မဲခေါင်၊ အောက်တိုဘာ ၃၀
ရှမ်းပြည်နယ်တောင်ပိုင်း၊ တောင်ကြီးမြို့နယ်၊ ၆ မိုင်ဒေသမှ ၃လကျော်ကြော ပျောက်ဆုံးနေသည့် Grade – 9 ကျောင်းသားတစ်ဦး၏ မှတ်ပုံတင်နှင့် သန်းခေါင်စာရင်းကို အောက်တိုဘာ ၂၂ ရက်တွင် တာချီလိတ်တပ်မှဟုဆိုကာ မိဘများထံ ဖုန်းခေါ်ဆိုလာပြီး တောင်းခံခဲ့ကြောင်း မိသားစုနှင့် နီးစပ်သူများထံမှ သိရသည်။
ပျောက်ဆုံးနေသည့် ကျောင်းသားမှာ သန့်အောင်ဇင်ဖြစ်ပြီး နမ့်စီး ၆ မိုင်ရှိ အခြေခံပညာအထက်တန်းကျောင်းခွဲတွင် Grade-9 တက်ရောက်နေသူဖြစ်ကြောင်း၊ ၎င်းသည် လွန်ခဲ့သည့် ၃ လကျော်ကတည်းက ပျောက်ဆုံးနေခြင်းဖြစ်ကြောင်း မိသားစုနှင့် နီးစပ်သူတစ်ဦးက ပြောသည်။
“တာချီလိတ်တပ်ကလို့ပဲ ပြောတယ်။ ဘယ်တပ်လဲ၊ ဘယ်တပ်ရင်းလဲဆိုတာ မေးတော့ မပြောဘူး။ မှတ်ပုံတင်နဲ့ သန်းခေါင်စာရင်းတောင်းတယ်။ မပေးလိုက်တော့ နောက်ထပ်လည်း ဖုန်းဆက်မလာတော့ဘူး” ဟု ၎င်းကပြောသည်။
ယင်းနောက် မိသားစုက တောင်ကြီးမြို့မရဲစခန်းသို့ ဆက်သွယ်မေးမြန်းခဲ့ရာတွင်လည်း တပ်ဘက်မှ ပြောကြား၍ မရသေးကြောင်းနှင့် တပ်ရင်းမှူးက ဆက်သွယ်လာလိမ့်မည်ဟု ပြောဆိုကာ ဖုန်းချသွားခဲ့ကြောင်း မိသားစုနှင့် နီးစပ်သူများက မဲခေါင်သို့ ပြောသည်။
လက်ရှိအချိန်အထိ ကျောင်းသား၏ တည်နေရာနှင့် မည်သည့်တပ်တွင် ရှိနေသည်ဆိုသည့်အချက်ကို မိသားစုအနေဖြင့် အတည်ပြုနိုင်ခြင်းမရှိသေးပေ။
ပျောက်ဆုံးနေသည့် ကျောင်းသား၏ မိသားစုဆွေမျိုးနှင့် ဒေသခံများက ပျောက်ဆုံးသူ လက်ရှိတည်နေရာနှင့် အခြေအနေကို သိရှိနိုင်ရန် အကူအညီလိုအပ်နေပြီး သက်ဆိုင်ရာအဖွဲ့အစည်းများအနေဖြင့် အတည်ပြုစုံစမ်းပေးရန် လိုလားနေကြသည်။
#MeKongNews
#တောင်ကြီးမြို့နယ်
#တာချီလိတ်
#ပေါ်တာဆွဲ
#မှတ်ပုံတင်
#သန်းခေါင်စာရင်း
