မဲခေါင်၊ မတ် ၈
ရှမ်းပြည်တောင်ပိုင်း၊ ပအိုဝ်းကိုယ်ပိုင်အုပ်ချုပ်ခွင့်ရဒေသအတွင်း ဖြစ်ပွားခဲ့တဲ့ တိုက်ပွဲကာလ ၄၂ ရက်အတွင်း စစ်ကောင်စီက လေကြောင်းတိုက်ခိုက်မှုကို အကြိမ်ပေါင်း ၁၅၀၀ ကျော် ပြုလုပ်ခဲ့တယ်လို့ ပအိုဝ်းလူငယ်အဖွဲ့အစည်း(Pa-O Youth Organization) PYO က ကောက်ယူထားတဲ့ စာရင်းတွေအရ သိရပါတယ်။
ပြီးခဲ့တဲ့ ဇန်နဝါရီ ၂၁ ရက်နေ့က ဟိုပုံးမြို့နယ်၊ မဲနယ်တောင်ဒေသ၊ စံဖူး(လုံးဟီး)ရွာမှာ လက်နက်တွေသယ်ဆောင်လာတဲ့ ပအိုဝ်းအမျိုးသားလွတ်မြောက်ရေးတပ်မတော်(PNLA) ယာဥ်တန်းကို ပအိုဝ်းပြည်သူ့စစ်(PNA) နဲ့ စစ်ကောင်စီတို့က စစ်ဆေးပစ်ခတ်ရာကနေ တပတ်အတွင်း ဆီဆိုင်၊ ဟိုပုံး၊ မိုင်းပွန်အထိ တိုက်ပွဲတွေဆက်ဖြစ်ခဲ့ပြီး ဒီနေ့အထိလည်း ပအိုဝ်းဒေသအတွင်း အပြန်အလှန််တိုက်ပွဲတွေ ဖြစ်ပွားနေတာဖြစ်ပါတယ်။
အဲ့ဒီ စံဖူး(လုံးဟီး)ရွာဖြစ်စဥ်ကနေစပြီး PYO က ကောက်ယူထားတဲ့ ဒေတာတွေအရ ဇန်နဝါရီ ၂၁ ရက်နေ့ကနေ မတ်လ ၂ ရက်နေ့အထိ စစ်ကောင်စီက လေကြောင်းတိုက်ခိုက်မှုအနေနဲ့ ဗုံးကျဲမှု ၃၇၁ ကြိမ်အထက်နဲ့ လက်နက်ကြီးပစ်ခတ်မှု ၁၁၃၅ ကြိမ် ပြုလုပ်ခဲ့ပြီး စုစုပေါင်းအကြိမ်ရေ ၁၅၀၆ ကြိမ်ရှ်ိတယ်လို့ ဆိုပါတယ်။ ဒရုန်းနဲ့ဗုံးကြဲတိုက်ခိုက်တာတွေလည်း ပါဝင်တယ်လို့ သိရပါတယ်။
တိုက်ပွဲစတင်ပြီး တပတ်အတွင်း အရပ်သား ၁၇ ဦးသေဆုံးခဲ့ကာ ၁၇ ဦးဒဏ်ရာရရှိခဲ့ပြီး နေအိမ် ၈၀ ကျော်ပျက်စီးခဲ့ရတယ်လို့ ဆိုပါတယ်။ တိုက်ပွဲကာလ ၄၂ ရက်မြောက်နေ့ မတ်လ ၂ ရက်နေ့အထိ ကောက်ယူထားတဲ့ စာရင်းတွေအရ အရပ်သားသေဆုံးမှု စုစုပေါင်း ၄၇ ဦး၊ ထိခိုက်ဒဏ်ရာရသူ ၅၉ ဦးရှိပြီလို့ သိရပါတယ်။ စစ်တပ်နဲ့ ပအိုဝ်းပြည်သူ့စစ်(PNA) တို့ ဖမ်းဆီးခြင်းခံရတဲ့ အရပ်သား ၁၈ ဦးထိရှိထားတယ်လို့ PYO ရဲ့ မှတ်တမ်းအရသိရပါတယ်။
ပအိုဝ်းလူငယ်အဖွဲ့အစည်း(Pa-O Youth Organization) PYO ရဲ့ ဒေတာကောက်ယူမှုနဲ့ ပတ်သတ်ပြီး တာဝန်ရှိသူ မရွှေလီက “တော်တော်များများကို cover ဖြစ်တယ်လို့ ဆိုလို့ရပါတယ်။ မြေပြင်အဖြစ်အပျက်တွေက ယခုဖော်ပြထားတဲ့ ကိန်းဂဏန်းထက် ပိုများနေတယ်ဆိုတာက သေချာပါတယ်။ အခုလက်ရှိ မြေပြင် အခြေအနေကို ပြောရမယ်ဆိုရင် မြေပြင်တိုက်ပွဲပြင်းထန်ဖြစ်ပွားတဲ့ နေရာတွေမှာ ဖုန်းလိုင်း၊ အင်တာနက်လိုင်း ဖြတ်တောက်ခြင်းများကို ပိုပြီးရင်ဆိုင်လာရပါတယ်။ တချို့ဧရိယာဆို မြေပြင်တိုက်ပွဲမရှိသော်လည်း ဖုန်းလိုင်း၊ အင်တာနက်လိုင်း ဖြတ်တောက်ခြင်း ရှိနေပါတယ်။ ဒေသခံပြည်သူတွေလည်း တိမ်းရှောင်ထွက်ပြေးကြရာမှာ မတူညီတဲ့ ဧရိယာ၊ နယ်မြေများဆီကို ထွက်ပြေး တိမ်းရှောင်ကြရတဲ့အတွက် ထိခိုက်ဒဏ်ရာရသူများ၊ သေဆုံးသူများကို စီစစ်ရာတွင် အတော်စိန်ခေါ်မှုတယ်” လို့ ရှင်းပြပါတယ်။
