မဲခေါင်၊ အောက်တိုဘာ ၁၂

နိုင်ငံတကာမှာ အထီးကျန် သီးသန့်နေထိုင်နေရတဲ့ နှစ်နိုင်ငံဖြစ်တဲ့ မြောက်ကိုရီးယားနဲ့ ရုရှားခေါင်းဆောင် ကင်ဂျုံအန်နဲ့ ပူတင်တို့ဟာ နှစ်နိုင်ငံဆက်ဆံရေး ၇၅ နှစ်ပြည့်အဖြစ် ဒီကနေ့(အောက်တိုဘာ ၁၂ ရက်)မှာ အပြန် အလှန်သဝဏ်လွှာတွေ ပေးပို့ခဲ့ကြောင်း မြောက်ကိုရီးယား အစိုးရပိုင်သတင်း KCNA က ထုတ်ပြန်သွားပါတယ်။

ကင်ဂျုံအန်ဟာ စက်တင်ဘာလတုန်းက ရုရှားနိုင်ငံ ဗော့စတော့ဗ်နီမြို့ကို သွားရောက်ပြီး ပူတင်နဲ့ တွေ့ဆုံခဲ့ပြီး နောက် အမေရိကန်နဲ့အနောက်မဟာမိတ်အုပ်စုက နှစ်နိုင်ငံ လက်နက်နဲ့စစ်ရေး အပြန်အလှန်ကူညီမယ့်အရေး ရှိလို့ သတိထားစောင့်ကြည့်နေကြပါတယ်။

ကင်ဂျုံအန်ဟာ ယူကရိန်းကို ကျူးကျော်စစ်ဆင်နေတဲ့ ရုရှားကို တင့်ဖျက်ဒုံး၊ လက်နက်ကြီးတွေ ထောက်ပံ့ပေးပြီး ရုရှားဆီက စားနပ်ရိက္ခာ၊ ဂြိုဟ်တုနည်းပညာနဲ့ နျူကလီးယား ရေငုပ်သင်္ဘော နည်းပညာတွေ ပြန်ယူဖို့ သဘောတူညီခဲ့တာဖြစ်တယ်လို့ သတင်းတွေ ထွက်ပေါ်ခဲ့ပါတယ်။

ကင်ဂျုံအန်က နှစ်နိုင်ငံဆက်ဆံရေး ၇၅ နှစ်ပြည့်မှာ “မကြာသေးခင်က ရုရှားကို သွားရောက်လည်ပတ်လို့ ပူတင်နဲ့ တွေ့ဆုံဆွေးနွေးခဲ့မှုတွေကို အားရကျေနပ်လှပါတယ်။ နှစ်နိုင်ငံချစ်ကြည်ရင်းနှီးမှုကနေ များစွာသော ဖွံ့ဖြိုး တိုးတက်ရေးတွေကို ဖြစ်တည်စေခဲ့တယ်။ တည်ငြိမ်တဲ့ တိုးတက်ဖွံ့ဖြိုးမှုတွေနဲ့ လှပတဲ့အနာဂတ်ဆီကို ဒီ ရင်းနှီးချစ်ကြည်မှုက ဖြစ်တည်စေခဲ့ပါတယ်” လို့ ထုတ်ပြန်ခဲ့တယ်။

မြောက်ကိုရီးယားနဲ့ ရုရှားဟာ ဒုတိယကမ္ဘာစစ်မှာ ဂျပန်စစ်ရှုံးသွားတဲ့ ၁၉၄၅ ခုနှစ်ကတည်းက သံတမန်ဆက်ဆံ ရေးစတင်ခဲ့ပြီး ၁၉၄၈ ခုနှစ်မှာ ဆိုဗီယက်ဟာ မြောက်ကိုရီးယားကို တရားဝင် နိုင်ငံအဖြစ် ပထမဆုံး အသိအမှတ် ပြုခဲ့တဲ့ နိုင်ငံလည်းဖြစ်ပါတယ်။

Ref: laprensalatina
MKF-001

#MeKongNews

#ရုရှား

#မြောက်ကိုရီးယား

#ကင်ဂျုံအန်း

#ပူတင်

#သဝဏ်လွှာ

(လွတ်လပ်သည့် မီဒီယာအဖြစ် ရေရှည်ရပ်တည်နိုင်ရေး သင်တို့အကူအညီလိုအပ်နေပါသည်။ ဤနေရာတွင် www.mekongnewsmm.com/donation နှိပ်၍ လှူဒါန်းနိုင်ပါသည်)