မဲခေါင်၊ ဖေဖော်ဝါရီ ၂၈
ရှမ်းပြည်တောင်ပိုင်း၊ ဆီဆိုင်မြို့တွှင် တိုက်ပွဲများပြင်းထန်ခဲ့ပြီးနောက် ဆီဆိုင်မြို့ရဲ့ ၄ပုံ ၃ပုံခန့်ဟာ ပြန်လည်ထူထောင်ဖို့တောင်ခက်ခဲမဲ့ အနေအထား နဲ့ ထိခိုက်ပျက်စီးခဲ့ပြီလို့ ဆီဆိုင်မြို့လူထုက မဲခေါင်ကို ပြောပါတယ်။
ဆီဆိုင်မြို့ဟာ တိုက်ပွဲကာလအတွင်းမှာ စစ်ကောင်စီရဲ့ လေယာဉ်နဲ့ဗုံးကြဲမှု၊ ဒရုန်းနဲ့ဗုံးချမှု၊ လက်နက်ကြီးနဲ့ပစ်ခတ်မှုတွေအပြင် မြေပြင်တိုက်ပွဲတွေကြောင့် မြို့ပေါ် ရပ်ကွက်တွေဖြစ်တဲ့ ဟိုခဲ၊ မြကန်သာ၊ မင်္ဂလာရပ်ကွက်၊ တွေမှာရှိတဲ့နေအိမ်နဲ့အဆောက်အဦတွေ ၈၀ ရာခိုင်နှန်းလောက် ပျက်စီးဆုံးရှုံးခဲ့ရပြီး အောင်သပြေ၊ အောင်ချမ်းသာ၊ သီရိရပ်ကွက်တွေဟာ ၅၀ ရာခိုင်နှုန်းလောက် ပျက်စီးဆုံးရှုံးခဲ့ရတယ်လို့ သိရပါတယ်။
စစ်ကောင်စီရဲ့ ဆိုက်ခေါင်ဘောလုံးကွင်း အထိုင်ချအမြောက်တွေရဲ့ လက်နက်ကြီးပစ်ခတ်နှုန်းဟာ တစ်ရက်ပျမ်းမျှ ၁၀ လုံးနဲ့အထက်ရှိ တာဖြစ်ပြီး မြေပြင်တိုက်ပွဲရှိချိန်ဆို အလုံး ၅၀ ကျော်ပစ်ခတ်ခဲ့ကာ ဆီဆိုင်မြို့ဟာ လက်နက်ကြီးကျည် အနည်းဆုံး ၅၀၀ နီးပါး ခံခဲ့ရတယ်လို့ ဆိုပါတယ်။
အထူးသဖြင့် ဆီဆိုင်မြို့မဈေးကြီး ရဲ့ ၄ ပုံ ၃ ပုံဟာ မီးလောင်ကျွမ်းပျက်စီးခဲ့တာလို့ သိရပါတယ်။ မြို့ပေါ် ၆ ရပ်ကွက်နေပြည်သူ ၁ သောင်းခွဲဟာလည်း ခုချိန်ထိ စစ်ဘေးရှောင်ရင်း သေသူသေ၊ ဒဏ်ရာရသူရ၊ ပျောက်ဆုံးသူတွေနဲ့ မိသားစုတွေ တကွဲတပြားဖြစ်နေကြပါတယ်။
ဆီဆိုင်မြို့မှာမနေ့က ဖေဖော်ဝါရီ ၂၇ ရက်မှာ လက်နက်ကြီးပစ်ခတ်တာကလွဲလို့ မြေပြင်တိုက်ပွဲဆင်တာတွေ မရှိခဲ့ဘူးလို့ သတင်းအရင်း အမြစ်တွေထံကသိရပါတယ်။
အဲဒီလို တိုက်ပွဲတွေမရှိတာဟာ လာမယ့် စစ်တပ်နေ့ မတ်လ ၂၇ ရက်နေ့အတွက် စစ်ကောင်စီက သူ့တပ်ဖွဲ့တွေ ပြန်ုစုနေပြီး PNO ပြည်သူ့စစ်တွေနဲ့ပဲ လွှတ်ထားခဲ့တယ်ဆိုတဲ့ ပြောကြားချက်၊ ထိုးစစ်အတွက် စစ်တပ်နေ့အယောင်ပြပြီး လူစုနေတယ်ဆိုတဲ့ပြောကြားချက်တွေ ရှိပေမယ့် မဲခေါင်အနေနဲ့ သီးခြားအတည်ပြုချက်မရရှိသေးပါဘူး။
မနေ့ကရော ဒီမနက် ၈ နာရီအထိရော ဘာသံမှ မကြားရဘူး၊ အခြားနေရာမှာ ရှိချင်ရှိနေပေမယ့် ဆီဆိုင်မှာ တိုက်ပွဲပစ်ခတ်သံ မကြားရတာလို့ သတင်းအရင်းအမြစ်တစ်ဦးက မဲခေါင်ကို ပြောပါတယ်။
ပြီးခဲ့တဲ့ ဇန်နဝါရီ ၂၃ ရက် ညနေပိုင်းက စတင်ခဲ့တဲ့ စစ်ကောင်စီနဲ့လက်အောက်ခံ PNO ပြည်သူ့စစ်တွေက တဖက်၊ PNLA နဲ့တော်လှန်ရေးတပ်ဖွဲ့တွေက တဖက် တိုက်ခိုက်လာတဟာ ယနေ့ ဖေဖော်ဝါရီ ၂၈ ရက်ဆိုရင် ရက်ပေါင်း ၃၅ ရက်ခန့် ရှိလာနေပြီဖြစ်ပါတယ်။
လက်ရှိ မြေပြင်သတင်းတွေအရ ဆီဆိုင်မြို့အထွက်တွေမှာရှိတဲ့ ခမရ(၄၂၃)နဲ့(၄၂၄) မှာ စစ်ကောင်စီတပ်တွေ နေရာြပန်ယူထားပြီး PNLA တပ်ဖွဲ့တွေက လွယ်ကဖီးတောင်ခြေနဲ့ ထီရိကျေးရွာ တကြော ကားတွေနဲ့သွားလာနေတယ်နေကာ ဆီဆိုင်မြို့ကိုလည်း ထိန်းချုပ်ထားဆဲလို့ သိရပါတယ်။
ပအိုဝ်းလူငယ်အစည်းအရုံးက ပြုစုတဲ့ ဆီဆိုင်၊ ဟိုပုံး၊ လွိုင်လင် ၃ မြို့နယ်မှာ တိုက်ပွဲတွေကြောင့် သေဆုံး ၄၀ ဦး၊ ဒဏ်ရာရ ၅၁ ဦးရှိခဲ့တာမှာ ဆီဆိုင်တစ်ခုထဲက သေဆုံး ၁၃ ဦး၊ ဒဏ်ရာရ ၂၅ ဦး ရှိခဲ့တယ်လို့ သိရပါတယ်။
MK-012