PYO က အခုထွက်ရှိထားတဲ့ သတင်းအချက်အလက်တွေဟာ ဒေသခံဆီကနေ အဓိက တိုက်ရိုက်ယူထားတာဖြစ်ပြီး သတင်းမီဒီယာကနေ တက်လာတဲ့ သတင်းအချက်များကိုလည်း မြေပြင်မှာ ပြန်လည်အတည်ပြု ရယူသုံးစွဲထားတယ်လို့ ဆိုပါတယ်။
အချက်အလက်များကို ပြုစုသူအဖွဲ့ဝင်တွေ အများစုက လွိုင်လင်၊ ဟိုပုံး၊ ဆီဆိုင် ဒေသခံတွေဖြစ်တဲ့အပြင် စစ်ရှောင်တွေလည်း ဖြစ်တယ်လို့ ဆိုပါတယ်။ လူဦးရေ စာရင်းကိုတော့ PYO က ပြုစုထားတဲ့ အချက်အလက်ပါအဝင် ထွေအုပ်က နောက်ဆုံးထုတ်ပြန်ထားတဲ့ မြို့နယ်၊ အုပ်စု လူဦးရေးကို ကိုးကားမှီငြမ်းထားတယ် လို့ သိရပါတယ်။
ပအိုဝ်းလူငယ်အဖွဲ့အစည်း(Pa-O Youth Organization) PYO က အခုထွက်ရှိထားတဲ့ ဒေတာပါ သတင်းအချက်အလက်တွေဟာ ဒေသခံဆီကနေ အဓိက တိုက်ရိုက်ယူထားတာဖြစ်ပြီး သတင်းမီဒီယာကနေ တက်လာတဲ့ သတင်းအချက်များကိုလည်း မြေပြင်မှာ ပြန်လည်အတည်ပြု ရယူသုံးစွဲထားတယ်လို့ ဆိုပါတယ်။
ပအိုဝ်းလူငယ်အဖွဲ့အစည်း(Pa-O Youth Organization)ရဲ့ မူလအဖွဲ့အစည်း ပအိုဝ်းလူငယ် အစည်းအရုံးကို ၁၉၄၇ ခုနှစ်မှာ ပအိုဝ်းနိုင်ငံရေးခေါင်းဆောင် ၃ ဦးက မွန်ပြည်နယ်၊ သထုံမြို့မှာ စတင်ဖွဲ့စည်းခဲ့တာဖြစ်ပါတယ်။
စစ်အာဏာရှင်ကို ပြန်လည်လုခံနေတဲ့ ပအိုဝ်းလူထုတစ်သောင်းကျော်က တောင်ကြီးမြို့မှာ ဒီမိုကရေစီရဖို့တောင်းဆို ဆန္ဒပြခဲ့တဲ့ ၁၉၅၀ ခုနှစ် ဒီဇင်ဘာလ ၄ ရက်နေ့ ကို အစွဲပြုပြီး ၁၉၉၈ ခုနှစ်မှာ ထိုင်းနိုင်ငံ၊ ချင်းမိုင်မြို့မှာ ပအိုဝ်းတိုင်းရင်းသား ရဟန်းသံဃာတွေက ဦးဆောင်ပြီး ပအိုဝ်းလူငယ်တွေပါဝင်တဲ့ ပအိုဝ်းလူငယ်အဖွဲ့အစည်း (Pa-O Youth Organization) PYO ကို ဖွဲ့စည်းခဲ့တာဖြစ်ပါတယ်။
၂၀၂၁ ခုနှစ် အာဏာပြန်သိမ်းခံရပြီး ယနေ့အချိန်ထိ ပအိုဝ်းလူငယ်များကို စွမ်းရည်မြင့်စေရန် သင်တန်းများပြုလုပ်ပေးခြင်း၊ သုတေသန နဲ့ စည်းရုံးလှုံဆော်ခြင်း တွေအပြင် ပအိုဝ်းဒေသတွင်း အခွင့်အရေးချိုးဖောက်ခံရမှုများ၊ စစ်တပ်ရဲ့လုပ်ဆောင်ချက်တွေကို စောင့်ကြည့်တာ၊ သုတေသနစာတမ်း ထုတ်တာတွေ ပြုလုပ်လျက်ရှိတယ် လို့သိရပါတယ်။
Photo: PNLA
CJ-001
