မဲခေါင်၊ မတ် ၁၄
ရှမ်းပြည်တောင်ပိုင်း၊ ပင်လောင်းမြို့တောင်ဘက် မှာ တိုက်ပွဲတွေ ဆက်လက်ပြင်းထန်နေပြီး ပင်လောင်းအထိ တိုက်ပွဲတွေ ရောက်လာမှာကိုစိုးရိမ်လို့ ဒေသခံတွေ နောင်တရား၊ ညောင်ရွှေတို့အထိ စစ်ရှောင်နေကြရကြောင်း သိရပါတယ်။
ပင်လောင်းတောင်ဘက် နောက်ဝိုးသမထ၊ ကားရား၊ နမ်းဖာမူ၊ ကုန်းပေါ၊ ဗန်းမောဝ်ကျေးရွာတွေ ကို ဖယ်ခုံဘက်မှာ ဖြစ်လာတဲ့ စစ်မီးကူးစက်လာတာဖြစ်ပြီး အခုလဲ ပင်လောင်းမြို့ပေါ်အထိ စစ်မီးကူးစက်လာမှာကို စိုးရိမ်လို့ ဒေသခံတွေ ကြိုတင်ပြီး စစ်ဘေးရှောင်နေကြတာလို့သိရပါတယ်။
`ကြိုတင်ရှောင်ရတော့ ဆီဆိုင်လို အဝတ်တစ်ထည် ကိုယ်တစ်ခုမဖြစ်ကြရဘူးပေါ့၊ ဒါပေမယ့် ပင်လောင်းကို ဆီဆိုင်လိုမြို့ပျက်စီးသွားမှာတော့ အင်မတန် နှမျောမိတာ၊ ငယ်ဇာတိလေ၊ တသက်လုံးရှာဖွေလာတာတွေ ဖျက်ဆီးခံရမှာကို စိုးရိမ်မိတာ” လို့ ပင်လောင်းစစ်ရှောင်တစ်ဦးက မဲခေါင်ကို ပြောပါတယ်။
ပြီးခဲ့တဲ့ မတ်လ ၁၀ ရက် ကတည်းက စတင်ခဲ့တဲ့ စစ်ကောင်စီ၊ PNO ပြည်သူ့စစ်နဲ့ ပြည်သူ့ကာကွယ်ရေးတပ် PDF တွေအကြား တိုက်ပွဲတွေ ယနေ့ အထိ ဆက်လက်ပြင်းထန် လာနေတာဖြစ်လို့ ပင်လောင်းတောင်ဘက်ကနေ ပင်လောင်းအထိ စစ်မီးကူးစက်လာမှာကို စိုးရိမ်တဲ့အတွက် နောင်တရားကို စစ်ဘေးရှောင်ဦးရေ ၆၀၀၀ ခန့်နဲ့ ညောင်ရွှေဘက်ကို ၄၀၀၀ကျော်အထိ စစ်ဘေးရှောင်နေ ကြရတယ်လို့ သိရပါတယ်။
မတ်လ ၁၂ ရက်က ပင်လောင်းမြို့နယ် နောင်ဝိုးကျေးရွာအတွင်း တိုက်ပွဲတွေဖြစ်ပွားရာမှာ စစ်ကောင်စီက လေယာဉ်နဲ့ဗုံးကြဲ၊ လက်နက်ကြီးနဲ့ပစ်ခတ်တာတွေကြောင့် နောင်ဝိုးဘုန်းကြီးကျောင်းနဲ့ နေအိမ်အချို့ပျက်စီးခဲ့ရတယ်လို့ သိရပါတယ်။
ယင်းရက်မတိုင်မီ မတ်လ ၈ ရက်က ဖယ်ခုံဘက်တိုက်ပွဲမှာ ကလောစစ်ဦးစီးတက္ကသိုလ်က နည်းပြ ဒုဗိုလ်မှူးကြီးအောင်ကိုဝင်း တော်လှန်ရေးတပ်ဖွဲ့တွေရဲ့ ဒရုန်းဗုံးထိမှန်မှုခဲ့ပြီး မတ်လ ၉ ရက်နေ့မှာ သေဆုံးခဲ့တယ်လို့ သတင်းရင်းမြစ်တွေအရ သိရပါတယ်။
လက်ရှိ အင်းလေးကန်အရှေ့ခြမ်း၊ ဖယ်ခုံနဲ့ ပင်လောင်းတောင်ဘက်တွင် စစ်ကောင်စီ၊ PNO ပြည်သူ့စစ်နဲ့ တော်လှန်ရေးတပ်ဖွဲ့တွေဖြစ်တဲ့ အင်းလေး ၁၀၀၉ IPDF၊ ဖယ်ခုံ ၁၀၀၂ တပ်ရင်း၊ ဖယ်ခုံ ၁၀၀၆ တပ်ရင်းနဲ့ ရှမ်းတောင်ဗျူဟာ(၂) တပ်တွေနဲ့ တိုက်ပွဲတွေ ပြင်းထန်နေဆဲလို့ မြေပြင်သတင်းတွေအရ သိရပေမယ့် ထိခိုက်ကျဆုံးမှုတွေကိုတော့ နှစ်ဖက်တပ်တွေက ထုတ်ပြန်တာမရှိပါဘူး။
MK-012
