မဲခေါင်၊ ဒီဇင်ဘာ ၂
ကရင်ပြည်နယ်၊ ကော့ကရိတ်မြို့ အနီးရှိ ကော့နွဲ့ စစ်တပ်စခန်းကို ဒီကနေ့ KNLA က သိမ်းပိုက်လိုက်ပြီလို့ KNLA GHQ က ထုတ်ပြန်ထားပြီး လှိုင်ဝစစ်ဆေးရေးဂိတ် အနီးမှာ လက်နက်ကြီး ထိမှန်လို့ ယာဥ်မောင်း တစ်ဦး သေဆုံးကာ ကုန်တင်ကား ၂ စီး မီးလောင်ခဲ့တယ်လို့ ကုန်တင်ယာဉ်မောင်း တစ်ဦးက ပြောပါတယ်။
လက်ရှိအချိန်မှာတော့ KNLA တပ်မဟာ (၆) ပူးပေါင်းတပ်တွေ အနေနဲ့ ကော့ကရိတ်မြို့ အနီးက ကော့နွဲ့စခန်းကို သိမ်းဆည်းရမိပြီး တိုက်ပွဲ ဆက်လက် ဖြစ်ပွားနေတယ်လို့ KNLA GHQ က ထုတ်ပြန်ထားပါတယ်။
ဒီကနေ့ ဒီဇင်ဘာ ၁ ရက်နေ့၊ နေ့လယ်ပိုင်းမှာ လှိုင်ဝဂိတ်အနီး ပိတ်မိနေတဲ့ ကုန်တင်ယာဉ် ၁၂ ဘီး တစ်စီးနဲ့ တွဲကား တစ်စီး လက်နက်ကြီးထိမှန် မီးလောင်သွားပြီး ယာဉ်မောင်း တစ်ဦး သေဆုံးကာ ထိခိုက်ဒဏ်ရာရသူတွေ ရှိနေတယ်လို့ သိရပါတယ်။
“ကားက လက်နက်ကြီးထိလို့ မီးလောင်တာပါ။ သေဆုံးတာတော့ လက်ရှိ တစ်ယောက်ပဲ။ ထိခိုက်တာတွေတော့ ရှိတယ်။ ရပ်ကွက်ထဲက လူတွေရော ကားသမားတွေရော လျှောက်သွားလို့ မရဘူး။ ရေမြောင်းထဲကကို မထွက်ရဲဘူး” လို့ အဲဒီနေရာမှာ ပိတ်မိနေတဲ့ ယာဉ်မောင်း တစ်ဦးက ပြောပါတယ်။
ဒီကနေ့ မနက် ကော့ကရိတ်မြို့ထဲမှာ စတင်ဖြစ်ပွားတဲ့ KNLA ပူးပေါင်းတပ်တွေနဲ့ စစ်ကောင်စီတပ် တိုက်ပွဲကြောင့် ကော့ကရိတ်-မြဝတီ အာရှလမ်းပိုင်း ယာယီ ပိတ်ထားပြီး လှိုင်ဝဂိတ်မှာ ခရီးသွားနဲ့ ကားတွေ ပိတ်မိနေတာ ဖြစ်ပါတယ်။
ကော့ကရိတ်မြို့တွင်းမှာတော့ လူနေရပ်ကွက်တွေထဲ လက်နက်ကြီး ကျရောက် ပေါက်ကွဲမှုတွေကြောင့် နေအိမ်၊ အဆောက်အအုံ ထိခိုက် ပျက်စီးတာတွေ ရှိနေပြီး မြို့ခံ တချို့ ထိခိုက်ဒဏ်ရာရတာ ရှိတယ်လို့ သိရပါတယ်။
“ကော့ကရိတ်မြို့ထဲမှာ ကြမ်းနေတာ။ တချို့ဆို မိသားစုတွေ အားလုံး တယောက်တကွဲစီ လိုက်ပုန်းနေကြရတယ်။ နောက် ရေတွင်းထဲ ဝင်ပုန်းတာ ရေတွင်းထဲ တည့်တည့်ကျတယ်လို့ ပြောတယ်။ အတိကျတော့ မသိရသေးဘူး” လို့ ကော့ကရိတ် ဒေသခံ တစ်ဦးက ပြောပါတယ်။
မနေ့က ညသန်းခေါင် ၁၂ နာရီဝန်းကျင်မှာတော့ Yak–130 ဂျက်ဖိုက်တာနဲ့ ဗုံးကြဲတိုက်ခိုက်မှုကြောင့် ဖန်ခါးကုန်းကျေးရွာက အသက် ၄၀ အရွယ် အမျိုးသား ဦးခေါင်းထိမှန် ဒဏ်ရာရခဲ့ပြီး အသက် ၂၅ နှစ်အရွယ် အမျိုးသမီးကတော့ ဦးခေါင်းခွံကွဲပြီး သေဆုံးခဲ့ပါတယ်။။
ဒါ့အပြင် မနက် ၂ နာရီဝန်းကျင်မှာ ဂျက်ဖိုက်တာနဲ့ ပေါင် ၅၀၀ ဗုံး ၂ လုံး ကြဲချရာ မိကသစ်ကျေးရွာအုပ်စုရှိ ဘဏ္ဍာဓန တောရဘုန်းတော်ကြီးကျောင်းဝင်းထဲ ကျရောက်ပေါက်ကွဲလို့ သက်တော် ၄၂ နှစ်အရွယ် ဦးဇင်း ဦးသောမ ဗုံးစထိမှန် ပျံလွန်တော်မူခဲ့တယ်လို့ ဒူးပလာယာခရိုင်က ထုတ်ပြန်ထားပါတယ်။
အလားတူ မြဝတီမြို့ပြင် သင်္ကန်းညီနောင်၊ ရွာသစ်၊ မဲကနယ်ကျေးရွာအနီးမှာလည်း မနေ့ညကစပြီး လက်နက်ကြီး ပစ်ခတ်သံတွေနဲ့၊ တိုက်ပွဲသံတွေ ထွက်ပေါ်နေလို့ အနီးတဝိုက်နေ ဒေသခံတွေ တိမ်းရှောင်နေရတယ်လို့ သိရပါတယ်။
MK–009
#MeKongNews
#ကော့ကရိတ်မြို့
#KNLA
#လှိုင်၀_စစ်ဆေးရေးဂိတ်