မဲခေါင်၊ ဖေဖော်ဝါရီ ၁၆
ရုရှားသမ္မတပူတင်ဟာ အာကာသထံ နျူကလီးယားလက်နက် လွှတ်တင်ထားရှိပြီး ကမ္ဘာကို ခြိမ်းခြောက်ဖို့ စီစဉ် နေကြောင်း အမေရိကန်ထောက်လှမ်းရေးသတင်းရင်းမြစ်က သိရှိထားတယ်လို့ ဆိုပါတယ်။
အမေရိကန်သမ္မတဂျိုးဘိုင်ဒန်အပါအဝင် လွှတ်တော် ထိပ်တန်းအရာရှိတွေကြားမှာ ဒီသတင်းကြောင့် စိုးရိမ်တကြီးဖြစ်နေကြပြီး ပူတင်ရဲ့ ဒီလုပ်ရပ်ဟာ ကနဦးအဆင့် ကမ္ဘာမြေပေါ် နျူကလီးယားလက်နက်နဲ့ပစ်မှာမဟုတ်ဘဲ အာကာသထဲက အမေရိကန်နဲ့ အနောက် မဟာမိတ်အင်အားစုတွေရဲ့ ဂြိုဟ်တုတွေကို ဖျက်ဆီးဖို့အတွက် ရည်ရွယ်ထားတယ်လို့ သိရပါတယ်။
ရုရှားရဲ့ အစီအစဉ်ဟာ အားချင်းလုပ်ဆောင်မှာမဟုတ်ပေမယ့် အမျိုးသားလုံးခြုံရေးကို ပြင်းထန်ဆိုးရွားတဲ့ ခြိမ်းခြောက်မှုဖြစ်တယ်လို့ အမေရိကန်ထောက်လှမ်းရေးဌာနက သုံးသပ်ထားသလို ဂျိုးဘိုင်ဒန်ကလည်း ရုရှားရဲ့ ခြေလှမ်းတိုင်းကို မျက်ခြေမပြတ်စောင့်ကြည့်ဖို့ စီစဉ်နေကြောင်းသိရပါတယ်။
ယူကရိန်းကို ရုရှားက ကျူးကျော်စစ်ဆင်နွှဲတဲ့ ကာလအတွင်း ကမ္ဘာ့ နျူကလီးယားပိုင် နိုင်ငံကြီးတွေဟာ မကြာ ခင် တတိယကမ္ဘာစစ်အသွင်နဲ့ နျူကလီးယားစစ်ပွဲ ဖြစ်ပွားလာနိုင်လို့ နျူကလီးယားလက်နက် ထုတ်လုပ်မှုတွေကို တိုးမြှင့်ပြီးအပြိုင်အဆိုင် ထုတ်လုပ်နေကြပါတယ်။
ရုရှားမှာ နျူကလီးယားထိပ်ဖူး ၅၉၇၇ ခု၊ အမေရိကန်မှာ ၅၄၂၈ ခု၊ တရုတ်မှာ ၃၅၀ ခု၊ ပါကစ္စတန်မှာတောင် ၁၆၅ ခု ရှိနေပြီဖြစ်လို့ လက်ရှိကမ္ဘာ့စစ်ရေးအခင်းအကျင်းဟာ နျူကလီးယားစစ်ပွဲဖြစ်ဖို့ နီးစပ်လွန်းနေပြီလို့ သုံးသပ်နေကြပါတယ်။
တကယ်လို့ ရုရှားက အာကာသထဲ နျူကလီးယားလက်နက် လွှတ်တင်မယ်ဆိုရင် ဒါဟာ ၁၉၆၇ ခုနှစ်က အာကာသသဘောတူညီချက်စာချုပ်ကို ရုရှားချိုးဖောက်တာဖြစ်တယ်လို့ ဩစတြေးလျ မဟာဗျူဟာ အင်စတီကျု စီနီယာသုတေသီ ဒေါက်တာမယ်လ်ကွန်ဒါးဗီးစ်က ပြောကြားခဲ့ပါတယ်။
ဒီသတင်းတွေနဲ့ပတ်သက်လို့ ရုရှား ဒုတိယနိုင်ငံခြားရေးဝန်ကြီး ဆာဂျီရက်ဘ်ကော့ဗ်က အမေရိကန်အိမ်ဖြူတော်ရဲ့ နောက်ထပ် လုပ်ကြံဖန်တီးတဲ့ ပုံပြင်အတုကြီးလို့ ငြင်းချက် ထုတ်ခဲ့ပါတယ်။
ရုရှားဟာ မြေပြင် စစ်ရေး၊ စီးပွားရေး သတင်းအချက်အလက်နဲ့ ပစ်မှတ်နေရာပေါင်းစုံကို သတင်းပေးပို့မှတ်တမ်း ယူနေတဲ့ အမေရိကန်နဲ့အနောက်အင်အားစုတွေရဲ့ ဂြိုဟ်တုတွေကို အာကာသထဲ နျူကလီးယားလက်နက်နဲ့ ဖျက် ဆီးခဲ့ရင် မြေပြင်စစ်ရေးမှာ သေချာပေါက်အသာရသွားမှာဖြစ်လို့ မိုက်ရူးရဲဆန်စွာ တကယ်လုပ်ဆောင်မှာဖြစ် ကြောင်း အိမ်ဖြူတော်ထောက်လှမ်းရေးကော်မတီ အကြီးအကဲ ရီပါဘလစ်ကန်အမတ် မိုက်ခ်တင်နာက စိုးရိမ် တကြီး ပြောဆိုခဲ့ပါတယ်။
ဒါပေမဲ့ ဂျိုးဘိုင်ဒန်ကတော့ ပြည်သူအများအပြား ထိတ်လန့်တုန်လှုပ်မှုကြီးစွာ ဖြစ်နိုင် တဲ့သတင်းမို့ အများပြည်သူသိ မထုတ်ပြန်ဘဲ ထားဖို့ မှာကြားထားကြောင်း အတွင်းသတင်းအရ သိရပါတယ်။
ရုရှားသမ္မတဟောင်း မက်ဗီဒက်ကိုယ်တိုင်ကလည်း နျူကလီးယားစစ်ပွဲကြီးဖြစ်ပွားပြီး ကမ္ဘာပျက်ခဲ့ရင်တောင် နေတိုးနဲ့ အနောက်အင်အားစု ခေါင်းဆောင်တွေကိုသာ အပြစ်ဖို့ရမှာဖြစ်ကြောင်းနဲ့ အာကာသထဲကနေ နျူကလီး ယားဒုံးကျည်နဲ့ ပစ်ရင် ကမ္ဘာ့ ဘယ်အရပ်ဒေသမဆို မိနစ် ၃၀ အတွင်း ပစ်ခတ်နိုင်ပြီး ဘယ်သူမှ တားဆီးနိုင်မှာ မဟုတ်ဘူးလို့ ခြိမ်းခြောက်ပြောဆိုမှု လုပ်ထားပါသေးတယ်။
Ref:Thesun
MKF-001
